2 CORINTHIANS 7

1Inngwa anaam, nsekele ’wɔng mung ɔkkpɛlɛ Ebinukkpaapi ɛnaang ennyiyɛlɛ ayyɔɔt. Ikkyaa bɛfɛɛn ɔkkpɛlɛ bya bɛnaangnɛ kkwɔɔt ɔlɔɔt la lɛfal ammɛ bɛbbɔl ifɔngɔ. Ɔlɔɔmɔlɔɔm ɔbwɔɔlɔyɛlɛ ɔttɛ ikkyaa kɛnaang a bubbi ifɔngɔ. 2Assɛɛnyɔngyɛlɛ ka ippyam annyɔɔng. Kɔlɔɔk kwa kɔbbɔlnɛ la ɔlɔɔt ɔlɔk ba itaka inaang. Ɔlɔɔt ɔlɔk ba itaka ittina kɛwwɔɔl gɔɔ vvenɛ inaang ɔlɔɔt bɛbɛtɛ. 3Nsi lɛlɔɔk ’kwɔng nttɛ nkkpɛnwɔyɔng. Tɛ̀ttɛ̀ nlenɛ lɛlɔɔk kkpal, aleyɔngyɛlɛ ka luppyam gaang gaang ka ilenɛyɔng ɛfɛɛn nnyɔn ɛkɛtɛ ɔkkpɛlɛ, mkkpa iddu-uddu ɔlɔk ibbe-ubbe. 4Luppyam kwa annyɔɔng nɛ ba lɔzza. Ɔwaanɛ kwa annyɔɔng ka lilɔɔk ayyɔɔt ɔkkpɛlɛ. Ntii baang ka nkkaamnɛ luppyam. Nggele gaang gaang. 5Gɔɔ ka iffɔnɛ Macedonia isi lɛfɛkɛlɛ. Ɔdɔkɔ lilɔɔk a lilɔɔk ka ɛfɛɛn ɔkkpɛlɛ. Balɔɔt balɔk bakɔɔm bawɔlɔ. Ɔbbwɔpɔyɛlɛ. 6Ɔzzànga Ɔlɔɔmɔlɔɔm wa ɔnaangnɛ balɔɔt bakkaam luppyam, ɔnaangyɛlɛ ikkaam luppyam la kiffu a Titus. 7Kiffu ammɛ keem lissi. Ibwɔɔlɔ ya attelemɛnɛyɔng inaangnɛyɛlɛ ikkaam luppyam igbaa. Ɔbwɔɔlɔyɛlɛ tɛ̀ttɛ̀ aggyannɛ attɛ ayɛnyɔngyɛlɛ gaang gaang, tɛ̀ttɛ̀ akama ɔnaangwɔyɔng ka isinɛ liffu, tɛ̀ttɛ̀ alenɛyɔng libum attɛ akkalanɛyɔng, nggelebong gaang gaang. 8Gɔɔ mkkpa leta anaam ɔnaangwɔyɔng bukee, akama nɛ ba ɔnaang, anaam nkkpɔknɛ. Nzang bukee bunaangnɛ ka ɛkɛtɛ ya nyɛnnɛ ka leta anaam ɔnaangwɔnɛyɔng bukee ka ɛkɛtɛ ssup. 9Gedegede mung nggelebong. Ba nggele ka nnaangnɛ bukee bunaangwɔyɔng. Nggele ka bukee annyɔɔng bunaangwɔnɛyɔng afooloyɔng linaang. Ɔlɔɔmɔlɔɔm ɔkɔɔmnɛ bukee ’bwɔng baang uffu. Kɔlɔɔk kɔlɔk kwa bbɔlbbɔl isiwɔyɔng lɛnaang. 10Bukee bwa bussinɛ ka Ɔlɔɔmɔlɔɔm bufoolo luppyam ɔlɔɔt, bunaangwɔ assɛ ka ɛtɔk a kuddu. Busannɛ baang ba bule. Bukee a vveengodde bunnyinɛ lubbe. 11Ayɛnyɔng tɛ̀ttɛ̀ Ɔlɔɔmɔlɔɔm ɔnaangnɛ la bukee annyɔɔng. Bunaangwɔyɔngbong kɔbɛtɛwɔyɔng. Bunaangwɔyɔngbong ayɔɔyɔng kisi-lɛsan annyɔɔng. Akama ’wɔng baang, ittina ’yɔng baang, luzɔɔm ’gwɔng baang, la ibama ’yɔng baang ya kɛyɔɔ banaang a bubbi akama. Ayɔɔyɔngbongyɛlɛ attɛyɔng kibbi ba ataka azziyɔng ka kɔlɔɔk ’kwɔng baang ɔkkpɛlɛ. 12Ka nkkpɔknɛ leta ’wɔng, nsi lɛkkpɔk kwa ɔlɔɔt wa usinɛ doddo lɛnaang, ɔlɔk ka kwa ɔlɔɔt wa banaangmɛnɛ bbɔlbbɔl. Nkkpɔk nttɛ kɔnaangwɔyɔng ppwool ka lusso Ɔlɔɔmɔlɔɔm, asanyɔng tɛ̀ttɛ̀ kɔbɛtɛwɔnɛyɔng kwa ayyɔɔt. 13Kwakkwɛ baang iyanganɛ kɛkkaam a luppyam. Kwa kɛkaam a luppyam keem lissi. Ɔgbaa Titus ɔnaangnɛyɛlɛ iggele la ammɛ ka ɔkkpɛlɛ annyɔɔng aggelemɛnɛyɔng. 14Nbbabong lɔbba ntumwɔyɔng nbwɔɔlɔmɛ. Ɔzzánga nɛ ba ataka afɛɛtyɔng. Ilɔɔk lɔkkwɔɔn a kɔlɔɔk ɛkɛtɛ ɔkkpɛlɛ la annyɔɔng. Kule kɛssanga ssɔn, lɔbba gwa nbbanɛ la Titus lulebong ka lɔkkwɔɔn. 15Kɛsaap sa asaapmɛnɛyɔng kɛmmala gaang gaang la bɔkkaam ɛkɛtɛ duu ya ukkenɛ tɛ̀ttɛ̀ ɔkkpɛlɛ annyɔɔng alenɛyɔng lɛbama kitelemɛ. Atɔkmɛyɔng assɛɛnyɔng ka kkwɔɔt la kiffula. 16Nggele gaang gaang ɛkɛtɛ ɔkkpɛlɛ. Luppyam lɔkkaamnɛ kwa annyɔɔng.

will be added

X\