1 Kɔlɔɔk ’kwɔng kutum kiffu Uyini ayyɔɔt, Jesus, la kiduda ayyɔɔt ɛfɛɛn kkwɔn la ammɛ. 2 Nkkpengewɔyɔng lukkpenge, ikpana anaam, tɛ̀ttɛ́ afɔngɔyɔng ɔlɔɔt ɔlɔk ɔfɛɛtwɔyɔng ɔlɔk banaang ippyam izzawɔyɔng ka bale bakkala lalaak battɛ Kɛtɔm-Uyini kiffubong. Usinɛkkyam ɔlɔɔt ’wɔng baang ɔyɛn ka biyɛnɛ ɔlɔk ɔlɔɔk ka kɛbwɔɔlɔ lɛmmwɔɔl Ɔlɔɔmɔlɔɔm, ɔlɔk vvenɛ bale battɛ ayyɔɔt ikkpɔknɛ ka lɛmmwɔɔl za itɔɔmnɛ. 3 Tɛ̀ttɛ́ afɔngɔyɔng ɔlɔɔt ɔlɔk ɔfɛɛtwɔyɔng ka ɛtɔk ɛlɔk. Kɛtɔm ’sɔng baang baala kiffu ɔddɔkɔddɔkɔ kullu kwa lakpeke kɔttɔ. Ɔbbyap vvenɛ ɔtta ka vveeng ufula ka lɔkɔɔn. 4 Ɔbbyap ’wɔng baang vvenɛ ufim bɛfɛɛn Ɔlɔɔmɔlɔɔm bya balɔɔt batelenɛ la bya battinanɛ battɛ bɛyyɛɛpɔyyɛɛp. Vvenɛ ɔtɔkmɛ kɛyɔɔng ka buzzilɛttɔ abbyɛ ɔkkpɛlɛ. Gɔɔ vvenɛ umii ɔtaa ka Labun Ɔlɔɔmɔlɔɔm ɔkkala lalaak ɔttɛ ammɛ ulenɛ Ɔlɔɔmɔlɔɔm. 5 Ba abɛlɛyɔng likke ka nbwɔɔlɔwɔnɛyɔng ’byɔng mung ɔkkpɛlɛ ka ɛkɛtɛ ndɔkɔnɛ la annyɔɔng ɔɔ? 6 Ɔzzànga bɔfɛɛn bule baang bwa businɛ liyila ’kwɔng kɔnaang ka gedegede mung. Asanyɔng mung ɔkkpɛlɛ bwa bulenɛ. Ɛkɛtɛ ɛffɔnɛ ya bbwak, Ɔbbyap vvenɛ ɔtta ka vveeng. 7 Ibbyap ukunukunu itii baang ka kɛnaang. Ɔzzànga kwa kule ka kɔnaangnɛ baala kɔnaang ɔddɔkɔddɔkɔ basam ɔlɔɔt wa ɔbwɔɔpnɛkwɛ uloko ɔttɛ tɛ̀ttɛ́ kɔnaang bagbata ka ɛtɔk. 8 Tɛ̀ttɛ̀ bɔk Ɔbbyap ɔtta ka vveeng, Jesus, Uyini vvenɛ ɔkɔɔm lɛfɛkɛlɛ kamma ammɛ ɔwwɔɔlmɛ. Kiffu Uyini vvenɛ kisusukumɛ ɔkkpɛlɛ. 9 Ɔbbyap vvenɛ ɔtta ka vveeng uffu ɔnaang bɛmaanga la bɛfɛɛn a bikɛɛlɛ ka lakke a Satan ka kɛkkaala lɛlaak. 10 Vvenɛ ɔkɔɔm lutini ibbyap ɔkkpɛlɛ ɔfɛɛt balɔɔt bɔng baang ba bale bataak. Bale bataak ka basinɛ lɔkkwɔɔn a kɔlɔɔk lɛtɔk ka kɛsaap, nkwaaning baddu. 11 Ka ’kwɔng mung, Ɔlɔɔmɔlɔɔm ɔtɔɔm lakke za kisi kɔlɔɔk lɛsan ufeebɛ nkwaaning batɔk kwa kulenɛ lɛlaak gbisii. 12 Kitele lɛttɔ kile kɛttɛ balɔɔt ɔkkpɛlɛ ba basinɛ lɔkkwɔɔn a kɔlɔɔk liyila, bale ibbyap lɛkɔɔm battele kippe, vvenɛ babbe. 13 Iwomo Ɔlɔɔmɔlɔɔm kɛnaang ɛkɛtɛ ɔkkpɛlɛ innyiwɔyɔng ikpana ayyɔɔt, ba asaapnɛyɔng Uyini. Ɔlɔɔmɔlɔɔm ɔsangawɔyɔnbong annyɔɔng aleyɔng ba ule utte lɛkkala. Ɔnaangwɔyɔngbong balɔɔt ka lakke Kuyeeng ammɛ ɔbɛtɛ la kiyila sa ayanganɛyɔng ka lɔkkwɔɔn a kɔlɔɔk. 14 Ɔlɔɔmɔlɔɔm ɔkkwɔɔwɔyɔng la Kuttu-Budoddo kwa ibwɔɔlɔwɔnɛyɔng. Ɔkkwɔɔwɔyɔng ɔttɛ affu atɔkyɔng etini lakke annyɔɔng ka Uyini, Jesus Christ. 15 Ikpana anaam abeeyɔng kkpɔk. Akɔɔmyɔng lɔkkwɔɔn a kɔlɔɔk gwa ikopolowɔnɛyɔng ka lɛmmwɔɔl Ɔlɔɔmɔlɔɔm ka kamma. Akɔɔmyɔng lɛmmwɔɔl za ikkpɔknɛ ifeewɔyɔng kkpɔk. 16 Uyini ayyɔɔt, Jesus Christ, la Dedde ayyɔɔt, Ɔlɔɔmɔlɔɔm, biini wa isaapmɛnɛ bibbemɛ-lɛttɔ unnyiyɛlɛ kɛkkaam a luppyam la luttina gwa doddo gwa kɛfal a kɛfal. 17 Ɔssɛɛnwɔyɔng kɛkkaam a luppyam ka ippyam kɛttala ɔnaangwɔyɔng akkaamyɔng anaangyɔng kwa kɔyyɛɛpnɛ, alɔɔkyɔng kwa kɔyyɛɛpnɛ ɔgbaa.
