2 PETER 3

1Inngwa anaam, ’wɔng mung ulenɛ lɛmmwɔɔl za nbbalwɔnɛyɔng lɛkkpɔk. Ka lammwɔɔl ɔkkpɛlɛ azzɛ laffa, nbumbong nttɛ nzang nssɛɛnwɔyɔng ittina ya bbwak ka ippyam annyɔɔng ka nkkewɔnɛyɔng kwa bɛfɛɛn ’byɔng mung. 2Nggyan nttɛ akkeyɔng lammwɔɔl za Bappyee-kutolo Ɔlɔɔmɔlɔɔm ba doddo baggbanɛ lɛlɔɔk bakang mmɛmmɛ, la lɔdda gwa lussinɛ ka Uyini la Ɔkkala-ikkala wa bayilabɔtɔɔm annyɔɔng badɔkɔnɛ bannyiwɔyɔng. 3Ka kɛkɔɔm ɛtɔk ɔkkpɛlɛ, vvenɛ asan attɛyɔng balɔɔt balɔk ba lafal abbɛ lale lakup kuwɔnɔk abbɛ vvenɛ batta ka vveeng ka kɛtɔm-a-lakpeke. Vvenɛ bakpɛnwɔyɔng 4battɛ, “Usekele ɔttɛ vvenɛ uffu, ning usi lisekele ɔɔ? Ngkka ule yang? Idedde ayyɔɔt baggba libbe bakang, ɔzzànga bɛfɛɛn ɔkkpɛlɛ bitii kɛssanga ssɔn, tɛ̀ttɛ̀ ussinɛ ɔnaang ɛkpansi!” 5Bakongo lukongo bafim lɔkkwɔɔn gwa Ɔlɔɔmɔlɔɔm ɔggbanɛ lɛlɔɔk, ɔzzànga ɔnaang libat la ɛkpansi. Ɛkpansi ɔdɔkɔ ɔlɔɔmyɛ la bannyi, ka bannyi. 6Kɔdɔkɔ ka bannyi ɔgbaa, bannyi ɛlɔlɔ, ba babɛpɛnɛ ɛkpansi ya iyɛddɛ iyɛddɛ. 7Ɔzzànga libat la ɛkpansi ya elenɛ lulenɛ gedegede mung, lɛmmwɔɔl Ɔlɔɔmɔlɔɔm lɛkɔɔmnɛ ka kɛbɛpɛyɛ la lɔkɔɔn. Basambongbɛ baloko ka kɛtɔm sa bale bakaal kɛkaal a balɔɔt ba basinɛ ba Ɔlɔɔmɔlɔɔm lile. Basambɛ bawwɔɔl. 8Inngwa luppyam anaam, tɛ̀ttɛ́ asumalayɔng bɔfɛɛn bwɔng mung bbwɔn! kwa kulenɛ zzekep ba kule ka lusso Uyini ka kɛtɔm ssɔn gɔɔ ka innɔ likkpa. Innɔ likkpa ulemɛ kɛtɔm ssɔn. Ka ammɛ bɛfɛɛn ’byɔng mung bɛffa bile kɛssanga ssɔn. 9Uyini bɛtɛbɛtɛ ba ɔnaang ka kwa ulenɛ lisekele ɔttɛ vvenɛ ɔnaang, tɛ̀ttɛ̀ balɔɔt balɔk battinanɛ. Lutini ’gwɔng ɔyanga kibbe-luppyam la annyɔɔng ka usinɛ lɛggyan ɔttɛ ɔbɛpɛ ɔlɔɔt vvɔn gbɔɔ ɔggyan ɔttɛ bakkyaa bubbi abbɛ bafɔngɔ. 10Kɛtɔm Uyini kile kiffu tɛ̀ttɛ̀ ussip. Kɛtɔm ’sɔng baang libat likkyaap la lɔsap gwa lɛbaang, bɛfɛɛn bya bilenɛ ka libat vvenɛ bɛkkɔm bɛbɛpɛ. Ɛkpansi la bɛfɛɛn ɔkkpɛlɛ bya bilenɛ ka tɔkɔlɔ annyɛ vvenɛ bɛkkyaap. 11Bɛfɛɛn ’byɔng mung bilenɛ ka bɛbɛpɛnɛ ning mung, annyɔɔng ale aleyɔng bɔka kɛssanga balɔɔt? Lafal annyɔɔng lale za Ɔlɔɔmɔlɔɔm, asamwɔyɔng kɛyɔɔng annyiyɔng Ɔlɔɔmɔlɔɔm ɔgbaa. 12Tɛ̀ttɛ̀ ataanɛyɔng akatyɔng Kɛtɔm-Ɔlɔɔmɔlɔɔm abumyɔng likke lɛsaal ɔkkɔɔnɛ kɛkka liffu. Assɛ kilenɛ sa libat lile likkɔm libɛpɛ, bɛfɛɛn bya bilenɛ ka libat vvenɛ bɛyɛtɛ ka kɛfɔɔp. 13Ɔzzànga itaa ikat kwa Ɔlɔɔmɔlɔɔm ulenɛ lisekele. Ufaa libat la ufaa ɛkpansi, ka ɛfɛɛn a lilɔɔk sa bbwak lile lile ka ssala. 14Inngwa anaam, tɛ̀ttɛ̀ ataanɛ akatyɔng Kɛtɔm ’sɔng baang, abum ataayɔng kpaladada ka tɔkɔlɔ annyɔɔng ka lusso Ɔlɔɔmɔlɔɔm, asɛlɛyɔng kɔlɔɔk kwa azzinɛyɔng bubbi nkwaaning ataayɔng ka bɔkaat la ammɛ. 15Appyɛɛkyɔng kibbe luppyam Uyini ayyɔɔt tɛ̀ttɛ̀ kufuk kwa ulewɔnɛyɔng linnyi ɔttɛ ayangayɔng ikkala. Tɛ̀ttɛ̀ ɔkpana ayyɔɔt Paul ulewɔnɛyɔng lɛkkpɔk, ka ɔkɔɔmnɛ kɛsana kɔlɔɔk sa Ɔlɔɔmɔlɔɔm ulemɛnɛ linnyi. 16Nkwɔng kulenɛ kwa ɔlɔɔknɛ ka lammwɔɔl ammɛ ɔkkpɛlɛ, ka ɛkɛtɛ ɔkkpɔknɛ utum lilɔɔk ’sɔng mung. Bɛfɛɛn bɛlɔk bile baang bya bikoolonɛ ka lammwɔɔl ammɛ. Bɛfɛɛn bɛlɔk bile baang bya balɔɔt ba basinɛbyɛ lɛsan, la balɔɔt ba basinɛ luppyam libbe, basinɛbyɛ bbwak lɛbwɔɔlɔ, tɛ̀ttɛ̀ banaangnɛ ka kufoom kɔlɔk ka luvva Ɔlɔɔmɔlɔɔm. Ɔzzànga ning baang bakɔɔmbong kɛbɛpɛ sa abbɛ biini bafeebɛ kɛyɔɔng. 17Inngwa anaam, ɔzzànga annyɔɔng aggbayɔng ’kwɔng lɛsan. Akatwɔyɔng kɛyɔɔng, nkwaaning balɔɔt ba basinɛ lafɔɔ litele basiwɔyɔng lɛnaang attɔyɔng, vvenɛ agbata assekeyɔng ɛfɛɛn a alenɛyɔng ka kuddu. 18Ɔkkaamwɔyɔng ammalayɔng ka lakke la kɛsan a kɔlɔɔk Uyini ayyɔɔt, Ɔkkala-ikkala ayyɔɔt, Jesus Christ. Lakke lataa la ammɛ gedegede mung ka kɛfal a kɛfal, kulening.

will be added

X\