1 TIMOTHY 6

1Ɔkkpɛlɛ annyɔɔng ba alenɛyɔng babili, atɔkyɔng issaawɔ annyɔɔng ka latele, nkwaaning ɔlɔɔt ɔlɔk usi lɛlɔɔk bubbi utum lɛkɔɔl Ɔlɔɔmɔlɔɔm la lukopolo ayyɔɔt. 2Babili ba ibassɛ abbɛ ikupnɛ Jesus, tɛ̀ttɛ́ batɔk ibassɛ abbɛ ka isɛɛkɛ. Ɔkkpɛlɛ abbɛ bale ikpana la ikpana. Lutini ’gwɔng batelebɛ gaang gaang bagbaa, ka balɔɔt ’bɔng baang ba bayanganɛ isak ka kɛnaang abbɛ balenɛ bayanga kiyila ba basaapnɛbɛ. Akopolo balɔɔt bɛfɛɛn ’byɔng: 3Ɔlɔɔt duu wa ukopolonɛ luzɔɔm gwa lulenɛ zzekep usi lɛmmwɔɔl Uyini ayyɔɔt, Jesus Christ, za lilenɛ lɔkkwɔɔn a kɔlɔɔk la lukopolo luzɔɔm ammɛ liyila, ɔlɔɔt ’wɔng baang 4ɔyɛnmɛbong kɛyɔɔng ɔsak usseke uzingizingi. Ɔkɔɔm tɔkɔlɔ wa bbɔlbbɔl, ɔkangala ikangala la kɔwɔlɔ. Bɛfɛɛn ’byɔng binnyinɛ ɔlɔɔt luleep, kɔwɔlɔ, izzit, la lɛppyɛɛk za lɛbbɔlnɛ, 5la kɛkangala ikangala ɛkɛtɛ ɔkkpɛlɛ. Bɛfɛɛn ’byɔng bissi ka balɔɔt ba ippyam abbɛ isini bbwak lile, basi lɔkkwɔɔn a kɔlɔɔk ka tɔkɔlɔ lɛyanga. Battina battɛ luzɔɔm lulenɛ ɛtɔk ya ɔlɔɔt ɔssɛnɛ ɔyyɛɛpmɛ. 6Kule kule luzɔɔm lɔnaang mung ɔlɔɔt ɔyyɛɛpmɛ, ulenɛ ka bwa ɔyanganɛ bufimmɛnɛ. 7Idɔkɔ ikɔɔm ’bɔng iffu ka vveeng ’wɔng? Bulɔk ba bule! Ngkka ile isam ’bɔng igbata ka vveeng ’wɔng? 8Ka kulenɛ ning, ilenɛ ibba la kazzi lɛyanga, ifɔngɔ bulɔk lɛbɛlɛ lɛggyan. 9Balɔɔt ba baggyannɛ iyyɛɛp battɔ ka bubbi bakaabɛ ka ɔnnya bizingizingi ikkɔlɔ. Ɔnnya ’wɔng baang uttulunɛbɛ ɔzzɔɔk bataak lɛkɔɔl. 10Bubbi ɔkkpɛlɛ bussi ka kusapa ikkpoko. Balɔɔt balɔk bakɔɔngbong ka kɛggyan ikkpoko basɛlɛ kiyila, bakɔɔng ka kɛbbɔl livve. 11Ɔzzànga annɔ, ɔlɔɔt Ɔlɔɔmɔlɔɔm, bɛfɛɛn ’byɔng bitunwɔ. Lutini ’gwɔng, abum kɔbɛtɛwɔ aggyan kuddu: Atele Ɔlɔɔmɔlɔɔm, ayanga kiyila. Wannyɔɔng ɔsaapwɔ. Abbɔ akama. Akɔɔm bɛtɛbɛtɛ. 12Kɔbɛtɛwɔ gaang gaang ka ɛtɔk a kiyila ɔlɔk ayanga kuddu kwa kɛfal a kɛfal. Ɔlɔɔmɔlɔɔm ɔkkwɔɔwɔ ɔttɛ afal ning mung ka abwɔɔlɔmɛnɛ bwa ayilanɛ ka lusso ittɛɛsɛ ggbadam. 13Nbwɔɔlɔwɔ ka lusso Ɔlɔɔmɔlɔɔm wa unnyinɛ bɛfɛɛn ɔkkpɛlɛ kuddu, la ka lusso a Christ Jesus, wa ubeenɛ ittɛɛsɛ lɔkkwɔɔn a kɔlɔɔk ka lusso a Pontius Pilate nttɛ, 14atele lafɔɔ alokozɛ doddo afɔngɔ kɛttɔ ka azzɛ, ɔddɔkɔddɔkɔ ɔffɔ Kɛtɔm sa Uyini ayyɔɔt Jesus Christ ule uffu. 15Ɔlɔɔmɔlɔɔm wa ulenɛ bɔfɛɛn a latele, Ɔkɔɔm-ɛfɛɛn keem, Ubeet a babeet ɔkkpɛlɛ, Uyini bayini ɔkkpɛlɛ, ule ɔkɔɔm Jesus uffu ka ɛkɛtɛ ya bbwak. 16Ɔlɔɔmɔlɔɔm kɛyɔɔng usinɛ libbe. Ullu ka buppwolo bwa ɔlɔɔt usinɛ likkwoong ɔwɔkɔ lusso. Ɔlɔɔt wa ulemɛnɛ lɛyɛn ba ule. Ɔlɔɔt wa ule ukkwoong ɔyɛnmɛ baala ule. Latele la lakke lale za ammɛ kɛfal a kɛfal. Kulening. 17Abwɔɔlɔ balɔɔt ’bɔng baang ba ɔyyɛɛpnɛbɛ la bɛfɛɛn a vveeng ’wɔng mung attɛ tɛ̀ttɛ́ ɔkkyaabɛ battɛ iyyɛɛp vvenɛ innyibɛ duu bwa baggyannɛ. Lutini ’gwɔng baloko ittina abbɛ ka Ɔlɔɔmɔlɔɔm. Ammɛ wa uggwoomnɛ kɔlɔɔk, unnyi ɔlɔɔt ɔkkpɛlɛ bɔfɛɛn bwa ɔggyannɛ. 18Abwɔɔlɔbɛ banaang budoddo. Banaang budoddo gaang gaang, baggwoom kɔlɔɔk. Bazzi bɛfɛɛn bya bayanganɛ babɛkɛ bannyi balɔɔt balɔk ɛkɛtɛ ɔkkpɛlɛ. 19Banaangnɛ ning vvenɛ baloko libɔngɔlɔ iyyɛɛp ya ile isi lɛbɛpɛ ka ussoonɛ. Tɛttɛ bɔk bakkwoong bayanga kuddu kwa kulenɛ kwa bbwak. 20Timothy, aloko bwa Ɔlɔɔmɔlɔɔm ulewɔnɛ linnyi kɛppyɛɛk doddo. Tɛ̀ttɛ́ alɔɔk kɛlɔɔk sa kɛbbɔlnɛ, ɔlɔk vvenɛ akangala ikangala ya isinɛ lɛyyɛɛp ya bazingizingi bakkwɔɔnɛyɛ “Bisana.” 21Balɔɔt balɔk battina battɛ basan kɔlɔɔk, kwakkwɛ balenɛ ɛtɔk a kiyila lɛssɛɛp. Ppyɛɛ Ɔlɔɔmɔlɔɔm ubee la annyɔɔng ɔkkpɛlɛ.

will be added

X\