2 CORINTHIANS 9

1Gɔɔ ba nbɛlɛ lɛggyan nttɛ nkkpɔk ntum kɛyaam sa bayaamnɛ balɔɔt a luzɔɔm ka Judaea. 2Nsan lɔsan nttɛ annyɔɔng attinanɛyɔng kɛyaam a balɔɔt. Nnaangbong kamma la balɔɔt a Macedonia ntumwɔyɔng. Nttɛ “Ikpana ayyɔɔt ya ilenɛ ka Greece, baggba luttina lɛnaang lummwemmwem gwa kɛyaam a balɔɔt” Lubum annyɔɔng lufungalabong balɔɔt ggbadam. 3Nle ka ntɔɔmnɛ ikpana ayyɔɔt ’yɔng mung baffa nkwaaning kamma kwa inaangnɛ itumwɔyɔng ka kɔlɔɔk ’kwɔng mung kasi gbɔɔ lɛttɔ kataak. Ɔzzánga kulenɛ tɛ̀ttɛ̀ nlɔɔknɛ, vvenɛ abamayɔng bwa ale akɔɔm ayaamyɔngbɛ akatyɔng. 4Nzang balɔɔt a Macedonia baffunɛ la anaam basan battɛ ba ataka abamayɔng, vvenɛ izzit inaangyɔngyɛlɛ gaang gaang, ka balenɛ littina gaang gaang kwa annyɔɔng. 5Nttina nttɛ kɔyyɛɛp ka nddanɛ ikpana ayyɔɔt bakɔɔm bassɛ bakɔngɔnɛ bamii babama lɛsɔɔk za attɛnɛ vvenɛ annyiyɔngbɛ baloko eseese. Ɔkkɔɔnɛ ɛkɛtɛ nkyaalanɛ, abamayɔngbong ɔkkpɛlɛ alokoyɔng. Ning baang vvenɛ ikɔɔlɔ ittɛ annyiyɔng ka kussiwɔnɛyɔng ka luppyam, kɛttɛ annyiyɔng ka battɛnɛ annyiyɔng lissi. 6Akkeyɔng ’kwɔng tɛ! Ɔlɔɔt wa uwoopnɛ waan a bɔtɔɔm ssup, ule ɔyaat ssup. Ɔlɔɔt wa uwoopnɛ uggboggbo ule ɔyaat uggboggbo. 7Ɔlɔɔt la vvɔn unnyi tɛ̀ttɛ̀ luttina lɔtɔɔmmɛnɛ. Ɔfɔngɔ la akama kinnyi, uttina ɔttɛ baang kɛnaang ammɛ lissi. Ɔlɔɔt wa unnyinɛ bɔfɛɛn ka bɔwaa ɔsaapnɛ Ɔlɔɔmɔlɔɔm. 8Ɔlɔɔmɔlɔɔm ukkwoong mung unnyiwɔ ɔsak tɛ̀ttɛ̀ aggyannɛ, nkwaaning ɛkɛtɛ ɔkkpɛlɛ ayanga bwa aggyannɛ kɛyɔɔng, gɔɔ ayanga asak ka kɔlɔɔk duu kwa anaangnɛ kɔyyɛɛp. 9Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Uggwoom a kɔlɔɔk unnyi balɔɔt ba ɔbbɔlnɛbɛ bɛfɛɛn ka luppyam gwa doddo. Kiggwoom a kɔlɔɔk ammɛ kittumu kɛfal a kɛfal.” 10Ɔlɔɔmɔlɔɔm wa unnyinɛ ɔkɔɔn ikɔnɔ-kɔnɔ ifɔɔk a bɛfɛɛn la kazzi, vvenɛ ɔssɛ unnyiwɔyɔng ifɔɔk a bɛfɛɛn ɔkkpɛlɛ ya aggyannɛyɔng, ɔnaangyɛ immala, usseke ayaatyɔng liyaat littala ka kiggwoom a kɔlɔɔk annyɔɔng. 11Vvenɛ ɔnaangwɔyɔng ɔyyɛɛpwɔyɔng ɛkɛtɛ ɔkkpɛlɛ ka kɛyyɛɛp a kɛnaang annyɔɔng nkwaaning balɔɔt ggbadam bawomo Ɔlɔɔmɔlɔɔm kɛnaang ka lɛsɔɔk annyɔɔng za batɔknɛ ka ayyɔɔt. 12Kɛnaang sa anaangnɛyɔng mung, ba kinnyi bwa balɔɔt Ɔlɔɔmɔlɔɔm baggyannɛ keem, ɔgbaa kɛdɛmbong nzɔɔn-kɛnaang ule wa Ɔlɔɔmɔlɔɔm ɛkɛtɛ ɔkkpɛlɛ. 13Ka iyɔɔ ya kɛnaang annyɔɔng mung, balɔɔt ggbadam vvenɛ batele Ɔlɔɔmɔlɔɔm ka kikopolo kuttu budoddo Christ kwa akopolonɛyɔng la kiggwoom a kɔlɔɔk annyɔɔng la balɔɔt balɔk ɔkkpɛlɛ. 14Vvenɛ bazɔɔm bannyiwɔyɔng ka kɛsaap ka lakke za Ɔlɔɔmɔlɔɔm ɔyɔɔwɔnɛyɔng. 15Iwomoyɔng Ɔlɔɔmɔlɔɔm kɛnaang ka lɛsɔɔk za ɔsɔɔknɛyɛlɛ.

will be added

X\