1 Nttamawɔ ka lusso Ɔlɔɔmɔlɔɔm la Christ Jesus wa ule ɔkaal kɛkaal ɔssɛbibit ɔkkpɛlɛ, bakokolo la babbu, ammɛ wa ule ka uffunɛ ɔkɔɔm vveengodde. Nttɛ, 2 akopolo lɛmmwɔɔl ammɛ kɔbɛtɛwɔ, mkkpa ɛkɛtɛ ele bbwak, ɔlɔk esi bbwak lile. Asikili balɔɔt ippyam, akamabɛ ippyam, abbabɛ bikɔɔm, akopolobɛ la kibbe-luppyam. 3 Ɛkɛtɛ vvenɛ effu ya balɔɔt bale basi lukopolo gwa lɔkkwɔɔn lɛbɛlɛ lɛgɔpɔlɔ. Vvenɛ bappyɛɛ banaang kwa battinanɛ ka ippyam abbɛ biini. Vvenɛ bassɛ bakkpit baggyan bakopolo-lukopolo ggbadam ba bale bakopolobɛ bwa abbɛ biini baggyannɛ battɛ bappyee. 4 Vvenɛ bafim lɔkkwɔɔn a kɔlɔɔk bappyɛɛ basam ittina abbɛ baloko ka lissa. 5 Ɔzzànga annɔ akɔɔmwɔ kɛyɔɔng ka utini lilɔɔk ɔkkpɛlɛ. Abbɔ akama, anaang kɛnaang tɛ̀ttɛ̀ ɔlɔɔt wa ukopolonɛ Kuttu-Budoddo Ɔlɔɔmɔlɔɔm. Anaang kɛnaang annɔ ɔkkpɛlɛ tɛ̀ttɛ̀ bɔɔyi Ɔlɔɔmɔlɔɔm. 6 Tɛ̀ttɛ̀ kwa anaam mung, ɛkɛtɛ ɛffɔbong ya bale ka bawwɔɔlnɛnɛ. Ɛkɛtɛ ɛffɔbong ya nle ka ngbatanɛ nssekewɔyɔng ka vveeng ’wɔng mung. 7 Nllubong kullu kɔyyɛɛp. Numa nffɔ ka lakuma. Nkɔɔmbong kiyila anaam kkpɔk. 8 Ɔzzànga gedegede mung lɛsɔɔk za nyanganɛ ka nlenɛ lɛbɛtɛ lilenɛ bakang ka lɛkatnɛnɛ. Azzɛ lilenɛ kɛ̀ttɔ̀pɔ́ ododo kɛtaa bbwak la Ɔlɔɔmɔlɔɔm wa Uyini, Ɔkaal-a-kɛkaal wa bbwak, ule unnyinɛ ka Kɛtɔm ’sɔng baang. Ɔzzànga anaam keem lissi ka ule unnyinɛ, ule unnyi ɔtta la balɔɔt ’bɔng baang ɔkkpɛlɛ ba bale bataa la kɛsaap bakatmɛ ɛkɛtɛ uffunɛ. 9 Abum gaang gaang akka liffu ka ɛfɛɛn anaam gedegede mung. 10 Demas vveeng wa gedegede mung ɔsaapmɛbong ɔsak. Ɔgbatabong ɔkɔngɔnɛ umii Thessalonica. Crescens umiibong Galatia, Titus umiibong Dalmatia. 11 Usseke Luke kɛyɔɔng ka ulenɛ mung la anaam. Akɔɔm Mark affuyɔng la ammɛ la ammɛ. Ammɛ ukkwoongnɛ ɔyaamnɛ ka kɛnaang anaam. 12 Ntɔɔmbong Tychicus umii Ephesus. 13 Ɛkɛtɛ ya ale ka affunɛ, asam uwɔkɔlɔ wa ngbatanɛ nkɔngɔ ka Troas ka ssala Carpus akɔɔm affu. Asam livva ɔgbaa akɔɔm affu, gaang gaang livva sa banaangnɛsɛ la ɛkkpa ɛsɛɛn. 14 Alexander, ɔsal-a-bɛkkpala ɔnaangnɛ ubbu kɔlɔɔk kɔttala. Uyini vvenɛ ukipilimɛ ka kwa ulenɛ lɛnaang. 15 Akatwɔ kɛyɔɔng assekemɛ. Ɔkɔɔm lɛgabwɔ ufim lɛmmwɔɔl za ibwɔɔlɔnɛ. 16 Ɔlɔɔt vvɔn gbɔɔ wa ubeenɛ la anaam ka kɛkaal usi lile. Nbeenɛ lafeet kɛyɔɔng; Ɔkkpɛlɛ abbɛ bamma bakɔngɔnɛ. Nkkpenge Ɔlɔɔmɔlɔɔm nttɛ kɔfɔngɔmɛ kitun kɔppyɛɛkbɛ. 17 Ɔzzanga Uyini ubee la anaam unnyinɛ lakke nkkwoong nbwɔɔlɔ Ikanakana bɔtɔɔm ammɛ ɔkkpɛlɛ busaal bappyee. Ɔkkalanɛ ka kamma ugɛpɛ ɔfɔngɔ. 18 Uyini vvenɛ ɔkkalanɛ ka bubbi ɔkkpɛlɛ, ɔsamnɛ ka budoddo umii ka Itutum ammɛ ka libat. Kibungu kile sa Ɔlɔɔmɔlɔɔm kɛfal a kɛfal! Kulening. 19 Awomo Priscilla la Aquila la balɔɔt a ssala Onesiphorus. 20 Erastus ule ka Corinth ka ɔtaanɛ. Ngbata Trophimus nkɔngɔ ka Miletus ka usimɛnɛ lɛppwa. 21 Abum affu tɛ́ttɛ́ lukook lɔffa. Eubulus la Prudens la Linus, ɔbɛtɛ la Claudia la ikpana ayyɔɔt ilɔk ɔkkpɛlɛ battɛ nwomowɔ. 22 Uyini ubee la kuyeeng annɔ. Ppyɛɛ Ɔlɔɔmɔlɔɔm ɔtaa la annyɔɔng ɔkkpɛlɛ.
