2 CORINTHIANS 2

1Ɔzzánga nnaangbong luttina ka kwɔng nttɛ ba nbɛlɛ liffu naangwɔyɔng ataayɔng bukee. 2Ulenɛ ka nnaangnɛ bukee bunaangwɔyɔng, nnyinɛ ule usseke, wa ule ɔnaangnɛ anaam ɔwaanɛ. Ɔlɔɔt ɔlɔk ba ule ɔgbaa la annyɔɔng ba nnaangwɔnɛyɔng bukee bunaangwɔyɔng. 3Kwakkwɛ nkkpɔknɛ leta ’wɔng mung nfeewɔyɔng. Nsi lɛggyan nttɛ nffu ka ɛfɛɛn annyɔɔng bukee bunaangnɛ ka alenɛyɔng balɔɔt ba bunaangnɛnɛ nggele. Nsanbong nttɛ nggelenɛ ɔkkpɛlɛ annyɔɔng vvenɛ assɛ aggeleyɔng. 4Nkkpɔkwɔyɔng leta ’wɔng mung la lilɔɔk sa lɛbaang la akama ka luppyam ɔbɛtɛ la liyeen ka zzeen. Ɔzzanga nsi lɛttɛ bukee bunaangwɔyɔng. Nnaang nttɛ ɔkkpɛlɛ annyɔɔng asan attɛyɔng asaapnɛyɔng gaang gaang. 5Ɔlɔɔt ɔlɔk úlenɛ wabbɛ lɛnaang tɔkɔlɔ ɔbbɔlmɛ, la anaam lissi ka ɔnaangnɛ, ɔnaang la annyɔɔng, ɔlɔk la balɔɔt balɔk. (Nsi lɛggyan nttɛ nnaang lilɔɔk likoolomɛ kɛnaang.) 6Kwa ɔlɔɔt ’wɔng baang, kɔyyɛɛpbong ka akama wa alemɛnɛyɔng lɛyɔɔ ka ɛtɔk ’yɔng. 7Mkkpa kɔnaang, asɔɔkmɛyɔng ka kwa ɔnaangnɛ. Anaangmɛyɔng bukee bufɔngɔmɛ kɛnaang tɛ̀ttɛ́ uffu ɔkkyaa kiyila kwa lɛmmwɔɔl Ɔlɔɔmɔlɔɔm ɔfɔngɔ. 8Mkkpee! Anaangmɛyɔng ning baang ɔsan ɔttɛ ɔsaapwɔyɔng gaang gaang. 9Nkkpɔkwɔyɔng leta ’wɔng kwakkwɛ mung. Nggyan nttɛ nsan tɛ̀ttɛ̀ abbɔnɛyɔng illɛ, ɔlɔk ayilanɛyɔng lɔttama anaam nsan. 10Asɔɔknɛ ɔlɔɔt ka kɔlɔɔk kwa ulenɛ lɛnaang, anaam ɔgbaa nssɛbong nsɔɔkmɛ. Nsɔɔknɛ ka lɔkkwɔɔn nle nsɔɔk lutini bɛfɛɛn ɔkkpɛlɛ, nttina kwa annyɔɔng ka lusso a Christ, 11nkwaaning Satan usiyɛlɛ lɛbɛlɛ lɛbɛtɛ ka ilenɛ luttina ammɛ lɛsan. 12Nffɔnɛ Troas kikopolo Kuttu-Budoddo Ɔlɔɔmɔlɔɔm kwa kutumnɛ Christ, nsan nttɛ Ɔlɔɔmɔlɔɔm uwongolobong ɛtɔk a kɛnaang baang. 13Ɔzzànga akama ɔnaangnɛ gaang gaang ka nsinɛ ɔkpana ayyɔɔt, Titus, lɛyɛn. Nteele balɔɔt ba balenɛ baang ngbata nmii Macedonia. 14Ɔzzànga nzɔɔn-kɛnaang ule wa Ɔlɔɔmɔlɔɔm. Ka ilenɛ ka bɔkaat la Christ, Ɔlɔɔmɔlɔɔm ɔkɔɔmyɛlɛ ɔkkpɛlɛ tɛ̀ttɛ̀ balɔɔt igbakkɔpɔ ka kɔssɛ kwa issɛnɛ ka Christ ulenɛ lɛbɛtɛ. Ɔlɔɔmɔlɔɔm ɔkɔɔmyɛlɛ ayyɔɔt ɔnaang ibwɔɔlɔ kɔlɔɔk a Christ iwaala ka ifɛɛn ɔkkpɛlɛ tɛ̀ttɛ̀ kizzoom sa kiggwoomnɛ. 15Ayyɔɔt itaayɔng tɛ̀ttɛ̀ bɛfɛɛn bya bɛyyɛɛpnɛ kizzoom, bya Christ ɔkɔɔmnɛ ɔzɔɔm unnyi Ɔlɔɔmɔlɔɔm bɛwaala bivvoong balɔɔt ba balenɛ ba Christ, ulebɛ lɛkkala ɔfɔngɔ, la balɔɔt ba balenɛ lɛtaak. 16Lakkwɛɛnga kizzoom ’sɔng mung kɛtaa balɔɔt ba balenɛ lɛtaak tɛ̀ttɛ̀ bussi. Balɔɔt ba Christ ulenɛbɛ lɛkkala kɛtaabɛ tɛ̀ttɛ̀ kizzoom sa kɛkɔɔmnɛ kuddu kifee balɔɔt. Nyinɛ ule ɔkkɔnɔ kɛnaang a kɛnaang ’sɔng. 17Ayyɔɔt ba ile tɛ̀ttɛ̀ balɔɔt ba bakɔɔmnɛ lɛmmwɔɔl Ebinukkpaapi kpɛɛlɛ-kpɛɛlɛ tɛ̀ttɛ̀ bɔfɛɛn bwa businɛ kappya lɛkkaam. Ɔzzànga Ɔlɔɔmɔlɔɔm ka ulenɛyɛlɛ lɛtɔɔm, vvenɛ ilɔɔk lɔkkwɔɔn a kɔlɔɔk ka lusso ammɛ tɛ̀ttɛ̀ ibɔɔyi a Christ.

will be added

X\