2 THESSALONIANS 3

1Ka kitele lɛttɔ, ikpana anaam, iggyan ittɛ azɔɔm assɛɛnyɔngyɛlɛ nkwaaning lɛmmwɔɔl Uyini lɛkama-ɔkama lɛwaala likelike lɛtɔk lakke tɛ̀ttɛ̀ annyɔɔng atɔknɛyɔng. 2Assɛ azɔɔm attɛyɔng Ɔlɔɔmɔlɔɔm ɔkkalayɛlɛ ka labɔɔk a babbyap. Balɔɔt ɔkkpɛlɛ lissi bayilanɛ bɔtɔɔm bwa ibwɔɔlɔnɛ. 3Uyini, ɔlɔɔt wa doddo, vvenɛ ɔnaangwɔyɔng akkaamyɔng, ɔkkalawɔyɔng ka labɔɔk a Ɔnaang-a-bubbi. 4Uyini unnyibongyɛlɛ kibbe luppyam ka annyɔɔng. Isan lɔsan ittɛ ale baang ka anaangnɛyɔng tɛ̀ttɛ̀ ikopolowɔnɛyɔng. 5Uyini usikiliwɔyɔng ippyam ɔfɔngɔ ka kusapa Ɔlɔɔmɔlɔɔm la kɛbbɔ akama sa Christ unnyinɛ. 6Ka lakke Uyini ayyɔɔt, Jesus Christ, ibwɔɔlɔwɔyɔng ittɛ agbata assekeyɔng ikpana ayyɔɔt ɔkkpɛlɛ ya inaangnɛ bɔkɔɔt isi lɔttama ayyɔɔt lippyee. 7Annyɔɔng biini asanyɔng lɔsan attɛyɔng kɔyyɛɛp ka anaangnɛyɔng tɛ̀ttɛ̀ ayyɔɔt inaangnɛ. Bɔkɔɔt ffet ka kɔlɔɔk isi lɛnaang ka idɔkɔnɛ la annyɔɔng. 8Isi ɔlɔɔt lɛfɔngɔ ɔyaamyɛlɛ ggbɔɔ isimɛ lɛssɛ iyaam. Lutini ’gwɔng inaang kɛnaang kikoon la kɛtɔm ittɛ nkwaaning asiyɔng akama lɛyɛn, wa kikkpeleyɛlɛ. 9Ning isi lɛnaang ka ɔ̀zzánganɛ ɔttɛ lakke ba iyanga za kɛbap a kɛyaam ka labɔɔk annyɔɔng. Inaang ittɛ iyɔɔwɔyɔng usseke akeetyɔngyɛlɛ. 10Ka idɔkɔnɛ la annyɔɔng, ibwɔɔlɔwɔyɔng ittɛ, “Ɔlɔɔt duu wa usinɛ lɛggyan ɔttɛ ɔnaang kɛnaang, tɛ̀ttɛ́ uzzi kazzi.” 11Ilɔɔk ’kwɔng ka ippyeenɛ battɛ balɔɔt balɔk bale baang la annyɔɔng ba bakongonɛ lukongo bakkpɛlɛ basi lɛggyan battɛ banaang kɛnaang. Bulɔk ba banaang basan kɛbbaka ka kɔlɔɔk ɔlɔɔt baggyan bwa bassɔpnɛ bassɛɛn ka kamma. 12Ka lakke Uyini ayyɔɔt, Jesus Christ, ibwɔɔlɔwɔyɔng ittɛ attamayɔng balɔɔt ’bɔng baang. Bakɔɔm lafal abbɛ doddo banaang kɛnaang bakɔɔmbɛ kɛyɔɔng. 13Ɔzzànga annyɔɔng ikpana ayyɔɔt, tɛ̀ttɛ́ bɔkɔɔt bunaangwɔyɔng ka kɛnaang a budoddo. 14Ɔlɔɔt úle ulè baang ka bɛzzɔkɔ annyɔɔng wa usinɛ bɔtɔɔm bwa itɔɔmnɛ ifeewɔyɔng ka lɛmmwɔɔl ’zɔng mung litele. Ulenɛ baang, azzɔɔkmɛyɔng zzeen. Tɛ̀ttɛ́ aleyɔng ka kɔlɔɔk la ammɛ ɔkkɔɔnɛ izzit inaangmɛ. 15Ɔzzanga tɛ̀ttɛ́ anaangmɛyɔng tɛ̀ttɛ̀ ɔlɔɔt a kɔfɔk annyɔɔng. Lutini ’gwɔng, attamamɛyɔng lɔttama ka ulenɛ ɔkpana annyɔɔng. 16Numa Uyini, wa bɔkaat bussinɛ ka ammɛ, unnyiwɔyɔng bɔkaat ɛkɛtɛ ɔkkpɛlɛ ka itɔk ɔkkpɛlɛ. Uyini ubee la annyɔɔng ɔkkpɛlɛ. 17Anaam Paul nkɔɔmnɛ kɔbɔɔk anaam nkkpɔk ’kwɔng: Nwomowɔyɔngbong ɔkkpɛlɛ. Uwɔng ulenɛ tɛ̀ttɛ̀ nbɛtɛnɛ kɛnnɔ ka lammwɔɔl ɔkkpɛlɛ za ntɔɔmnɛ. Uwɔng ulenɛ tɛ̀ttɛ̀ nkkpɔknɛ. 18Numa ppyɛɛ Uyini ayyɔɔt, Jesus Christ, ule la annyɔɔng ɔkkpɛlɛ.

will be added

X\