2 TIMOTHY 3

1Akke asan attɛ vvenɛ ɛkɛtɛ ɛkɔɔt balɔɔt ka bɛtɔm a lakpeke. 2Balɔɔt vvenɛ bassɔp bɔfɛɛn, vvenɛ bawɔlɔ, banaang kamma, baggbengebɛ kɛyɔɔng, banaang bɛfɛɛn izzit. Ibassɛ abbɛ baala batele. Kɔlɔɔk vvenɛ baala kuffibɛ. Vvenɛ bafim kɔlɔɔk Ɔlɔɔmɔlɔɔm. 3Vvenɛ babbɔl eleme. Ɔlɔɔt lɛttɔ bɛ baala ubbe. Vvenɛ bakkala lalaak babɛtɛ balɔɔt, vvenɛ baggyan kɔlɔɔk, vvenɛ babbyap gaang gaang. Balɔɔt bakɔɔm ifɛtɛ banaang balɔɔt bubbi. 4Balɔɔt vvenɛ bassi latɔɔk, vvenɛ bagɔgɔlɔ basak, vvenɛ iyyɛɛp a vveengodde isaapbɛ itta Ɔlɔɔmɔlɔɔm. 5Balɔɔt ’bɔng baang batɔk luzɔɔm tɛ̀ttɛ̀ bayɛnnɛgwɛ. Kwa lakke aggwɛ ba bayila. Ataa zzekep asseke kɛssanga balɔɔt ’bɔng baang. 6Balɔɔt balɔk bamal ka ggwoon a balɔɔt balɔk bakup bwanavva ba bubbi abbɛ bulenɛ lɛsak lɛttala basseke ka bakkɔlɔnɛ ikkɔlɔ tɔkɔtɔkɔtɔkɔ. 7Abbɛ balenɛ bwanavva ba babumnɛ kikkoop a kɔlɔɔk, ɔzzànga baala basan lɔkkwɔɔn akkwɛ. 8Tɛ̀ttɛ̀ Jannes la Jambres bafimnɛ kwa Moses, balɔɔt ’bɔng mung ɔgbaa bassɛ bafim kwa lɔkkwɔɔn a kɔlɔɔk ning baang. Abbɛ balenɛ balɔɔt ba ippyam abbɛ isinɛ lɛyyɛɛp bale kiyila lisi lɛyanga. 9Ɔzzànga fulufulu baala baffɔ, ka balɔɔt ɔkkpɛlɛ bale bayɛn tɛ̀ttɛ̀ bazizinginɛ. Vvenɛ kɔnaangbɛ tɛ̀ttɛ̀ kɔnaangnɛ Jannes la Jambres. 10Ɔ̀zzànga annɔ akupbong lukopolo anaam, la linaang anaam, la luttina anaam, la kɛyyɛɛp a luppyam anaam, la kɛsaap anaam, la kɛbbɔ akama anaam, 11la kɛyɛn sa nyɛnnɛ. Asan lɔsan bɛfɛɛn bya bɛnaangnɛnɛ ka Antioch la Iconium, la Lystra. Uggboggbo akama wa nbbɔnɛ baang. Ɔzzanga Uyini ɔkkalanɛ ka abbyɛ ɔkkpɛlɛ ɔfɔngɔ. 12Ɔlɔɔt duu wa ɔggyannɛ kɛtaa ka kuddu kwa Ɔlɔɔmɔlɔɔm ka bɔkaat la Christ Jesus vvenɛ ɔyɛn akama. 13Ɔzzànga banaang-a-bubbi la bakkala-lɛlaak vvenɛ bakam-ɔkama banaang bubbi, bakkala lɛlaak. Vvenɛ bafɛɛt balɔɔt ɔgbaa, la kɛfɛɛt sa bafɛɛtnɛbɛ abbɛ biini. 14Ɔzzànga annɔ akup kɔlɔɔk kwa bakopolowɔnɛ, ayanga kiyila kɛkkaam lɔkkaam. Asan lɔsan balɔɔt ba badɔkɔnɛ ittikya annɔ. 15Ɔgbaa akke attɛ assi ssup ka buwaan asan kɔlɔɔk a livva lɛmmwɔɔl Ɔlɔɔmɔlɔɔm. Ka kukkwoongnɛ kunnyiwɔ bisana pya bile bikɔɔmwɔ bimii ka kuddu kwa kɛyanga kiyila kitum Christ Jesus. 16Ɔlɔɔmɔlɔɔm ɔssɛɛnnɛ balɔɔt ba bakkpɔknɛ lɛmmwɔɔl ammɛ ɔkkpɛlɛ luttina bakkpɔk kɔlɔɔk ammɛ. Kɔlɔɔk ammɛ kɔyyɛɛp gaang gaang ka kɛkɔɔm kikopolo lɔkkwɔɔn a kɔlɔɔk, la kifim a kɔlɔɔk kwa kusinɛ bbwak lile, la kɛlɔngɔlɔ kwa kusinɛ bbwak lile, la kikopolo lukopolo gwa linaang sa bbwak, 17nkwaaning ɔlɔɔt wa ɔnaangnɛ kɛnaang Ɔlɔɔmɔlɔɔm ɔkkɔnɔ, ɔyanga bɛfɛɛn ɔkkpɛlɛ bya ɔggyannɛ, ɔkɔɔm ɔnaang lutini kɛnaang duu sa kɛyyɛɛpnɛ.

will be added

X\