2 PETER 1

1Lɛmmwɔɔl ’zɔng lissi ka Simon Peter, Uyilabɔtɔɔm la bɔɔyi a Jesus Christ, ɔtɔɔm ufee balɔɔt ba budoddo Ɔlɔɔmɔlɔɔm la ɔkkala ikkala ayyɔɔt Jesus Christ, bunnyinɛbɛ kiyila sa lɔkkwɔɔn tɛ̀ttɛ̀ sa ayyɔɔt. 2Latele la bɔkaat bɛtaa la annyɔɔng ka ussinɛ ka kɛsan sa asannɛyɔng Ɔlɔɔmɔlɔɔm la Jesus, Uyini ayyɔɔt. 3Lakke ɔlɔɔmɔlɔɔm lannyibongyɛlɛ utini bɛfɛɛn ɔkkpɛlɛ bya iggyannɛ ittɛ ikɔɔm iddu tɛ̀ttɛ̀ Ɔlɔɔmɔlɔɔm ɔggyannɛ ka ussinɛ ka kɛsan sa isannɛ ɔlɔɔt wa ɔttɛnɛ itul latele ammɛ, la budoddo ammɛ. 4Ka ɛtɔk ’yɔng unnyibongyɛlɛ lɛsɔɔk za lɛbaang a lɛbaang za lɔkkwɔɔn za ɔggbanɛ lisekele, nkwaaning ka ussinɛ ka lɛsɔɔk ’zɔng baang amma akɔngɔyɔng kɛbɛpɛ la ibbyap ya ilenɛ ka vveeng, amii atulyɔng kɛfal Ɔlɔɔmɔlɔɔm. 5Ka ’kwɔng, abum anaangyɔng budoddo agbaayɔng la kiyila annyɔɔng. Agbaayɔng bisana ka budoddo annyɔɔng. 6Abum ayangayɔng kɛkat a kɛyɔɔng agbaayɔng la bisana annyɔɔng. Abum ayangayɔng kibbe-luppyam agbaayɔng la kɛkat a kɛyɔɔng. Abum ataayɔng tɛ̀ttɛ̀ balɔɔt Ɔlɔɔmɔlɔɔm agbaayɔng la kibbe-luppyam. 7Abum ayangayɔng kɛsaap sa bukpana tɛ̀ttɛ̀ balɔɔt Ɔlɔɔmɔlɔɔm. Ayangayɔng kɛsaap Ɔlɔɔmɔlɔɔm agbaayɔng la kɛsaap sa bukpana. 8Uwɔng ulenɛ ileme ya buyanganɛyɔng. Ayanganɛyɔngyɛ ggbadam vvenɛ inaangwɔyɔng akkaamyɔng akkwoongyɔng kɛnaang ka bisana annyɔɔng pya bitumnɛ Uyini ayyɔɔt, Jesus Christ. 9Ɔlɔɔt duu wa usinɛbyɛ lɛyanga nzang fulu fulu ba ɔyɛn, usseke ssup ussi ifim. Usumalabong Jesus Christ wa ɔkkpɔlɔmɛnɛ bubbi bwa ɔggbanɛ lɛnaang. 10Ikpana anaam, abumyɔng gaang gaang anaangyɔng kɛkkwɔɔ Ɔlɔɔmɔlɔɔm la kɛsanga sa ɔsangawɔnɛyɔng kile kɔlɔɔk kwa alenɛyɔng lɛsan. Anaangnɛyɔng ning mung, isimi-simi baala appyɛlɛyɔng. 11Anaangnɛyɔng ning, vvenɛ ayangayɔng lakke za bbwak, za kɛmal ka Itutum-Uyini, Ɔkkala-ikkala ayyɔɔt, Jesus Christ, ya kɛfal a kɛfal. 12Kwakkwɛ baang nkkewɔnɛyɔng ɛkɛtɛ ɔkkpɛlɛ ka lilɔɔk ’sɔng baang mkkpa aleyɔngsɛ lɛsan, bilewɔyɔng, ka ippyam lile ka assɛɛnnɛyɔng ka lɔkkwɔɔn a kɔlɔɔk gwa alenɛyɔng lɛtɔk. 13Nttina nttɛ kulenɛ bbwak ka nfeelewɔnɛyɔng ittina ka lilɔɔk ’sɔng mung ka ntiinɛ ikokolo. 14Nsan lɔsan nttɛ usseke ssup nzzɔɔk kkwɔɔt ’sɔng mung sa lile libbe tɛ̀ttɛ̀ Uyini ayyɔɔt, Jesus Christ, ulenɛ lɛbwɔɔlɔ pwool. 15Vvenɛ nbum nnaang ɛtɔk nlokowɔyɔng ya ale akkeyɔng lilɔɔk ’sɔng mung ɛkɛtɛ ɔkkpɛlɛ ka nle nle libbe. 16Ba kɔtaka kɔbɛtɛyɛlɛ kwa lissa ka ibwɔɔlɔwɔnɛyɔng uggboggbo kiffu Uyini ayyɔɔt, Jesus Christ. Iyɛn lakke ammɛ ka zzeen ayyɔɔt biini. 17Idɔkɔ baang ka Dedde Ɔlɔɔmɔlɔɔm unnyimɛnɛ lakke la latele. Ippyee ka lɛmmwɔɔl lissinɛ ka ammɛ Ɔlɔɔmɔlɔɔm wa ɔyanganɛ lakke za lɛbaang lɛttɛ, “Uwɔng ulenɛ waan a luppyam anaam, ɔsaapnɛ gaang gaang.” 18Ayyɔɔt biini ippyee lɛmmwɔɔl ’zɔng baang ka lissinɛ ka libat liffu ka ɛkɛtɛ ya idɔkɔnɛ la ammɛ ka libat a lɛttaal a budoddo. 19Ɔbbalyɛlɛ ssik lɛnaang ka bɔtɔɔm bwa bappyee-kutolo-Ɔlɔɔmɔlɔɔm babwɔɔlɔnɛ. Kɔyyɛɛp mung ka ale agɔpɔlɔyɔngkwɛ doddo. Kɔ̀táa tɛ̀ttɛ̀ otinika wa uppwolonɛ ka kisul ɔddɔkɔddɔkɔ ussolo. Buppwolo Ubbele-ettuma buppwolo buvvoongwɔyɔng ka ippyam. 20Kwa kɔttanɛ ɔkkpɛlɛ, akke attɛyɔng ɔbwɔɔlɔ kɔlɔɔk ɔlɔɔt wa ukkwoongnɛ ubee kɛyɔɔng ɔbwɔɔlɔ kwa bappyee-kutolo Ɔlɔɔmɔlɔɔm bakkpɔknɛ ba ule. 21Lɛmmwɔɔl a Bappyee-kutolo ɔlɔɔmɔlɔɔm za lissinɛ ka lakke ɔlɔɔt ba lile. Balɔɔt ka balɔɔknɛ kɔlɔɔk Ɔlɔɔmɔlɔɔm, Kuyeeng-Ɔlɔɔmɔlɔɔm kunnyinɛbɛ lakke.

will be added

X\