2 CORINTHIANS 12

1Vvenɛ nnaang kamma mkkpa kasi likkwoong kanaang kɔlɔk. Ɔzzànga nle nlɔɔk kwa biyɛnɛ la kɛyaala lilɔɔk sa Uyini ulenɛnɛ linnyi. 2Ntii ka nkkenɛ ka ɔlɔɔt a kɔssɛ a Jesus Christ vvɔn ɔkaanɛ gbɔɔ gbɔɔ ɔkkyaap umii ka libat. Utii likkpa ɔsɛlɛzzil ka kɔnaangnɛ. (Ba nsan bbwak ntumkwɛ. Kɔnaang oo! kusi lɛnaang oo! Ɔdɔkɔ biyɛnɛ Ɔlɔɔmɔlɔɔm oo! ba nsan. Ebinukkpaapi keem ɛsannɛ). 3Nbbal lɛlɔɔk. Nsan lɔsan nttɛ ɔlɔɔt ’wɔng baang ɔdɔkɔ ɔkkyaap umii Paradise. (Ɔzzànga ba nsan bbwak. Kɔnaangbong oo, faa biyɛnɛ Ebinukkpaapi oo, ba nsan. Annyɛ keem ɛsannɛ.) 4Uppyee Lɛmmwɔɔl bakang za basinɛzɛ likkwoong bakkpɔk. Uppyee lilɔɔk sa ɔssɛbibit usinɛ likkwoong utolo. 5Ɔlɔɔt ’wɔng baang ulenɛ wa nle nnaang kamma ntum. Baala nnaang kamma ntumnɛ anaam biini. Nle nnaang kamma ntum bɛfɛɛn bya bɛyɔɔnɛnɛ bɛttɛ nkkpɛlɛbong. 6Nnaangnɛ kamma, anaam uzingizingi lissi, ka nle nbwɔɔlɔ lɔkkwɔɔn a kɔlɔɔk. Ɔzzànga kamma baala nnaang ka nsinɛ lɛggyan nttɛ ɔlɔɔt vvɔn gbɔɔ ɔyanga luttina ɔttɛ nyyɛɛp linaang, ka likkpɔk ntta tɛ̀ttɛ̀ ɔyɛnnɛnɛ ka zzeen uppyeenɛ ka latɔɔk. 7Ebinukkpaapi ka ettinanɛ ɛttɛ tɛ̀ttɛ́ nffu nnaang bisese ka bɛfɛɛn bya nlenɛ lɛyɛn, ematnɛbong kizze ka kkwɔɔt kɛtaa tɛ̀ttɛ̀ uyilabɔtɔɔm a Satan. Kizze ’sɔng baang kimmeepnɛ ɛkɛtɛ ɔkkpɛlɛ. Nɛ ba kɛfɔngɔ ɔkkyaanɛ. 8Nzɔɔm bikkpit bɛkkyaat nnyi Uyini ntum kɔlɔɔk ’kwɔng. Nbwɔɔlɔmɛ nttɛ ɔnaang bɛfɛɛn ’byɔng bɛgbata bissekenɛ. 9Kɛppyɛlɛ kamma ammɛ kɛdɔkɔ kile kɛttɛ, “Ppyɛɛ anaam ulenɛ bwa aggyannɛ. Lakke anaam lattanɛ lɛkkaam ka ɛkɛtɛ ya likke lɛsaalwɔnɛ.” Nggele gaang gaang ka nkpɛlɛnɛ ɔkkɔɔnɛ nsan ikkala a Christ ka kkwɔɔt anaam. 10Luppyam lulenɛ bɛɛm la izzit anaam, la kɛkpɛlɛ sa nkpɛlɛnɛ la lifɔk, akama, lubbe, la bɔfɔɔp a kkwɔɔt ka lɛttɔ a Jesus. Ɛkɛtɛ ya nkpɛlɛnɛ baang ulenɛ ya nkkaamnɛ. 11Nsseke ka nlɔɔknɛ tɛ̀ttɛ̀ ukun ka lɛttɔ annyɔɔng. Annyɔɔng alenɛyɔng ba bubungunɛnɛyɔng kɛnaang. Gɔɔ mkkpa nsi bulɔk lile, bulɔk ba nsi lile ka lusso “bayilabɔtɔɔm” annyɔɔng ’bɔng baang. 12Bɛmaanga bya bɛnaangnɛ bɛyɔɔ bɛttɛ anaam uyilabɔtɔɔm a Jesus, bɛdɔkɔ bɛnaang ka bɛzzɔkɔ annyɔɔng la kibbe luppyam. 13Bɛnaang babbɔlwɔyɔng nang bɛtta izɔɔm ilɔk? Ka nsiwɔnɛyɔng lɛbap nttɛ ayaamnɛyɔng ɔɔ? Ellee, asɔɔknɛyɔng ka babbu linaang ’sɔng. 14Uwɔng ɔnaangnɛ ka bikkpit bɛkkyaat ka nbamanɛ kiffu kikoolowɔyɔng. Ɔzzànga bulɔk wɔyɔng baala nggyan nbap. Bwɔɔntiti lissi bale bannyi ibassɛ la ibakka bwa baggyannɛ: Ibasse la ibakka bannyinɛ bwɔɔntiti bɔfɛɛn duu bwa baggyannɛ. 15Vvenɛ nggele gaang gaang ntakanɛ bwa nyanganɛ ɔkkpɛlɛ ɔgbaa la anaam biini, nkwaaning nttelewɔyɔng. Vvenɛ anaam baala nsaapwɔyɔng ka annyɔɔng asaapnɛnɛyɔng anaam gaang ɔɔ? 16Vvenɛ ayila attɛyɔng akama lissi ka nyɔɔwɔnɛyɔng ɔɔ? Ɔzzànga vvenɛ ɔlɔɔt ɔlɔk ɔttɛ nkɔɔm lagban la lalaak nfɛɛtwɔyɔng. 17Nfɛɛtwɔyɔng nang? Attina attɛyɔng nlɔɔk ’kwɔng ɔkkaamnɛnɛ kwa bayilabɔtɔɔm ba ntɔɔmnɛ ɔɔ? 18Nkkpenge Titus nttɛ umii. Ntɔɔmmɛ la ɔkpana ayyɔɔt wa ulenɛ bannyi lɛllɔt nttɛ bamii la ammɛ. Mung alɔɔk attɛyɔng Titus ɔkkaamnɛ kwa annyɔɔng ɔɔ? Anaam la ammɛ eleme nnyɔn la lɔtan ggwɔn lissi ka iyanganɛ ɔɔ? 19Vvenɛ ale attina attɛyɔng ɛkɛtɛ ɔkkpɛlɛ ileyɛlɛ kɛyɔɔng ka kɛkkala ka lusso annyɔɔng. Ning lissi, ilɔɔk tɛ̀ttɛ̀ Christ ulenɛyɛlɛ likke lɛssɛɛn ɔttɛ ilɔɔk ka lusso Ebinukkpaapi. Kɔlɔɔk duu kwa inaangnɛ iggyan ittɛ budoddo butaa la annyɔɔng inngwa ayyɔɔt. 20Ɔbbwɔpɔnɛ lɔbbwɔpɔ nttɛ nffunɛ bakang vvenɛ nyɛnwɔyɔng ka babbu linaang ba nsinɛ lɛggyan. Annyɔɔng ɔgbaa vvenɛ ayɛnnɛyɔng la linaang sa asinɛyɔng lɛggyan. Ɔbbwɔpɔnɛ nttɛ vvenɛ nyɛn balɔɔt a kɔfɔk la banaang a luleep, la bassɔp-a-luppyam, la bassɔp a bɔfɛɛn, la babbaat a lifɔk, bassɛ lɔzzɔ, lɔbba la babbu linaang ɔkkpɛlɛ. 21Ɔbbwɔpɔnɛ lɔbbwɔpɔ nttina nttɛ nffunɛ Ebinukkpaapi vvenɛ ɛnaang izzit inaangnɛ ka lusso annyɔɔng. Vvenɛ nkkwa nnyi banaang-a-bubbi ba baggbanɛ bubbi lɛnaang, bale kikup a bwanavva la babbu ikkɔlɔ lɛkkyaa bafɔngɔ.

will be added

X\