2 THESSALONIANS 1

1Anaam Paul La Silas la Timothy ikkpɔknɛ lɛmmwɔɔl ’zɔng mung ifeewɔyɔng annyɔɔng balɔɔt a luzɔɔm Ɔlɔɔmɔlɔɔm ka Thessalonica ba alenɛyɔng ba Dedde ayyɔɔt, Ɔlɔɔmɔlɔɔm, la Jesus Christ, Uyini. 2Dedde ayyɔɔt, Ɔlɔɔmɔlɔɔm, la Uyini ayyɔɔt, Jesus Christ, banaangwɔyɔng ppyɛɛ, bannyiwɔyɔng bɔkaat. 3Ikpana ayyɔɔt, iwomo Ɔlɔɔmɔlɔɔm kɛnaang ɛkɛtɛ ɔkkpɛlɛ ka kɔlɔɔk annyɔɔng. Kuleyɛlɛ bbwak ka inaangnɛ ning baang ka kiyila annyɔɔng kilenɛ baang ka kɛmmalanɛ la kɛtɔm la kɛtɔm. Ɔgbaa kɛsaap sa ɔlɔɔt vvɔn ɔyanganɛ la wabbɛ kile baang ka kiggbengenɛ kiffu. 4Kwakkwɛ baang inaangnɛ kamma kwa annyɔɔng ba izɔɔm Ɔlɔɔmɔlɔɔm. Inaang kamma ka atiinɛyɔng baang ka ataanɛyɔng la kiyila la akama ɔkkpɛlɛ wa alenɛyɔng lɛyɛn, la kɛwwɔɔl sa bawwɔɔlnɛ balɔɔt ba bayilanɛ kwa Uyini. 5Mung ulenɛ iyɔɔ bɔllɛ kɛkaal Ɔlɔɔmɔlɔɔm. Kule kussi ka akkwɛ mung ale yɔng ba bbwak ka Itutum-Ɔlɔɔmɔlɔɔm ya ayɛnnɛyɔng akama kwa annyɛ. 6Ɔlɔɔmɔlɔɔm vvenɛ ɔnaang kwa bbwak. Vvenɛ ɔkɔɔm akama ufee balɔɔt ’bɔng baang ba banaangwɔnɛyɔng ayɛnyɔng akama, 7Ɔzzánga vvenɛ ɔkkalawɔyɔng annyɔɔng ba ayɛnnɛyɔng akama. Vvenɛ ɔssɛ ɔkkalayɛlɛ ayyɔɔt ɔgbaa. Ule ɔnaang ’kwɔng ka ɛkɛtɛ ya Jesus Christ ule ussi ka libat uffu la Bayilabɔtɔɔm ammɛ ba lɛbaang. 8Vvenɛ uffu la lalaak-a-lɔkɔɔn ɔyɔɔ balɔɔt ba basinɛ Ɔlɔɔmɔlɔɔm lɛsan akama la balɔɔt ba basinɛ Kuttu-Budoddo Jesus, Uyini, litele. 9Vvenɛ bayɛn akama kɛbɛpɛ sa kɛfal a kɛfal. Vvenɛ bagbata ka ɛfɛɛn Uyini la lakke ammɛ. 10Ka ule uffu ka Kɛtɔm ’sɔng baang, vvenɛ ɔtɔk latele ka labɔɔk a balɔɔt ba bayilanɛ kwa ammɛ. Annyɔɔng ɔgbaa ale assɛ aleyɔng baang la abbɛ, ka alenɛyɔng liyila kwa bɔtɔɔm bwa ibwɔɔlɔwɔnɛyɔng. 11Kwakkwɛ izɔɔmnɛ ɛkɛtɛ ɔkkpɛlɛ innyiwɔyɔng, ibap Ɔlɔɔmɔlɔɔm ayyɔɔt ittɛ unnyiwɔyɔng kuddu kwa doddo kwa ɔkkwɔɔwɔnɛyɔng ɔttɛ ataayɔng la ammɛ. Numa ɔkɔɔm lakke ammɛ ɔnaangwɔyɔng ayɛnyɔng budoddo duu bwa akkɔlɔnɛyɔng usseke avveyɔng kɛnaang a kiyila annyɔɔng. 12Nkwaaning lɛkɔɔl Uyini ayyɔɔt Jesus lɛtɔk latele ka annyɔɔng. Annyɔɔng assɛ atɔkyɔng latele ka lakke a ppyɛɛ Ɔlɔɔmɔlɔɔm ayyɔɔt la Jesus Christ, Uyini.

will be added

X\