2 CORINTHIANS 4

1Ɔlɔɔmɔlɔɔm ka kibbe lɛttɔ ammɛ, unnyibongyɛlɛ kɛnaang ’sɔng, tɔkɔlɔ ɔfɔngɔyɛlɛ kɛbɛpɛ. 2Ikkyaa kɛnaang a bɛfɛɛn a lalup la bɛfɛɛn izzit ifɔngɔ. Kɔdɛm ba idɛm, ɔlɔk vvenɛ ikkala lɛlaak ka lɛmmwɔɔl Ɔlɔɔmɔlɔɔm. Itaa ka buppwolo lɔkkwɔɔn a kɔlɔɔk Ɔlɔɔmɔlɔɔm. Inaang kɔlɔɔk la duu iyɔɔ ɔlɔɔt la vvɔn, tɛ̀ttɛ̀ luttina ayyɔɔt lɔyyɛɛpnɛ ka lusso Ɔlɔɔmɔlɔɔm. 3Ulenɛ ka Kuttu-Budoddo Ɔlɔɔmɔlɔɔm kwa ikopolonɛ kusinɛ balɔɔt ka latɔɔk lɛmal, kusi balɔɔt ’bɔng baang ba balenɛ lɛtaak keem lɛmal. 4Kiyila ba bayanga ka Ɔnaang-a-kɛsɛɛm a kuyeeng a vveeng ’wɔng mung ulenɛ ippyam abbɛ lɛsam uloko ka kisul. Ulokobɛ ɔttɛ tɛ̀ttɛ́ babɛlɛ buppwolo lɛyɛn ka buppwolonɛ bullɔtbɛ. Abbwɛ bulenɛ buppwolo bwa bussinɛ ka Kuttu-Budoddo Ɔlɔɔmɔlɔɔm buffu ka lakke a Christ, wa ulenɛ Kuyeeng-Ɔlɔɔmɔlɔɔm. 5Kwa ayyɔɔt biini lissi ka ikopolonɛ. Ikopolo kwa Jesus Christ ka ulenɛ Uyini. La kwa ayyɔɔt ibɔɔyi annyɔɔng ka lɛttɔ a Christ. 6Ɔlɔɔmɔlɔɔm wa ɔttɛnɛ, “Vvenɛ buppwolo butta ka tɔkɔlɔ kisul.” Ulenɛ Ɔlɔɔmɔlɔɔm ’wɔng baang vvɔn wa ɔnaangnɛ buppwolo, buppwolo bullɔtyɛlɛ ka ippyam. Ɔkɔɔm buppwolo kɛsan a kɔlɔɔk a lakke ammɛ bwa buppwolonɛ ka lusso a Christ ufeeleyɛlɛ. 7Ɔzzànga ayyɔɔt, balɔɔt ba libɔngɔlɔ Kuyeeng-Ɔlɔɔmɔlɔɔm ’zɔng bayanganɛ, ile tɛ̀ttɛ̀ ikkpo ya banaangnɛyɛ ka kɛbat. Uwɔng ulenɛ kɛyɔɔ kɛttɛ lakke za lɛbaang lale za Ɔlɔɔmɔlɔɔm keem, za ayyɔɔt lissi. 8Luppyam lɔbbɔl mung yɛlɛ ɛkɛtɛ ɛlɔk, ɔzzànga akama lissi. Ɛkɛtɛ ɛlɔk ittɔ mung bɛkangala, ɔzzànga ittina ayyɔɔt ba ibut. 9Balɔɔt a kɔfɔk bale ggbadam, ɔzzànga ayyɔɔt ɛnngwa ba isɛlɛ. Ɛkɛtɛ ɛlɔk baddopoyɛlɛ, ɔzzànga yɛlɛ ba bawwɔɔl. 10Ɛkɛtɛ ɔkkpɛlɛ isam lubbe a Christ issɛɛn ka kkwɔɔt sa ayyɔɔt sa lile libbe, nkwaaning bassɛ bayɛn kuddu ammɛ ka kkwɔɔt ayyɔɔt. 11Ɛkɛtɛ ɔkkpɛlɛ ka lɛfal ayyɔɔt ile ka ntɛm a lubbe ka lɛttɔ a Jesus, nkwaaning bayɛn kuddu ammɛ ka kkwɔɔt ayyɔɔt ’sɔng mung sa lile libbe. 12Ning baang ulenɛ kɛttɛ lubbe lule ka kɛnaang ka kkwɔɔt ayyɔɔt, kuddu kule ka kɛnaang ka kkwɔɔt annyɔɔng. 13Luvva-Ɔlɔɔmɔlɔɔm lɔttɛ, “Nlɔɔk ka nyanganɛ kiyila.” Ɔkkpɛlɛ ayyɔɔt issɛ ilɔɔk ning baang ka kɛssanga luppyam a kiyila ssɔn. 14Isan lɔsan ittɛ Ɔlɔɔmɔlɔɔm wa ufungalanɛ Jesus, Uyini ’wɔng baang ɔtaa ka kuddu, vvenɛ ɔssɛ ufungalayɛlɛ ayyɔɔt ɔgbaa la Jesus. Ɔkɔɔmyɛlɛ umii uloko ɛfɛɛn nnyɔn la ammɛ. 15Mbyɔng mung ɔkkpɛlɛ bile kwa lɛttɔ annyɔɔng. Latele Ɔlɔɔmɔlɔɔm lalenɛ baang ka laffunɛ balɔɔt, balɔɔt ggbadam ggbadam, vvenɛ bawomo Ɔlɔɔmɔlɔɔm kɛnaang gaang gaang la luzɔɔm ka lɛsɔɔk za ɔsɔɔknɛbɛ. 16Kwakkwɛ baang itakanɛ ntɛtɛ lɛkkyaa ifɔngɔ mkkpa kkwɔɔt ayyɔɔt likpɛlɛ, kuyeeng ayyɔɔt kule baang ka kufoolonɛ la kɛtɔm la kɛtɔm. 17Waan akama ’wɔng mung wa iyɛnnɛ ka liggbili ssup vvenɛ unnyiyɛlɛ uggboggbo latele la lakke ning za kɛfal a kɛfal. Latele la lakke vvenɛ bɛtta akama gaang gaang. 18Ayyɔɔt zzeen ka bɛfɛɛn bya iyɛnnɛ ba itele. Itele zzeen ka bɛfɛɛn bya isinɛ lɛyɛn. Bwa iyɛnnɛ bútaa ka waan ɛkɛtɛ ssup ba iggyan. Iggyan bwa isinɛ ka zzeen lɛyɛn buttumu kɛfal a kɛfal.

will be added

X\