2 CORINTHIANS 11

1Nngwa nttɛ vvenɛ afɔngɔnɛyɔng ka ɛkɛtɛ ya nnaangnɛ kikun. Nkkpeeyɔng. 2Anaam la Ɔlɔɔmɔlɔɔm ɔgbaa iggyan ittɛ ataayɔng bbwak la Ɔlɔɔmɔlɔɔm. Aleyɔng tɛ̀ttɛ̀ waanawanavva wa ɔtakanɛ la walam limini, wa nlenɛ lɛlɔɔk nttɛ vvenɛ nsammɛ nnyi ɔlɔɔt vvɔn killu keem. Ɔlɔɔt ’wɔng baang ulenɛ Christ. 3Ɔbbwɔpɔnɛ nttina nttɛ vvenɛ ippyam annyɔɔng isikili, asamyɔng luttina annyɔɔng assekeyɔng Christ; tɛ̀ttɛ̀ ɛzzɔkɔ ɛdɔkɔnɛ ɛkɔɔm ɛfɛɛt Eve (Uzoo). 4Atɔkyɔng ɔlɔɔt ɔlɔk la laggele uffu ukopolowɔyɔng kɔlɔɔk a Jesus ɔlɔk, usi kwa Jesus wa ayyɔɔt ikopolonɛ lile. Atɔkyɔng kuyeeng la kuttu budoddo kwa kusinɛ tɛ̀ttɛ̀ kwa ayyɔɔt kwa kussinɛyɛlɛ ka Ɔlɔɔmɔlɔɔm lile. 5Ba nttina nttɛ “bayilabɔtɔɔm” annyɔɔng battanɛnɛ anaam liggbenge. 6Vvenɛ ɔtaa tɛ̀ttɛ̀ ntiinɛ ka kikkoop a kutolo. Ɔzzànga ka kɛsan a kɔlɔɔk lissi. Ibwɔɔlɔwɔyɔng ’kwɔng mung ppwool bikkpit bikkpit ɛkɛtɛ ɔkkpɛlɛ. 7Nsiwɔyɔng kappya lɛbɛkɛ ka ɛkɛtɛ nkopolowɔnɛyɔng Kuttu-Budoddo Ɔlɔɔmɔlɔɔm. Ntɔknɛ anaam biini ka bikee waan nttɛ nkwaaning àzzángayɔng balɔɔt. Nkwɔng baang bbwak kusi lile ɔɔ? 8Ka ɛkɛtɛ inaangnɛ kɛnaang la annyɔɔng, izɔɔm ilɔk ikkpelenɛnɛ. Ntɔkbɛ kussi nttɛ nyaamwɔyɔng annyɔɔng. 9Ka ɛkɛtɛ ndɔkɔnɛ la annyɔɔng, lɔsap nsiwɔyɔng lɛkkpa nttɛ attelenɛyɔng ka ɛkɛtɛ ya nggyannɛ ikkpoko. Ikpana ayyɔɔt ya issinɛ Macedonia iffu, bakɔɔmnɛ bɛfɛɛn ɔkkpɛlɛ bya nggyannɛ bafeenɛ. Tɛ̀ttɛ̀ kulenɛ ka isimi, kule kule ning baang ka ussoonɛ. Lɔsap wɔyɔng baala nkkpa. 10Lɔkkwɔɔn a kɔlɔɔk a Christ ka lulenɛnɛ ka tɔkɔlɔ, nlɔɔkbong nsekele nttɛ kɛnaang a kamma anaam ’sɔng baala kizum ka ɛfɛɛn ɔkkpɛlɛ ka Greece. 11Mbɔng tɛ́ttɛ́ nlɔɔk ning? Nlɔɔk ka asinɛnɛyɔng lɛsaap ɔɔ? Ɔlɔɔmɔlɔɔm ɔsan lɔsan ɔttɛ asaapnɛyɔng lɛsaap! 12Nle ntii baang ka nnaangnɛ kwa nggbanɛ lissi nnaang, nkwaaning nsi balɔɔt balɔk kufuk linnyi kwa kɛnaang a kamma kɛttɛ abbɛ banaang kɛnaang tɛ̀ttɛ̀ ayyɔɔt inaangnɛ. 13Balɔɔt ’bɔng baang bayilabɔtɔɔm a Jesus ba lɔkkwɔɔn lissi. Abbɛ balenɛ bakkala-lalaak ba battɛnɛ abbɛ bayilabɔtɔɔm a Jesus. Bakkala lalaak batum kɛnaang abbɛ, babbwa bataa tɛ̀ttɛ̀ bayilabɔtɔɔm a Jesus ba lɔkkwɔɔn. 14Kwakkwɛ baang Satan ukkwoongnɛ usikilimɛ kɛyɔɔng ɔbal uyilabɔtɔɔm-Ɔlɔɔmɔlɔɔm. 15Kwakkwɛ kusinɛ gaang lɛttala, ibɔɔyi a Satan basikilinɛbɛ kɛyɔɔng babal ibɔɔyi ya doddo. Ka lakkpeke, vvenɛ babwɔɔlɔ bwa bukkɔnɔnɛbɛ ka kɛnaang sa banaangnɛ. 16Nbbal lɛlɔɔk tɛ̀ttɛ́ ɔlɔɔt ɔlɔk uttinanɛ ɔttɛ anaam uzingizingi. Ɔzzànga kulenɛ ning, atɔknɛnɛyɔng tɛ̀ttɛ̀ uzingizingi gwaat gwaat, nkwaaning nyanga bwa nle nnaang kamma ntum ssup. 17Kwa nlɔɔknɛ mung ba kule kwa Uyini ule ɔttɛ nlɔɔk. Ka lɔbba ’gwɔng mung, nlɔɔk tɛ̀ttɛ̀ uzingizingi ka lɔkkwɔɔn. 18Ɔzzànga ka balɔɔt balɔk balenɛ baang ggbadam ba babbanɛ lɔbba gbɔɔgbɔɔgbɔɔ batum lilɔɔk a balɔɔt, vvenɛ nssɛ nbba ning baang. 19Annyɔɔng biini asanyɔng kɔlɔɔk gaang gaang ayilayɔng bazingizingi banaang kwa kɔsaapnɛbɛ. 20Ayilayɔng balɔɔt banaangwɔyɔng lilɔɔk akama. Batɔkwɔyɔng iyyɛɛp, ɔlɔk bassɛɛnwɔyɔng ka kɔlɔɔk. Bappyɛɛkwɔyɔng bbɔl-bbɔl, batupwɔyɔng labut ka lusso. 21Kɔnaang izzit kiyila kɛttɛ bbwɔp linaangnɛyɛlɛ inaang lilɔɔk ’sɔng baang. Ɔzzànga ɔlɔɔt ɔlɔk ɔbbɔnɛ ɔnaang kamma utum bɔfɛɛn, anaam vvenɛ nnaang nsakmɛ. Ɔzzànga mung nlɔɔk tɛ̀ttɛ̀ uzingizingi. 22Abbɛ balɔɔt a Hebrew ɔɔ? Anaam wa Hebrew. Abbɛ balɔɔt a Israel ɔɔ? Anaam nssɛ nle wa Israel ɔgbaa. Abbɛ balɔɔt a kikkwu Abraham ɔɔ? Anaam wa kikkwu ammɛ ɔgbaa. 23Mung abbɛ ibɔɔyi a Christ ɔɔ? Appyeenɛ attɛ anaam ukun, nsakalakang anaam nlenɛ bɔɔyi wa doddo nttabɛ abbɛ. Nnaangbong kɛnaang nttabɛ abbɛ. Ntaabong ka ngbakkɔpɔ nttabɛ abbɛ. Batupnɛbong battabɛ abbɛ. Nkkɛtɛ lubbe ɛkɛtɛ ɔkkpɛlɛ nttabɛ abbɛ. 24Utii bikkpit ning kubbwɔɔk ka balɔɔt a Jews batupnɛnɛ lɔlɔp la bupyoko ɔsɛlɔlɔp. 25Balɔɔt a Rome batupnɛ bikkpit bɛkkyaat. Batɔɔpnɛ lattaal kikkpit ssɔn. Ikkpaat ikkyaat issɛɛnbong la anaam ka tɔkɔlɔ. Ka kikkpit sa ssɔn ntaa kɛtɔm uwɔlɔlɔ ka tɔkɔlɔ bannyi. 26Ka kɔssɛ anaam naanga ntaak ka tɔkɔlɔ ɛlɔlɔ. Bassip baggyannɛ kɛwwɔɔl. Balɔɔt a Jews la Ikanakana baggyannɛ kɛwwɔɔl. Nyɛn lubbe ka zzeen ka laffɛ, ka laffɛ. Nyɛngwɛ ka bannyi. Nyɛngwɛ ka kɛmat. Nyɛngwɛ ka bakkala-lalaak inngwa anaam ɔgbaa. 27Nnaangbong kɛnaang la akama. Ntaa kwet-kwet nsi bilaa lɛlaa ka bɛtɔm ppwap. Ntaabong buwwɔɔng a bannyi la kazzi likke lɛsaal. Ɛkɛtɛ ɛlɔk bwakuzzi bwa doddo ba nyɛn nzzi. Ɛfɛɛn a kilup a lɛttɔ ba nyɛn, gɔɔ uwɔkɔlɔ wa kɛwɔkɔlɔ ka kkwɔɔt. 28Ba kule kwa kɛttaal bɛfɛɛn bɛlɔk kɛgbaa. Kɛtɔm ɔkkpɛlɛ nle baang ka nnaangnɛ kɛnaang izɔɔm ɔkkpɛlɛ sa ɔlɔɔt usinɛnɛ kɔdda lɛdda ɔttɛ nnaang. 29Ɛkɔp ɛmɛɛmnɛ ɔlɔɔt, ɛssɛ ɛmɛɛmnɛ anaam. Ɔlɔɔt ɔttɔnɛ ka bubbi, anaam ntaanɛ la akama. 30Nlenɛ ka nnaangnɛ kamma, nle nnaang kamma la bɛfɛɛn bya bɛyɔɔnɛnɛ bɛttɛ nkkpɛlɛ lɔkkpɛlɛ. 31Ppyɛɛ ule wa lɛkɔɔl ammɛ Ɔlɔɔmɔlɔɔm wa ulenɛ abassɛ Jesus Uyini, kɛfal a kɛfal. Ammɛ ɔsannɛ ɔttɛ anaam lɛlaak ba nnaang. 32Ɛkɛtɛ ndɔkɔnɛ Damascus, uzzilɛttɔ ɛkpansi wa ɔtaanɛ ubeet Aretas ka kɔtaak, uloko balɔɔt ka lamma bikkwu lɛffɛ ’zɔng baang ɔttɛ bakaanɛ. 33Ɔzzánga badɔkɔ basammɛ bassɛɛn ka tɔkɔlɔ ɛsangala la kizzi, bassɛ ka lɛmma za lilenɛ ka kɛbat basininɛ baloko ka lissɛ, nmma nsɛɛm.

will be added

X\