2 TIMOTHY 1

1Lɛmmwɔɔl ’zɔng lissi ka anaam Paul wa kɔsaapnɛ Ɔlɔɔmɔlɔɔm ɔ́naangnɛ ɔttɛ nzzanga Uyilabɔtɔɔm a Christ Jesus, ɔ̀tɔ́ɔmmɛ ɔttɛ nffu nbwɔɔlɔ kɔlɔɔk a kuddu kwa ɔggbanɛ lɛlɔɔk usekele ɔttɛ iyangakwɛ ka itaanɛ ka bɔkaat la Christ Jesus. 2Timothy, waan anaam ka luppyam, Dedde Ebinukkpaapi la Christ Jesus, Uyini ayyɔɔt, banaangwɔ ppyɛɛ, abbebɛ lɛttɔ, bannyiwɔ bɔkaat. 3Nwomo Ɔlɔɔmɔlɔɔm wa nzɔɔmnɛ nnyimɛ la luppyam gwa doddo kɛnaang tɛ̀ttɛ̀ balɔɔt anaam ba iyɛddɛ iyɛddɛ banaangnɛ. Nwomomɛ kɛnaang ka nzɔɔmnɛ nssɛɛnwɔ ka luzɔɔm anaam ɛkɛtɛ ɔkkpɛlɛ, kikoon gɔɔ kɛtɔm. 4Nkkebong liyeen annɔ, nggyan nttɛ nyɛnwɔ gaang gaang nkwaaning nyanga laggele ka luppyam. 5Nkke kwa kiyila annɔ sa lɔkkwɔɔn, ka ayanganɛ kɛssanga kiyila sa Lois, ssakawɔ wa ɔgɛlɛnya, la Eunice, ssakawɔ wa ɔmaatwɔnɛ, bayanganɛ. Nsan lɔsan annɔ assɛ mung ayangasɛ ɔgbaa. 6Ka ’kwɔng mung nkkewɔ nttɛ aloko lɛsɔɔk za Ɔlɔɔmɔlɔɔm unnyiwɔnɛ ka ɛkɛtɛ ya ntelewɔnɛ labɔɔk anaam ka kkwɔɔt doddo. 7Kuyeeng kwa Ɔlɔɔmɔlɔɔm unnyinɛyɛlɛ ba kɔnaangyɛlɛ ibbwɔpɔ, lutini ’gwɔng kunnyiyɛlɛ kɛkkaam a luppyam la kɛsaap, la kɛyyɛɛp a luppyam. 8Izzit tɛ̀ttɛ́ inaangwɔ kibee attɛɛsɛ Uyini ayyɔɔt, ɔlɔk vvenɛ izzit inaangwɔ kwa anaam, ɔlɔɔt igbakkɔpɔ ammɛ. Lutini ’gwɔng ayɛn akama ggwaat-ggwaat ka kufoom kwa annɔ ka kɔlɔɔk a Kuttu-Budoddo Ɔlɔɔmɔlɔɔm ka ulewɔnɛ lakke linnyi kwa akkwɛ. 9Ɔkkalayɛlɛ, ɔkkwɔɔyɛlɛ ɔttɛ izzanga balɔɔt ammɛ biini, ka kwa ilenɛ lɛnaang lissi, ɔzzanga ka kwa luttina ammɛ biini gwa ɔyanganɛ ɔttɛ vvenɛ ɔnaangyɛlɛ ppyɛɛ. Ɔ̀tɔɔm Christ Jesus ppyɛɛ ’wɔng mung bong tɛ́ttɛ́ ɔlɔɔm ɛkpansi. 10Ɔzzanga gedegede mung Ɔlɔɔmɔlɔɔm ɔyɔɔbongyɛlɛkwɛ ka kiffu sa Jesus, ɔkkala ikkala ayyɔɔt, uffunɛ. Ɔwwɔɔlbong lubbe, iyɛn kuddu kwa kɛfal a kɛfal ka kuttu budoddo Ɔlɔɔmɔlɔɔm kwa ulenɛyɛlɛ lɛbwɔɔlɔ. 11Ɔlɔɔmɔlɔɔm ɔsanganɛbong ɔttɛ nbwɔɔlɔ Kuttu-Budoddo ammɛ tɛ̀ttɛ̀ uyilabɔtɔɔm la ukopolo-lukopolo. 12Kwakkwɛ mung nyɛnnɛ akama ka lilɔɔk ’sɔng mung. Ɔzzanga ntii baang la luttina anaam bbwak, ka nsannɛ ɔlɔɔt wa nlokonɛ luttina anaam ka ammɛ. Nsan lɔsan nttɛ vvenɛ uloko bwa ulenɛnɛ linnyi ka budoddo tɔttɔt ɔffɔ ka Kɛtɔm ’sɔng baang. 13Akɔɔm lɛmmwɔɔl za nkopolowɔnɛ kkpɔk, tɛ̀ttɛ̀ iyɔɔ ya ale akup. Ataa ka kiyila la kɛsaap. Abbyɛ bilenɛ bɛfɛɛn ayyɔɔt ka bɔkaat la Christ Jesus. 14Aloko bɛfɛɛn bya lakke Kuyeeng-Ɔlɔɔmɔlɔɔm za lalenɛyɛlɛ ka tɔkɔlɔ lannyiwɔnɛ doddo. 15Asan lɔsan attɛ ɔlɔɔt la vvɔn ka ɛkpansi Asia bammabong bakɔngɔnɛ gbaak la Phygelus la Hermogenes. 16Nkkpenge Uyini nttɛ ɔyɔɔ itutum a Onesiphorus kibbe-lɛttɔ ka ɔnaangnɛnɛ nggele bikkpit ggbadam, izzit isimɛ lɛnaang ka nlenɛ ɔlɔɔt igbakkɔpɔ. 17Ɔ́ffɔ́nɛ̀ Rome ɛffɔ ɛffɔ uttenɛ kɛggyan eseese ɔddɔkɔddɔkɔ ɔyɛnnɛ. 18Numa ubbe Uyini lɛttɔ ka Kɛtɔm ’sɔng baang. Asan lɔsan ka lɔkkwɔɔn tɛ̀ttɛ̀ ɔkɔɔmnɛnɛ ka Ephesus.

will be added

X\