2 CORINTHIANS 13

1Mung ɔnaangnɛnɛ bikkpit bɛkkyaat ka nlenɛ liffu nkoolowɔyɔng. Luvva-Ɔlɔɔmɔlɔɔm lɔttɛ, “Kɛkaal duu kɛzza kwa kamma kɛkaal ittɛɛsɛ iffa ɔlɔk ikkyaat”. 2Nle ka nbwɔɔlɔwɔnɛyɔng annyɔɔng ba alenɛyɔng bubbi lɛnaang ka isimi ka isimi la balɔɔt ɔkkpɛlɛ. Nlɔɔk kkpal ntumkwɛ ka nffunɛ nkoolowɔyɔng ka ɔssɛ-ɔttɛlɛ kiffu. Ɔzzànga vvenɛ nbbalkwɛ lɛlɔɔk ka nle nffu. Ɛkɛtɛ ya nle nppyɛlɛ nffu ɔlɔɔt wa ule ɔsɛɛm ka akama wa nle nkɔɔm nffu baala ule. 3Vvenɛ ayɛnyɔng iyɔɔ ɔkkpɛlɛ ya aggyannɛyɔng ɔlɔk balɔɔt basan battɛ Christ ɔkɔɔmnɛ anaam ɔlɔɔk kɔlɔɔk. Kwa ɔnaangnɛ la annyɔɔng kɔkkpɛlɛ lissi ka ɔkkpɛlɛnɛ, ɔyɔɔ lakke ammɛ ɔkkpɛlɛ ka kkwɔɔt annyɔɔng. 4Gɔɔ mkkpa ɔdɔkɔ ule kiyila kɛbɛtɛ kɛnaangmɛnɛ bawwɔɔlmɛ ka Cross, uddubong ka lakke Ebinukkpaapi. Ayɔɔt ɔgbaa issɛ iyila kɛbɛtɛ ning baang ka ilenɛ la ammɛ. Ka ilenɛ bɔfɛɛn bbwɔn la annyɔɔng, vvenɛ ɔkkpɛlɛ issɛ iyanga kuddu ka lakke Ebinukkpaapi. 5Allɛwɔyɔng kɛyɔɔng, annyiwɔyɔng kibbi kɛyɔɔng, ɔlɔk asanyɔng ulenɛ bɔfɛɛn alenɛyɔng la kiyila. Asanyɔng mung attɛyɔng Christ Jesus ule baang ka tɔkɔlɔ annyɔɔng ɔɔ? Asanyɔng mung, atakanɛyɔng ka nakanaka lisi lizzeme. 6Nttina nttɛ asanyɔng mung attɛyɔng ayyɔɔt ikumbong ka illɛ ’yɔng baang. 7Izɔɔm innyi Ebinukkpaapi ittɛ ɔlɔɔt ɔlɔk ɔfɔngɔ bubbi kɛnaang, nkwaaning balɔɔt bayɛn battɛ ikemebong. Kɔyyɛɛp ka anaangnɛyɔng kwa kɔyyɛɛpnɛ mkkpa balɔɔt battina battɛ ittɔbong ka illɛ. 8Baala ikkwoong itunu lɔkkwɔɔn a kɔlɔɔk. Ile inaang kwa kɔyaamnɛgwɛ keem. 9Iggele uggele ka ikpɛlɛnɛ, annyɔɔng akkaamyɔng. Issɛ ɔssɛ izɔɔm ittɛ ɔlɔk labɔɔk annyɔɔng lataa kpaladadaa. 10Kwakkwɛ nlewɔnɛ luvva ’gwɔng lɛkkpɔk tɛ́ttɛ́ nffu ntaa la annyɔɔng nkwaaning ka ɛkɛtɛ ya nffunɛ ka ɛfɛɛn annyɔɔng, baala nyɔɔwɔyɔng akama. Uyini unnyinɛbong lakke za nnaangwɔnɛyɔng akkaamyɔng ɔlɔk nnyiwɔyɔng kibbi. 11Ikpana anaam ataayɔng doddo. Agɔpɔlɔyɔng lakkpenge anaam ataayɔng bbwak. Ataayɔng ka bɔkaat la ba annyɔɔng. Ɔlɔɔmɔlɔɔm wa unnyinɛ bɔkaat la kɛsaap vvenɛ ɔtaa la annyɔɔng. 12Awomowɔyɔng kɛyɔɔng la kigbugba bukpana. Balɔɔt Ebinukkpaapi ɔkkpɛlɛ bawomowɔyɔngbong. 13Kiggwoom a kɔlɔɔk a Uyini ayyɔɔt, Jesus Christ, la kɛsaap Ɔlɔɔmɔlɔɔm la bɔkaat a Kuyeeng-Ɔlɔɔmɔlɔɔm ammɛ bibee la annyɔɔng ɔkkpɛlɛ.

will be added

X\