2 CORINTHIANS 8

1Ikpana ayyɔɔt, iggyan ittɛ asanyɔng bwa lakke Ɔlɔɔmɔlɔɔm lalenɛ lɛnaang ka izɔɔm ya ilenɛ ka Macedonia. 2Ɔlɔɔmɔlɔɔm ɔllɛbongbɛ gaang gaang la akama wa balenɛ lɛyɛn. Ɔzzànga mkkpa ndɔk ɔbbɔlbɛ, bayanga laggele gaang gaag, baggwoom kɔlɔɔk basak. 3Nbwɔɔlɔwɔyɔng nttɛ bànnyi bɛfɛɛn tɛ̀ttɛ̀ bakkwoongnɛ. Gɔɔ bannyi basak tɛ̀ttɛ̀ bukkwoongnɛ. 4Bakkpengeyɛlɛ bapiiti battɛ bassɛ bayanga kufuk kwa kittele balɔɔt Ɔlɔɔmɔlɔɔm ba balenɛ ka Judea. 5Banaang batta kwa ayyɔɔt buttinanɛ. Ka ikeeng, basambɛ kɛyɔɔng bannyi Uyini. Ɔttɛ ɔnaang, ka kɔsaapnɛ Ɔlɔɔmɔlɔɔm, basambɛ kɛyɔɔng bannyiyɛlɛ ayyɔɔt ɔgbaa. 6Ɔzzánga issɛɛn Titus wa uttenɛ kɛnaang ’sɔng ittɛ ɔkkaammɛ la assɛ usseke uttelewɔyɔng avveyɔng kɛnaang a kɛsaap ’sɔng. 7Ɔyyɛɛpwɔyɔng gaang gaang ka bɛfɛɛn ɔkkpɛlɛ bya ayanganɛyɔng ka kiyila: kɔlɔɔk a lɛmmwɔɔl, la bisana, ka luttina kɛyaam a balɔɔt, la kɛsaap sa isaapwɔnɛyɔng. Ɔzzànga iggyan ittɛ aggwoomyɔng kɔlɔɔk agbaayɔng la kɛsaap ’sɔng. 8Lafɔɔ lissi ka innyiwɔnɛyɔng. Ɔzzànga iyɔɔwɔyɔng tɛ̀ttɛ̀ balɔɔt balɔk baggyannɛ kɛyaam a ba abbɛ. Nggyan nttɛ nsan, kɛsaap annyɔɔng kilenɛ sa bbwak ka lɔkkwɔɔn. 9Asanyɔng lɔsan kɛsaap sa Jesus Christ ɔyanganɛ. Tɛ̀ttɛ̀ ɔdɔkɔnɛ uggbenge baang, ɔnaangmɛ kɛyɔɔng usseke ukee-waan ka lɛttɔ ayyɔɔt. Ɔggyan ɔttɛ akɔɔmyɔng ibbɔl ammɛ ɔyyɛɛpwɔyɔng. 10Uwɔng ulenɛ luttina gwa anaam nttinanɛ ntum kɔlɔɔk ’kwɔng mung: Kɔtta lɛyyɛɛp ka avvenɛyɔng gedegede mung bwa atteneyɔng lummwemmwem. Annyɔɔng akɔɔmnɛyɔng ɛtɔk, ka linaang keem lissi, ɔgbaa la luttina kɛnaang a kɛnaang gwa attinanɛyɔng. 11Ɔkkaamwɔyɔng la assɛ. Avveyɔngsɛ. Assɛɛnyɔng luttina kivvesɛ, tɛ̀ttɛ̀ attinanɛyɔng kɛnaangsɛ. Anaangyɔngsɛ la bɔfɛɛn duu bwa ayanganɛyɔng. 12Asɔɔknɛyɔng tɛ̀ttɛ̀ ayanganɛyɔng, Ɔlɔɔmɔlɔɔm vvenɛ ɔtɔk lɛsɔɔk annyɔɔng. Bwa asinɛyɔng lɛyanga ba ɔggyan. 13- 14Ba nggyan nttɛ ayɛnyɔng akama ka kɛyaam a balɔɔt balɔk. Ɔzzànga ka ayanganɛyɔng bɛfɛɛn ggbadam, kɔyyɛɛp ka attelenɛyɔng balɔɔt ba basinɛ lɛyanga. Ɛkɛtɛ busɛlɛwɔnɛyɔng annyɔɔng, abbɛ bayanganɛ vvenɛ bassɛ bayaamwɔyɔng. Anaangnɛyɔng ning baang, ɔlɔɔt wa ule ubunu wabbɛ uzzi baala ule. 15Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɔlɔɔt wa ɔyanganɛ ggbadam baala ɔyanga ɔsak. Ɔlɔɔt wa ɔyanganɛ ssup baala ɔyanga bussup busak. 16Iwomo Ɔlɔɔmɔlɔɔm kɛnaang, ka ɔnaangnɛ Titus ubum tɛ̀ttɛ̀ ayyɔɔt ibumnɛ ittɛ iyaamwɔyɔng! 17Kwa ayyɔɔt ibapnɛ keem lissi ka ɔtɔknɛ, ɔdɔkɔ ubum gaang gaang ɔttɛ ɔyaam balɔɔt ka luttina gwa ammɛ biini, kwakkwɛ ɔnaangnɛ littina gwa kiffu ka ɛfɛɛn annyɔɔng. 18Ile ka itɔɔmnɛ ɔkpana ayyɔɔt wa ɔyanganɛ latele gaang gaang ka kɛnaang a kikopolo kuttu-budoddo Ɔlɔɔmɔlɔɔm bakkuma la Titus baffu. 19Ɔgbaa basangamɛbong ka izɔɔm ɔkkpɛlɛ battɛ ɔssɛ la ayyɔɔt ka ilenɛ baang ka inaangnɛ kɛnaang a kɛsaap ka latele Uyini iyɔɔ ittɛ iggyan kittele balɔɔt. 20Itɔɔmbong ɔlɔɔt ’wɔng mung uffu nkwaaning ɔlɔɔt ɔlɔk usi lɔzzɔ lɛssɛ ka kɛkɔɔm sa ile ka ikɔɔmnɛ lɛsɔɔk ’zɔng mung. 21Bwa ittinanɛ kɛnaang ka ippyam ayyɔɔt ittina kɛnaang kwa bbwak. Ka lusso Uyini keem lissi ka iggyannɛ kɛnaang kwa bbwak, iggyan kɛnaang kwa bbwak ka lusso ɔssɛbibit ɔgbaa. 22Ile ka itɔɔmnɛ ɔkpana ayyɔɔt ɔssɛ la abbɛ uffu. Illɛmɛbong bikkpit ggbadam, iyɛn ka kɛyaam a balɔɔt kɛsaapmɛnɛ. Ɔyanga luttina gaang gaang ka annyɔɔng, ule ka ubumnɛ kɛyaamwɔyɔng ɛkɛtɛ ɔkkpɛlɛ. 23Ulenɛ kwa Titus, ammɛ ulenɛ ɔlɔɔt a kɔssɛ anaam. Ɔnaang kɛnaang la anaam ɔttɛ uttelewɔyɔng. Kwa ikpana ayyɔɔt ilɔk ba bassɛnɛ la ammɛ, abbɛ batɔknɛ lɛttɔ izɔɔm ɔkkpɛlɛ bakɔɔm latele bafee Christ. 24Ayɔɔyɔngbɛ kɛsaap annyɔɔng, nkwaaning izɔɔm ɔkkpɛlɛ isan ittɛ ile bbwak ka inaangnɛ kamma itumwɔyɔng.

will be added

X\