2 CORINTHIANS 3

1Nkwɔng mung kɔtaa tɛ̀ttɛ̀ ibbalnɛ kamma lɛnaang itumyɛlɛ kɛyɔɔng ɔɔ? Kukkwoong mung kule tɛ̀ttɛ̀ balɔɔt balɔk, kɛttɛ itɔk lakke ifeewɔyɔng, ɔlɔk itɔkzɛ ka annyɔɔng ɔɔ? 2Annyɔɔng alenɛyɔng leta wa ilenɛ lɛkkpɔk ka ippyam ayyɔɔt ittɛ ɔlɔɔt ɔkkpɛlɛ ɔsan, ukkwoong ɔkkwɔɔ. 3Kule ka lɔkkwɔɔn. Christ biini ɔkkpɔknɛ leta ’wɔng mung ɔtɔɔmyɛlɛ. Ɛbbanga lissi ka ɔkɔɔmnɛ ɔkkpɔk ka lɛttaal, ɔzzanga ɔkkpɔk ka ippyam ɔssɛbibit la Kuyeeng-Ɔlɔɔmɔlɔɔm wa ɔyanganɛ kuddu. 4Ilɔɔk ka iyanganɛ lakke za kɛnaang a ’kwɔng mung ka Christ ka lusso Ɔlɔɔmɔlɔɔm. 5Bulɔk ka tɔkɔlɔ yɛlɛ ba bule bwa bufɔngɔyɛlɛ ittina ittɛ ikkwoong mung inaang kɛnaang ’sɔng. Bwa ikkwoongnɛ inaang ɔkkpɛlɛ bussi ka labɔɔk Ɔlɔɔmɔlɔɔm. 6Ammɛ ɔnaangyɛlɛ ikkwoong inaang kɛnaang ufaa kɛbɛtɛ-kɛnnɔ. Kɛbɛtɛ-kɛnnɔ ’sɔng kwa Lafɔɔ a Moses lissi; kile sa Kuyeeng-Ɔlɔɔmɔlɔɔm. Lafɔɔ za bakkpɔknɛ lannyiyɛlɛ lubbe, ɔzzànga Kuyeeng kunnyiyɛlɛ kuddu. 7Lafɔɔ ’zɔng baang badɔkɔ bakkpɔkzɛ ka lɛttaal. Ɔzzánga lakke Ɔlɔɔmɔlɔɔm latuma baang ka ɛkɛtɛ Moses ɔtɔknɛzɛ. Mkkpa buppwolo bwa lusso a Moses buppwolonɛ budɔkɔ buzum, budɔkɔ bukkaam gaang gaang. Balɔɔt a Israel basi zzeen lɛbbɔ bayeek bappyɛɛkmɛ. Ulenɛ bɔfɛɛn a Lafɔɔ za bukɔɔmnɛ lubbe laffu lappyɛɛnɛ laffu la buppwolo ’bwɔng baang, 8attina attɛ latele za lassinɛ ka Kuyeeng-Ɔlɔɔmɔlɔɔm laffu lale laggbenge nang? 9Kɛssanga linaang sa kɛkɔɔmnɛ lubbe kifee balɔɔt kɛyanganɛ latele, attina attɛ linaang sa likɔɔmnɛ kuddu lifee balɔɔt lile liyanga latele nang? 10Ikkwoong mung ilɔɔk ittɛ buppwolo bwa buppwolonɛ gedegede mung ka bulenɛ lɛsak lɛttala, ɔbal tɛ̀ttɛ̀ buppwolo bwa buppwolonɛ ka isimi ka isimi bulenɛ lizum. 11Bɔfɛɛn bwa bummɛnɛ ssup buyanganɛ buppwolo, bɔfɛɛn bwa bubbɔnɛ kɛfal a kɛfal bule buyanga nang? 12Ikkaam luppyam ka iyanganɛ luttina ’gwɔng mung ggwɔn. 13Ayyɔɔt tɛ̀ttɛ̀ Moses ba ile, wa ɔsamnɛ ubba uvvoongmɛ kɛyɔɔng ka lusso ɔttɛ nkwaaning balɔɔt a Israel basi buppwolo ’bwɔng baang lɛyɛn ka buvvoongnɛ, bukkyaap. 14Ippyam abbɛ ivvoongbong ka lɔkkwɔɔn. Gɔɔ ka bɛtɔm bya mmwɔɔn mung bavvoongbong ippyam abbɛ la ubba tɛ̀ttɛ̀ bakkwɔɔnɛ ka luvva ɔtɔm a lafɔɔ. Ubba ’wɔng baang uweele ka ɛkɛtɛ ɔlɔɔt ɔsammɛnɛ kɛyɔɔng utoolo la Christ. 15Gɔɔ ka mmwɔɔn mung, ɛkɛtɛ duu ya balɔɔt bakkwɔɔnɛ Lafɔɔ a Moses, ubba utii baang ka uvvoongnɛbɛ ka ippyam. 16Ɔzzanga vvenɛ ubba ’wɔng baang uweele tɛ̀ttɛ̀ luvva Ɔlɔɔmɔlɔɔm lɔlɔɔknɛ, “Ubba Moses ’wɔng baang ɔdɔkɔ uweelemɛ ka ɛkɛtɛ ya ɔppyɛlɛnɛ uyila kwa Uyini.” 17“Uyini”, Ka tɔkɔlɔ ’kwɔng mung ulenɛ Kuyeeng. Ka ɛfɛɛn a Kuyeeng-Uyini kulenɛ, kuddu kule baang. 18Isso ayyɔɔt ɔkkpɛlɛ iwongolonɛ, balɔɔt bayɛn buppwolo Uyini tɛ̀ttɛ̀ bayɛnnɛ kiyenge. Ɔlɔɔmɔlɔɔm ufoolonɛyɛlɛ isseke bwa bayɛnnɛ baang, ikama-lɔkama iwongolo. Uwɔng kɛnaang Uyini wa ulenɛ Kuyeeng.

will be added

X\