2 TIMOTHY 2

1Ka kwa annɔ, waan anaam, akɔɔm ppyɛɛ wa ulenɛ wa ayyɔɔt ka bɔkaat ayyɔɔt la Christ Jesus akkaam. 2Atɔk lɛmmwɔɔl za appyeenɛnɛ ka nkopolonɛ ka lusso ittɛɛsɛ ggbadam annyi balɔɔt ba basaapwɔnɛ ba bale bakkwoong bakopolo balɔɔt balɔk. 3Assɛ ayɛn akama, tɛ̀ttɛ̀ wa sɔgya Christ Jesus wa lɔkkwɔɔn. 4Wa sɔgya wa ɔnaangnɛ kɛnaang, ɔggyan ɔttɛ ɔnaang kɛsaap uzzilɛttɔ ammɛ. Ba utotolo linaang ammɛ la balɔɔt a ssala. 5Ɔlɔɔt wa ɔmmanɛ lɔfat ka ikanga, ba ukkwoong ɔbɛtɛ usinɛ lafɔɔ lɔfat liloko. 6Uwoop-a-bɔtɔɔm wa ɔnaangnɛ kɛnaang gaang gaang kɔbɛtɛmɛ, ɔkɔɔmbong ɛtɔk ɔsanga lutini isak a kɛnaang ’sɔng baang. 7Affik kɔlɔɔk kwa nlɔɔknɛ mung asan attɛ Uyini vvenɛ ɔnaangwɔ appyeekwɛ ɔkkpɛlɛ. 8Akke Jesus Christ wa ufungalanɛ ka lubbe, ule ɔlɔɔt a kikkwu a David, tɛ̀ttɛ̀ balɔɔknɛ ka Kuttu-Budoddo kwa nkopolonɛ. 9Nyɛn akama bassɛɛnnɛ ikpɔkɔlɔ ka labɔɔk tɛ̀ttɛ̀ ɔzzɔɔk-a-kɔlɔɔk ka nbwɔɔlɔnɛ Kuttu-Budoddo Ɔlɔɔmɔlɔɔm. Ɔzzánga lɛmmwɔɔl Ɔlɔɔmɔlɔɔm ka ikpɔkɔlɔ ba lile. 10Kwakkwɛ baang nbbɔnɛ akama ɔkkpɛlɛ nzzenge-luzzi balɔɔt Ɔlɔɔmɔlɔɔm nkwaaning abbɛ ɔgbaa bayanga kuddu kwa kussinɛ ka labɔɔk a Christ Jesus, la iyyɛɛp ya kɛfal a kɛfal. 11Uwɔng ulenɛ kɔlɔɔk a lɔkkwɔɔn: “Ilenɛ libbe la ammɛ, nzang vvenɛ issɛ iddu la ammɛ ɔgbaa. 12Ibbɔnɛ akama tɔttɔt, vvenɛ issɛ iyanga lakke ikɔɔm ɛfɛɛn la ammɛ. Ikalamɛnɛ, vvenɛ ɔssɛ ɔkalayɛlɛ ayyɔɔt. 13Ayyɔɔt isinɛ balɔɔt ba doddo lile, Ammɛ ule ɔlɔɔt wa doddo gbisii, ka ule usi likkwoong ɔkalamɛ kɛyɔɔng.” 14Akke balɔɔt annɔ ’kwɔng, attamabɛ doddo ka lusso Ɔlɔɔmɔlɔɔm attɛ bafɔngɔ babbu ikangala. Ikangala budoddo bulɔk ba inaang ɔgbaa la kɛbɛpɛ balɔɔt ba bagɔpɔlɔnɛyɛ. 15Kɔbɛtɛwɔ ayanga budoddo ka lusso Ɔlɔɔmɔlɔɔm tɛ̀ttɛ̀ ɔnaang-a-kɛnaang wa izzit isimɛnɛ lɛnaang ka kɛnaang ammɛ, ukopolo bɔtɔɔm Ɔlɔɔmɔlɔɔm bwa lɔkkwɔɔn. 16Tɛ̀ttɛ́ ale ka kutolo kwa kusinɛ kwa latele Ɔlɔɔmɔlɔɔm lile. Kɔggba balɔɔt kusseke Ɔlɔɔmɔlɔɔm. 17Kɛssanga kikopolo ’sɔng baang kɛtaa tɛ̀ttɛ̀ bɔssɔp bwa budɔlɔnɛ busseke ppwool. Balɔɔt ba bálenɛ kɛssanga bɛfɛɛn ’byɔng likopolo balenɛ Hymenaeus la Philetus. 18Bakkyaabong kɛ́ssɛ ka ɛtɔk a lɔkkwɔɔn a kɔlɔɔk bafɔngɔ basseke ka banaangnɛ ittina balɔɔt ba bayanganɛ kiyila ibbɔl, ka battɛnɛ kifungala ayyɔɔt ka lubbe kɛggba lɛsak. 19Ɔzzànga akkɔkɔlɔm a lutte gwa Ɔlɔɔmɔlɔɔm ulenɛ litte ba bakkwoong bannyɛkɛgwɛ. Bakkpɔkbong lammwɔɔl ka libat a lutte ’gwɔng baang battɛ, “Ɔlɔɔmɔlɔɔm ɔsan mung balɔɔt ba balenɛ ba ammɛ. Ɔlɔɔt duu wa ɔttɛnɛ ammɛ wa Uyini, ɔkkyaa babbu linaang ɔfɔngɔ.” 20Bɛssanga bɛkkpala la ilɔlɔ bile ggbadam ka ggwoon gwa lɛbaang. Bɛlɔk banaangbyɛ la silver, bɛlɔk la gold, bɛlɔk banaangbyɛ la kɛssɛ. Bɛlɔk la kɛbat igbele. Bɛlɔk bakɔɔmbyɛ ka kɛtɔm-a-lɛtɔm, bɛlɔk bakɔɔmbyɛ gbɔɔgbɔɔgbɔɔ. 21Ɔlɔɔt ɔlɔk ɔkɔɔmmɛnɛ kɛyɔɔng usseke bɛfɛɛn bya bisinɛ lɛyyɛɛp vvenɛ Ɔlɔɔmɔlɔɔm ɔkɔɔmmɛ ɔnaang kɛnaang sa lɔkkwɔɔn ka ulemɛnɛ kɛyɔɔng lɛsam unnyi abassɛ ammɛ. Ɔbamamɛbong kɛyɔɔng ɔkat kɛnaang a kɛnaang sa doddo. 22Tɛ̀ttɛ́ akup ikkɔlɔ kɛkkpa annyɔɔng. Kɔbɛtɛwɔ ka kwa kɔsaapnɛ Ɔlɔɔmɔlɔɔm, ɔbɛtɛ la kiyila, la kɛsaap. Ataa ka bɔkaat la balɔɔt ba balenɛ la ippyam ya doddo, bale Uyini lɛkkwɔɔ battɛ ɔkkalabɛ. 23Tɛ̀ttɛ́ akup babbu ikangala ya bizingizingi. Asan lɔsan attɛ bile bikpeke ka kɔwɔlɔ. 24Bɔɔyi Uyini, kɔwɔlɔ ba ɔwɔlɔ. Uggwoom kɔlɔɔk la balɔɔt ɔkkpɛlɛ, ule ukopolo-lukopolo wa ɔyyɛɛpnɛ, ɔppwa luppyam. 25Ule ɔlɔɔt wa ɔkɔɔmnɛ luppyam gwa doddo ɔyɔɔ balɔɔt a kɔfɔk, ɛtɔk ya bbwak. Usinɛkkyam Ɔlɔɔmɔlɔɔm vvenɛ unnyibɛ kufuk kwa kɛkkyaa kɛnaang a bubbi kɛfɔngɔ, bappyɛlɛ baffu bakup lɔkkwɔɔn a kɔlɔɔk. 26vvenɛ bappyɛlɛ basan kɔlɔɔk batta ka ɔnnya Ubbu, wa ulenɛbɛ lɛkaa ɔnaangbɛ bayila kummɛ.

will be added

X\