2 CORINTHIANS 6

1Ka ilenɛyɔng ka kɛnaang la Ebinukkpaapi, ikkpengewɔyɔng ittɛ ka alenɛyɔng lɛsɔɔk Ebinukkpaapi lɛtɔk, tɛ̀ttɛ́ asamyɔngzɛ abɛpɛyɔng. 2Appyeeyɔng kwa Ebinukkpaapi ɛlɔɔknɛ ɛttɛ, “Ɛkɛtɛ ɛffɔnɛ ya nle ka nyɔɔwɔnɛ kibbe-lɛttɔ nppyee nzɔɔm annɔ; Kɛtɔm sa nle nkkwɔɔwɔ kissolonɛ, vvenɛ nttelewɔ.” Gɔpɔlɔyɔng! Uwɔng ulenɛ ɛkɛtɛ ya kibbe-lɛttɔ Ɔlɔɔmɔlɔɔm. Mmwɔɔn ulenɛ kɛtɔm sa ule ɔkkalawɔyɔng. 3Ba iggyan ittɛ inaang kɔlɔɔk kwa ɔlɔɔt ɔkkpɛlɛ ule ɔttɛ ba kɔyyɛɛp. Ɔgbaa, ayyɔɔt ɔgbangala ka ɛtɔk ɔlɔɔt baala iloko. 4Lutini ’gwɔng iyɔɔ ittɛ ayyɔɔt bwɔɔn Ebinukkpaapi. Ibbe luppyam ka kɛyɛn akama ka kippyee bukoolo, la bɛssanga lilɔɔk ɔkkpɛlɛ. 5Batupbongyɛlɛ, bassɛɛnyɛlɛ igbakkɔpɔ. Banaangyɛlɛ bɛfɛɛn izzit. Inaang kɛnaang ɛkɛtɛ ɔkkpɛlɛ gbaak kɛtɔm. Ɛkɛtɛ ba iyanga ya ilaanɛ bilaa ɔlɔk izzi kazzi. 6Luppyam ayyɔɔt ka lulenɛ ppwool la kɛsan a kɔlɔɔk, la kibbe luppyam la kiggwoom a kɔlɔɔk, iyɔɔwɔyɔngbong ittɛ ayyɔɔt bwɔɔn Ebinukkpaapi ka likke kuyeeng Ɔlɔɔmɔlɔɔm, ɔbɛtɛ la kɛsaap ayyɔɔt sa lɔkkwɔɔn, 7la lakke ibwɔɔlɔ lɔkkwɔɔn a kɔlɔɔk ya ibwɔɔlɔnɛ, ɔbɛtɛ la lakke Ebinukkpaapi. Kisi bubbi lɛyanga kilenɛ bɛfɛɛn a lɛkɔɔng ayyɔɔt bya ikɔɔmnɛ illu kullu ikatyɛlɛ kɛyɔɔng. 8Bateleyɛlɛ, banaangyɛlɛ bɛfɛɛn izzit bagbaa. Babbaatyɛlɛ, babunguyɛlɛ bagbaa. Batɔkyɛlɛ tɛ̀ttɛ̀ bakkaal-a-lalaak ɔzzànga ile baang ka ilɔɔknɛ lɔkkwɔɔn a kɔlɔɔk. 9Battɛ yɛlɛ ba basan, ɔzzànga basanbongyɛlɛ ɔkkpɛlɛ. Battɛ ibbebong, ɔzzànga mung ile baang ka kuddu. Bayɔɔyɛlɛ akama, ɔzzànga yɛlɛ ba bawwɔɔl. 10Mkkpa banaangyɛlɛ kwa livve lɛbbɔlnɛyɛlɛ, iggele tɔttɔt. Ippyɛɛk tɛ̀ttɛ̀ balɔɔt ba ɔbbɔlnɛbɛ, ɔzzànga inaang balɔɔt ppwap ɔyyɛɛpbɛ. Ɔtaa tɛ̀ttɛ̀ isɛlɛnɛ bulɔk, ɔzzànga ippyɛɛ iyanga bɛfɛɛn ɔkkpɛlɛ. 11Inngwa anaam ya luppyam ka Corinth. Ilɔɔkbong ppwool ibwɔɔlɔwɔyɔng. Iwongolobong ippyam ayyɔɔt ppwool, innyiwɔyɔng. 12Ittina ayyɔɔt ba itaka isam issekewɔyɔng. Annyɔɔng asamnɛyɔng ittina annyɔɔng assekeyɔngyɛlɛ ayyɔɔt. 13Gedegede mung, nlɔɔk tɛ̀ttɛ̀ alenɛyɔng bwaan anaam. Ayɔɔyɔngyɛlɛ kɛssanga luttina ’sɔng baang sa ayyɔɔt ittinanɛ itumwɔyɔng annyɔɔng. Awongoloyɔng ippyam annyɔɔng ppwool annyiyɔngyɛlɛ. 14Tɛ̀ttɛ́ abum attɛ atul anaangyɔng kɛnaang la balɔɔt ba basɛlɛnɛ kiyila tɛ̀ttɛ̀ alenɛyɔng ikɛlɛlɛ. Ning baang ba kule. Budoddo la bubbi bile bɛnaang nang bɛtaa ka bɔkaat? Buppwolo la kisul bile bɛnaang nang bɛtaa ɛfɛɛn kkwɔn? 15Christ la Ɔnaang-a-kɛsɛɛm a kuyeeng bale banaang nang bakaat? Mung ɔsɛlɛ-kiyila la ɔyanga-kiyila bale kɛssanga ssɔn ɔɔ? 16Ggwoon-Ɔlɔɔmɔlɔɔm lule lɔnaang nang lɔtaa ɛfɛɛn kkwɔn la ilɔɔp-ilat? Ayyɔɔt ilenɛ ggwoon Ɔlɔɔmɔlɔɔm gwa lɔyanganɛ kuddu, tɛ̀ttɛ̀ Ɔlɔɔmɔlɔɔm biini ɔlɔɔknɛ. Ɔttɛ, “Vvenɛ nnaang ssala anaam ka ɛfɛɛn a balɔɔt anaam, nllu baang la abbɛ. Anaam vvenɛ nle Ɔlɔɔmɔlɔɔm abbɛ, abbɛ bale balɔɔt anaam.” 17Ɔzzanga Ebinukkpaapi ya ɛyanganɛ lakke ɔkkpɛlɛ ɛttɛ, “Akkyaayɔngbɛ afɔngɔyɔng. Agbata assekeyɔngbɛ. Tɛ̀ttɛ́ akkɛtɛyɔng bɔfɛɛn bwa bubbɔlnɛ. Anaam vvenɛ ntɔkwɔyɔng. 18Anaam vvenɛ nle ssaawɔ annyɔɔng; annyɔɔng alenɛyɔng bwɔɔn anaam.”

will be added

X\