2 CORINTHIANS 10

1Anaam Paul nkkpengewɔnɛyɔng. Anaam wa balɔɔknɛ battɛ nle ɔlɔɔt a latele la kiggwoom a kɔlɔɔk ka ɛkɛtɛ ya nlenɛ la annyɔɔng. Nnyanga ka ɛkɛtɛ ngbatanɛ nkɔngɔwɔyɔng. Nkkpengewɔyɔng ka budoddo ka kɛyyɛɛp a kɛnaang a Christ, 2nttɛ tɛ̀ttɛ́ atutnɛyɔng nnyanga ka ɛkɛtɛ nle nffu ka ɛfɛɛn annyɔɔng. Nsan lɔsan bɛlɛng nttɛ nkkwoong mung nnyanga la balɔɔt ’bɔng baang ba balɔɔknɛ battɛ ayyɔɔt inaang kwa vveeng ’wɔng ɔddanɛyɛlɛ. 3Kule ka lɔkkwɔɔn. Ayyɔɔt illu ka vveeng ’wɔng mung. Ɔzzànga kullu tɛ̀ttɛ̀ vveeng ’wɔng mung ullunɛ ba illu. 4Bɛfɛɛn a kullu bya ikɔɔmnɛ illu kullu bya vveeng ’wɔng lissi. Bile bya Ɔlɔɔmɔlɔɔm. Bɛkkaam lɔkkaam bɛsak. Ikɔɔmbyɛ abbyɛ ibɛpɛ lakke la babbu ikangala ɔkkpɛlɛ. 5Vvenɛ ibɛpɛ bisese ɔkkpɛlɛ bya bisinɛ kɛsan a kɔlɔɔk Ɔlɔɔmɔlɔɔm lɛggyan. Vvenɛ inaang ittina ya ile innaa ippyam ɔkkpɛlɛ itele Christ. 6Alenɛyɔng latele annyɔɔng linnyi laggba, vvenɛ iyɔɔ balɔɔt ba basɛlɛnɛ latele akama. 7Appyɛɛkyɔng bɛfɛɛn ’byɔng mung gbɔɔ tɛ̀ttɛ̀ ayɛnnɛyɔngbyɛ. Ɔlɔɔt ɔlɔk ule baang wa ɔttɛnɛ ammɛ ule wa Christ ɔɔ? Kɔyyɛɛp-ɔyyɛɛp! Ɔbbalmɛ kɛyɔɔng liffik ɔgbaa ɔsan ɔttɛ ayyɔɔt ɔgbaa issɛ ile ba Christ tɛ̀ttɛ̀ ammɛ. 8Gɔɔ izzit nɛ ba inaang mkkpa nle kamma lɛnaang ntum lakke za Uyini unnyinɛyɛlɛ. Lakke za lanaangwɔnɛyɔng aggbengeyɔng, za latutwɔnɛyɔng lazzɔɔk lissi. 9Ba nggyan nttɛ kɔtaa tɛ̀ttɛ̀ anaam nbumwɔnɛyɔng kɛdal la illeta ya nkkpɔknɛ. 10Ɔlɔɔt ɔlɔk vvenɛ ɔlɔɔk ɔttɛ, “Illeta Paul ɔkkpɔknɛ ile ka lɔkkwɔɔn. Ikkaam lɔkkaam. Ɔzzànga ka ɛkɛtɛ ya ulenɛ la ayyɔɔt ba ɔkkaam, lammwɔɔl ammɛ ba lassɔp.” 11Kɛssanga ɔlɔɔt ’sɔng baang kɔsan kɛttɛ duu bwa ilenɛ ka lammwɔɔl illeta ayyɔɔt ka isinɛ ka ɛfɛɛn annyɔɔng lile, ile ile ning baang ka linaang ayyɔɔt, ka ɛkɛtɛ ile ile baang la annyɔɔng. 12Kule ka lɔkkwɔɔn, baala ibbɔ ibunguyɛlɛ kɛyɔɔng, ɔlɔk issayɛlɛ kɛyɔɔng la balɔɔt ba battɛnɛ abbɛ baggboggbo balɔɔt. Abbɛ baang bazingizingi. Battina kwa abbɛ bazza kɛkaal abbɛ kɛyɔɔng tɛ̀ttɛ̀ lɛfal abbɛ laggyannɛ. 13Tɛ̀ttɛ̀ kwa ayyɔɔt mung, mkkpa kɔnaang, kɛnaang a kamma ayyɔɔt baala kɛsak kimeen. Kile kɛtaa baang ka kimeen sa Ɔlɔɔmɔlɔɔm ulenɛyɛlɛ linnyi utoolo la kɛnaang ayyɔɔt ka ɛfɛɛn annyɔɔng. 14Ɔzzànga annyɔɔng ka alenɛyɔng ka tɔkɔlɔ kimeen ’sɔng baang, isi lɛnaang isak ka ɛkɛtɛ ya ikɔɔmnɛ Kuttu-Budoddo kwa kutumnɛ Christ ifeewɔyɔng. 15Kamma ba itaka inaang itum kɛnaang sa balɔɔt balɔk banaangnɛ basak kimeen sa Ɔlɔɔmɔlɔɔm ulokonɛyɛlɛ. Lutini ’gwɔng ittina ittɛ kiyila annyɔɔng kɛmmala nkwaaning ikkwoong inaang kɛnaang kiggbenge kɛgbaa ka ɛfɛɛn annyɔɔng ka tɔkɔlɔ kimeen sa Ɔlɔɔmɔlɔɔm ulenɛyɛlɛ liloko. 16Nkwaaning ikkwoong ikopolo Kuttu-Budoddo Ɔlɔɔmɔlɔɔm ka ikaan ilɔk ɔgbaa. Gɔɔ baala inaang kwa kɛnaang sa balɔɔt balɔk balenɛ lɛggba lɛnaang ka ɛkpansi abbɛ. 17Luvva-Ɔlɔɔmɔlɔɔm lɔttɛ, “Ɔlɔɔt duu wa ɔggyannɛ ɔttɛ ɔnaang kamma, ɔnaang kamma kwa bwa Uyini ulenɛ lɛnaang.” 18Ɔlɔɔt ɔyɛn budoddo ka Uyini, ka ɛkɛtɛ Uyini biini uttinanɛ budoddo utum ɔlɔɔt ’wɔng baang, kwa ɔlɔɔt ’wɔng baang uttinanɛ utummɛ kɛyɔɔng lissi.

will be added

X\