2 PETER 2

1Bakkala-lɛlaak ba battɛnɛ abbɛ bappyee-kutolo Ɔlɔɔmɔlɔɔm batuma ka ɛkɛtɛ iyɛddɛ iyɛddɛ ka bɛzzɔkɔ annyɔɔng, kùlé kúlè kɛssanga ssɔn; bakkala-lɛlaak bakopolo-ukopolo vvenɛ batuma ka ɛfɛɛn annyɔɔng. Vvenɛ bakɔɔm kɛbɛpɛ baffu, la lukopolo gwa lusinɛ ka lɔkkwɔɔn lile. Vvenɛ bakala Ɔlɔɔt wa ɔkkalanɛbɛ, basambɛ kɛyɔɔng bassɛɛn ka kɛbɛpɛ sa kitipili. 2Balɔɔt ggbadam vvenɛ bakup itɔk ya ibbɔlnɛ, ka linaang sa banaangnɛ, balɔɔt balɔk vvenɛ balɔɔk bubbi batum lɔkkwɔɔn. 3Ittikkya ’yɔng baang bazzi isak ka ibala ya balɔɔt babalanɛ ka kuwɔnɔk abbɛ. Ɔmmɛbong ka Ɔkaal a kɛkaal ɔbamanɛ, Ɔlɔɔt wa ule ɔbɛpɛbɛ utii kwetkwet. 4Ɔlɔɔmɔlɔɔm usi bayilabɔtɔɔm ammɛ ba banaangnɛ bubbi lɛbɔngɔlɔ. Ɔsambɛ ɔssɛɛn ka lɔkɔɔn ka ɛfɛɛn a bassɛɛnnɛbɛ ikpɔkɔlɔ bataa baang ka kisul bakat Kɛtɔm-a-kɛkaal. 5Ɔlɔɔmɔlɔɔm usi ɛkpansi ya iyɛddɛ iyɛddɛ lɛbɔngɔlɔ. Ɔkɔɔm ɛlɔlɔ uffu ka ɛkpansi balɔɔt ba basinɛ ba Ɔlɔɔmɔlɔɔm lile. Ɔlɔɔt wa ɔbɔngɔlɔnɛ ɔdɔkɔ Noah wa ukopolonɛ kwa bbwak la balɔɔt balɔk bannambakkyaat. 6Ɔlɔɔmɔlɔɔm ɔbɛpɛ laffɛ Sodom la Gomorrah la lɔkɔɔn. Ɔyɔɔ kwa kule kɔnaang la balɔɔt ba basinɛ ba Ɔlɔɔmɔlɔɔm lile. 7Ɔkkala Lot, ɔlɔɔt wa doddo, wa balɔɔt ba babbyapnɛ basi lafɔɔ litele banaangnɛ kɔlɔɔk kwa kusimɛnɛ lɛsaap. 8Ɔlɔɔt wa doddo ’wɔng baang ɔtaa baang ka bɛzzɔkɔ abbɛ, la kɛtɔm la kɛtɔm ɔyɛn, ɔkɔɔm uppyee bɛfɛɛn bya luppyam gwa doddo lusinɛ lɛggyan. 9Ɔlɔɔmɔlɔɔm ɔsan lɔsan tɛ̀ttɛ̀ ɔkkalanɛ balɔɔt ammɛ ka lubum abbɛ, ɔsan tɛ̀ttɛ̀ ulokonɛ balɔɔt ba babbɔlnɛ bɛnaang ka akama tɔttɔt ɔffɔ ka Kɛtɔm-a-kɛkaal. 10Kpongkpong balɔɔt ba bakupnɛ kwa kkwɔɔt abbɛ, banaang bubbi bakpɛn lakke Ɔlɔɔmɔlɔɔm. Bakkala-lalaak ittikkya ’yɔng baang banaang biggboggbo la kɛkkaam a luppyam, latele ba bayanga ka lakke za libat, lutini ’gwɔng bakpɛnbɛ lɔkpɛn. 11Gɔɔ bayilabɔtɔɔm ba bakkaamnɛ baggbenge-uggbenge batta ittikkya yɔng mung, basibɛ kibbi linnyi, ɔlɔk banaangbɛ bɛfɛɛn izzit ka lusso Uyini. 12Balɔɔt ’bɔng mung basɛlɛ luttina, tɛ̀ttɛ̀ isɛɛn a kɛmat ya bamaatnɛ battɛ ikaa iwwɔɔl izzi. Bakpɛn bɛfɛɛn bya basinɛ lɛsan. Vvenɛ bawwɔɔlbɛ tɛ̀ttɛ̀ isɛɛn a kɛmat. 13Vvenɛ bapipilibɛ la akama ka baggyannɛ akama. Laggele za abbɛ lale ka banaangnɛ bɛfɛɛn bya kkwɔɔt abbɛ liggyannɛ ka kpelegedee. Bale ka izzit la bɛnnyɔɔka ka batulnɛ kazzi la annyɔɔng, baggele ka babbu lalaak abbɛ. 14Bulɔk ba bappyɛɛk ɔgbaa la bwanavva ba bassɛnɛ kɛzak. Kusapa kɛnaang a bubbi bɛ kɔsaal. Bakɔɔm balɔɔt ba kiyila abbɛ kisinɛbɛ lɛkkaam bamii battɔ ka ɔnnya. Ippyam abbɛ iwɔnɔ-wɔnɔ. Ɔlɔɔmɔlɔɔm ɔbbaatbongbɛ. 15Bagbatabong ɛtɔk ya zzip bakɔngɔ bamii bassɛɛp ɛtɔk ya Balaam, waan a Bosor, ukupnɛ, wa ikkpoko ya ɔyanganɛ ka kɛnaang a bubbi isaapmɛnɛ. 16Ɔlɔɔmɔlɔɔm ɔwɔlɔmɛ ka bubbi ammɛ. Eyim ya esinɛ kɛlɔɔk likkwoong ɛlɔɔk ka lɛmmwɔɔl ɔlɔɔt etunu bizingizingi ɔlɔɔt ’wɔng baang wa ɔttɛnɛ ammɛ uppyee-kutolo Ɔlɔɔmɔlɔɔm. 17Balɔɔt ’bɔng mung bale tɛ̀ttɛ̀ issa ya ilenɛ lɛkaan, bale tɛ̀ttɛ̀ ikkpala ya kɛffa sa lɛbaang kɛffanɛyɛ. Ɔlɔɔmɔlɔɔm ulokobongbɛ ɛfɛɛn ka kisul sa lɛbaang a lɛbaang. 18Ɔkkyaabɛ la babbu lammwɔɔl, bakɔɔm babbu ibbyap a kkwɔɔt abbɛ bakaa balɔɔt ba babumnɛ kɛmma kɛgbata ka bɛzzɔkɔ balɔɔt ba basinɛ bbwak lɛnaang. 19Banaangbong nsekele battɛ, vvenɛ bakkalabɛ ka bubbi abbɛ, uvve abbɛ biini kang bappyɛɛ bale babili kɛbɛpɛ ka ileme abbɛ. Ɔlɔɔt ule ubili bɔfɛɛn duu bwa buttamɛnɛ lakke. 20Balɔɔt balenɛ lɛtta ka ibbyap ɛkpansi ka kɛsan sa basannɛ Uyini ayyɔɔt, Jesus Christ, ba babbalnɛbɛ lɛkaa bannyi balɔɔt ’bɔng baang vvenɛ bayɛn akama ka lakpeke batta tɛ̀ttɛ̀ bayɛnnɛ ka lutte. 21Kɔdɔkɔ kɔtta lɛyyɛɛp ka basinɛ kwa bbwak lɛsan nakanaka, lutini basannɛ bappyɛɛ bassang basikili basi lɔttama gwa doddo gwa bannyinɛbɛ lɛtɔk. 22Kwa kɔnaangnɛbɛ kɔyɔɔbong kɔttɛ ifɛɛt ya bassanɛ ile ka lɔkkwɔɔn, “Ɛbbwa ɛppyɛlɛ emii ka bɔfɛɛn bwa ɛkkwɔɔknɛ.” “Ɔkkumma wa balemɛnɛ lɛzzaa ɔppyɛlɛ umii umini ka kɛbat ɔlak.”

will be added

X\