2 CORINTHIANS 1

1Paul, uyilabɔtɔɔm a Christ Jesus, wa Ɔlɔɔmɔlɔɔm ɔsangamɛnɛ la ɔkpana ayyɔɔt Timothy, bakkpɔknɛ lɛmmwɔɔl ’zɔng bafee balɔɔt a luzɔɔm Ɔlɔɔmɔlɔɔm ɔkkpɛlɛ ka Corinth; la Greece ɔkkpɛlɛ. 2Ɔlɔɔmɔlɔɔm, Dedde ayyɔɔt, la Uyini ayyɔɔt, Jesus Christ, unnyiwɔyɔng lakke la bɔkaat. 3Iwomoyɔng Ɔlɔɔmɔlɔɔm, Abassɛ Uyini ayyɔɔt, Jesus Christ, uggwoom a kɔlɔɔk a Dedde, Ɔlɔɔmɔlɔɔm wa kɛyaam ɔkkpɛlɛ kissinɛ ka ammɛ kiffu. 4Ɔyaamyɛlɛ ka lilɔɔk ayyɔɔt ɔkkpɛlɛ, nkwaaning ikkwoong iyaam balɔɔt balɔk ba bayanganɛ bɛssanga lilɔɔk ɔkkpɛlɛ. Iyaambɛ ka kɛssanga kɛyaam ’sɔng baang ssɔn sa Ɔlɔɔmɔlɔɔm ɔyaamnɛyɛlɛ ayyɔɔt. 5Tɛ̀ttɛ̀ iyanganɛ etini ka akama wa Christ ɔyɛnnɛ, ile issɛ ka Christ iyanga etini ka kɛyaam ammɛ sa lɛbaang ɔgbaa. 6Iyɛnnɛ akama, iyɛn kwa kɛyaamwɔyɔng la kwa kuddu annyɔɔng. Ɔlɔɔmɔlɔɔm ɔyaamnɛyɛlɛ ayyɔɔt, vvenɛ ɔssɛ ɔyaamwɔyɔng annyɔɔng. Ɔgbaa, unnyiwɔyɔng lakke za kɛbbɔ akama la kibbe luppyam ɔgbaa la kɛssanga kɛbbɔ akama sa ayyɔɔt ibbɔnɛ. 7Luttina ayyɔɔt ka annyɔɔng ba lɔgbata. Isan lɔsan ittɛ tɛ̀ttɛ̀ ayanganɛyɔng etini ka akama ayyɔɔt, assɛ ayangayɔng etini ning baang ka kɛyaam sa ayaamnɛyɔngyɛlɛ ayyɔɔt. 8Ikpana ayyɔɔt, iggyan ittɛ ikkewɔyɔng lilɔɔk sa linaangnɛyɛlɛ ka ɛkpansi a Asia. Lilɔɔk sa babɛtɛnɛyɛlɛ lisak lɛttala isam zzeen a kuddu. 9Ittina ittɛ baang bazzabong kɛkaal ayyɔɔt battɛ ibbe. Nkwɔng kɔnaang nkwaaning ɔkkaamyɛlɛ kwa Ɔlɔɔmɔlɔɔm keem wa ufungalanɛ babbu, kwa ayyɔɔt biini lissi. 10Ka ussinɛ ka akama lubbe ɔkkalayɛlɛ, vvenɛ ɔkkalayɛlɛ. Isambong ittina ayyɔɔt iloko ka ammɛ ittɛ vvenɛ abbalyɛlɛ lɛkkala, 11tɛ̀ttɛ̀ annyɔɔng attelenɛyɔngyɛlɛ ka luzɔɔm gwa azɔɔmnɛ assɛɛnyɔngyɛlɛ. Ɔlɔɔmɔlɔɔm vvenɛ uppyee luzɔɔm ɔkkpɛlɛ gwa bazɔɔmnɛ bassɛɛnyɛlɛ. Vvenɛ ɔnaangyɛlɛ ppyɛɛ. Balɔɔt ggbadam vvenɛ bayeek lɛmmwɔɔl abbɛ bawomo Ɔlɔɔmɔlɔɔm kɛnaang bannyiyɛlɛ. 12Nkwɔng kulenɛ kwa ɔkkyaanɛyɛlɛ. Luttina ayyɔɔt lɔbwɔɔlɔbongyɛlɛ lɔttɛ lɔkkwɔɔn a kɔlɔɔk Ɔlɔɔmɔlɔɔm la kɛsaap sa ɔyɔɔnɛyɛlɛ bɛkɔɔmnɛ lafal ayyɔɔt ka vveeng ’wɔng. Gaang gaang lassi ayyɔɔt la annyɔɔng. Kibbe-lɛttɔ Ɔlɔɔmɔlɔɔm, bisana a vveengodde lissi. 13Ikkpɔk bwa ale akkwoong akkwɔɔyɔng ifeewɔyɔng. Nttina nttɛ vvenɛ asanyɔngkwɛ ɔkkpɛlɛ ka lakpeke. 14Kippyee kɔlɔɔk ayyɔɔt sa appyeenɛyɔng gedegede mung kile ssup, nttina nttɛ vvenɛ appyeeyɔng doddo affatayɔng nkwaaning ɔkkyaawɔyɔng ka Kɛtɔm-Uyini Jesus kwa ayyɔɔt tɛ̀ttɛ̀ ayyɔɔt ule ɔkkyaayɛlɛ kwa annyɔɔng. 15Ndɔkɔ nggba ’byɔng ɔkkpɛlɛ lɛsan, kwakkwɛ nnaangnɛ luttina ka ikeeng gwa kikoolowɔyɔng nkwaaning ayangayɔng ppyɛɛ ka bikkpit bɛffa. 16Nnaang luttina gwa kikoolowɔyɔng ka ɛkɛtɛ nle ka nmiinɛ Macedonia la ɛkɛtɛ nle nppyɛlɛ, nkwaaning attelenɛyɔng ka nle ka nmiinɛ Judea. 17Ka nttinanɛ ’kwɔng ndɔkɔ nfoolo luttina ɔɔ? Ka nnaangnɛ ’gwɔng, nnaang gwɛ la kɛssɔp a bɔfɛɛn ɔɔ? Mbama nlɔɔk nttɛ, “Iii, Iii,” la “Maaye, Maaye” ka ɛkɛtɛ nnyɔn ɔɔ? 18Ka Ɔlɔɔmɔlɔɔm ulenɛ lɔkkwɔɔn a kɔlɔɔk, nlɔɔk-nloko anaam la annyɔɔng usi lile wa “Iii” la “Maaye”. 19Jesus Christ, Waan-Ɔlɔɔmɔlɔɔm, wa Silas la Timothy la anaam, Paul, biini ibwɔɔlɔwɔnɛyɔng kɔlɔɔk ammɛ lissi ulenɛ ɔlɔɔt wa “Iii” la “Maaye”. Ka kkpɔɔ ammɛ ulenɛ “Iii” Ɔlɔɔmɔlɔɔm. 20Ammɛ ulenɛ ɔlɔɔt wa “Iii” ka nsekele Ɔlɔɔmɔlɔɔm ɔkkpɛlɛ. Uwɔng ulenɛ ifɛɛt ya issɛnɛ ka Jesus Christ inaang “Kule ning” ka latele Ɔlɔɔmɔlɔɔm. 21Ɔlɔɔmɔlɔɔm biini ɔnaangnɛyɛlɛ ayyɔɔt la annyɔɔng isan ka lɔkkwɔɔn ittɛ iddubong ka ilenɛ ka bɔkaat la Christ. Ɔlɔɔmɔlɔɔm biini ɔsanganɛyɛlɛ uloko zzekep. 22Ammɛ ɔnaangnɛyɛlɛ eleme ɔttɛ ammɛ ulenɛ Uyini ayyɔɔt. Ammɛ ɔssɛɛnnɛyɛlɛ Kuyeeng-Ɔlɔɔmɔlɔɔm ka ippyam tɛ̀ttɛ̀ nlɔɔk-nloko wa ɔnaangnɛ la ayyɔɔt ɔkkpɛlɛ ɔttɛ vvenɛ unnyiyɛlɛ bɛfɛɛn ɔkkpɛlɛ bya ɔbɔngɔlɔnɛyɛlɛ. 23Nkkwɔɔ Ɔlɔɔmɔlɔɔm, ttɛɛsɛ anaam, Ammɛ ɔsannɛ luppyam anaam. Ndɔkɔ nttina kɛkkalawɔyɔng kwakkwɛ baang nnaangnɛ luttina nsi Corinth limii. 24Mung ba ibum ittɛ ibwɔɔlɔwɔyɔng bwa ale ayilayɔng. Isan lɔsan ittɛ aleyɔng kkpɔk ka kiyila ka abeenɛyɔng. Lutini ’gwɔng mung inaang kɛnaang la annyɔɔng la annyɔɔng iggyan budoddo annyɔɔng ɔkkpɛlɛ.

will be added

X\