1 Isan lɔsan ittɛ ggwoon gwa illunɛ mung, (kkwɔɔt ayyɔɔt ka ɛkpansi ’yɔng mung) lulenɛ lɛttɔ, Ɔlɔɔmɔlɔɔm vvenɛ ɔyanga ggwoon ka libat unnyiyɛlɛ illu. Ssala sa ammɛ biini ɔnaangnɛ, sa lile littumu kɛfal a kɛfal. 2 Isinibong lifiki ka luttina gwa kɛyanga ssala ka libat sa Ɔlɔɔmɔlɔɔm ɔnaangnɛ ulokoyɛlɛ luggbengenɛyɛlɛ gaang gaang. 3 Ka uvvoongnɛyɛlɛ la assɛ, vvenɛ iyanga ufaa kkwɔɔt. 4 Ka illunɛ ka ɛkpansi ’yɔng mung, iffimi la luttina akama. Ɔzzanga isi lɛttɛ ile ka isamnɛ kkwɔɔt ayyɔɔt sa ɛkpansi ’yɔng mung izzɔɔk. Iggyan ittɛ ssala sa lissinɛ ka libat livvoongyɛlɛ, nkwaaning kuddu kɔmɛɛl bwa bule bubbe. 5 Ɔlɔɔmɔlɔɔm ulenɛ wa ulenɛyɛlɛ lɛbama ɔkat kifoolo ’sɔng mung. Unnyiyɛlɛ Kuyeeng ammɛ tɛ̀ttɛ̀ nlɔɔk-nloko wa ulenɛ lɛnaang la ayyɔɔt ɔttɛ vvenɛ iyanga lɛsɔɔk. 6 ƐKɛtɛ ɔkkpɛlɛ iyanga kɛkkaam a luppyam. Isan lɔsan ittɛ ka itaanɛ ka ssala kkwɔɔt ’sɔng mung, ning baang igbatabong ikɔngɔ ssala Uyini. 7 Kuddu ayyɔɔt kule ka kiyila. Ka kɛyɛn ka zzeen lissi. 8 Iyanga kɛkkaam a luppyam gaang gaang. Kule kɔttayɛlɛ lɛsaap ka ile igbata ssala ayyɔɔt ikɔngɔ ka kkwɔɔt ’sɔng mung imii itaa ka ssala Uyini. 9 Kwa kɔttanɛ bɛfɛɛn ɔkkpɛlɛ, iggyan ittɛ inaang kwa kule kɔsaap Uyini, mkkpa ile ka ssala ayyɔɔt mung ɔlɔk ka ssala Uyini. 10 Ɔkkpɛlɛ ayyɔɔt vvenɛ ibee ka lusso a Christ, ɔkaal kɛkaal ayyɔɔt. Ɔlɔɔt la vvɔn vvenɛ ɔtɔk bwa bulemɛnɛ bbwak ka kɔlɔɔk kwa ulenɛ lɛnaang ka kɛfal ammɛ mkkpa kɔyyɛɛp, kɔbbɔl. 11 Isan mung bwa ’kwɔng kulenɛ. Kule kɔttɛ Ɔlɔɔmɔlɔɔm ɔbbwɔpɔyɛlɛ lɔbbwɔpɔ. Kwakkwɛ baang ibumnɛ ittɛ balɔɔt bayanga kiyila. Ɔlɔɔmɔlɔɔm ɔsanyɛlɛ ɔkkpɛlɛ bbwak. Nttina nttɛ ka ippyam annyɔɔng assɛ mung asannɛyɔng anaam ɔgbaa. 12 Ba ibɛlɛ libum ittɛ isamyɛlɛ kɛyɔɔng ibbalwɔyɔng linnyi. Isseke ka ibumnɛ ittɛ ibwɔɔlɔwɔyɔng ifɛɛt ya ule ɔkkyaawɔyɔng kwa ayyɔɔt. Nkwaaning balɔɔt ba babungunɛ ɔlɔɔt lɛfal basimɛ eleme libungu balɔɔknɛ, akkwoong appyɛlɛyɔngbɛ kamma. 13 Mung ittɔbong bikun ka lɔkkwɔɔn ɔɔ? Ittɔnɛ bikun ittɔ ka lɛttɔ Ɔlɔɔmɔlɔɔm. Faa bikun ba itaka ittɔ. Itakanɛ lɛttɔ, itaka lɛttɔ kwa lɛttɔ annyɔɔng. 14 Kɛsaap sa isaapnɛ Christ kɛkɔɔmnɛyɛlɛ. Gedegede mung isanbong ittɛ ɔlɔɔt vvɔn ubbenɛ ka lɛttɔ balɔɔt ɔkkpɛlɛ, ning baang ulenɛ kɛttɛ, balɔɔt ɔkkpɛlɛ bayanga etini ka lubbe ammɛ. 15 Ubbe ka lɛttɔ balɔɔt ɔkkpɛlɛ nkwaaning balɔɔt ’bɔng baang ba balenɛ ka kuddu, basi kwa abbɛ kɛyɔɔng lɛbɛlɛ liddu. Bappyɛɛ baddu kwa ammɛ keem wa ubbenɛ, Ɔlɔɔmɔlɔɔm ufungalamɛ ɔtaa ka kuddu ka lɛttɔ abbɛ. 16 Lɔnngwa ɔssɛbibit ba ibɛlɛ lɛkɔɔm ikaal kɛkaal ɔlɔɔt ɔlɔk, mkkpa ndɔk ile kɛkaal a Christ lɛkaal la lɔnngwa ɔssɛbibit kpal. Ning baang ba ibɛlɛ lɛnaang ɛkɛtɛ ɛlɔk. 17 Ɔlɔɔt duu wa utoolomɛnɛ kɛyɔɔng la Christ utii ka ufaa kɛfal. Ɔtɔm a kɛfal umiibong, usseke ufaa kɛfal uffu. 18 Mbyɔng mung ɔkkpɛlɛ Ɔlɔɔmɔlɔɔm ɔnaangnɛ. Ɔkɔɔm Christ usikiliyɛlɛ isseke inngwa ammɛ, isi balɔɔt a kɔfɔk ammɛ lɛbɛlɛ lile. Unnyiyɛlɛ kɛnaang sa inaangnɛ balɔɔt balɔk bazzanga inngwa ammɛ ɔgbaa. 19 Bɔtɔɔm bwa ɔtɔɔmnɛyɛlɛ, ibwɔɔlɔ ittɛ Ɔlɔɔmɔlɔɔm ɔdɔkɔ ka kɛkɔɔm a Christ kɛnaang ɛnngwa la balɔɔt ɔkkpɛlɛ. Ɔlɔɔmɔlɔɔm usi bubbi abbɛ lɛbɛlɛ liffik. Ɔtɔɔmbongyɛlɛ ɔttɛ ibwɔɔlɔ tɛ̀ttɛ̀ ɔssɛnɛ ɛnngwa la abbɛ. 20 Mung ilɔɔk ikkala Christ, tɛ̀ttɛ̀ Ɔlɔɔmɔlɔɔm biini ulenɛ mung ka ɔssɛnɛ la ayyɔɔt ɔlɔɔk unnyiwɔyɔng. Ka lɛttɔ a Christ, ikkpengewɔyɔngbong ittɛ afɔngɔyɔng Ebinukkpaapi esikiliwɔyɔng ippyam afɔngɔyɔng balɔɔt a kɔfɔk Ɔlɔɔmɔlɔɔm lɛbɛlɛ lile, assekeyɔng inngwa ammɛ. 21 Christ usi bubbi lɛnaang. Ɔzzanga kɛ lɛttɔ ayyɔɔt, Ɔlɔɔmɔlɔɔm ɔnaangmɛ utul bubbi ayyɔɔt nkwaaning ka ilenɛ ka bɔkaat la ammɛ, itul budoddo Ɔlɔɔmɔlɔɔm itaa bbwak tɛ̀ttɛ̀ Ɔlɔɔmɔlɔɔm ɔggyannɛ.
