1 TIMOTHY 5

1Tɛ̀ttɛ́ awɔlɔ ɔgɛlɛnya ɔlɔɔt, ɔzzànga abapmɛ kɔlɔɔk tɛ̀ttɛ̀ ulenɛ ssaawɔ. Akɔɔm bakolobya ɔkkpɛlɛ tɛ̀ttɛ̀ ikpana annɔ. 2Akɔɔm bagɛlɛnya bwanavva tɛ̀ttɛ̀ issakawɔ annɔ. Akɔɔm bazozo tɛ̀ttɛ̀ itele annɔ la luppyam gwa doddo. 3Atele bwanavva ba bwalam abbɛ babbenɛ bakɔngɔbɛ basɛlɛ uttele-uttele. 4Ɔzzànga wanavva ubbu ɔyanganɛ bwɔɔn balenɛ bagɛlɛnya lɛnaang, bakɔɔm ɛtɔk bakkoopbong kɔlɔɔk a luzɔɔm basan tɛ̀ttɛ̀ bale bakkwoong bakɔɔm abakka abbɛ. Banaang ning mung batak ippwoot a kɛkɔɔm sa ibakka la ibassɛ la bagɛlɛnya bakɔɔmnɛbɛ abbɛ. Nkwɔng kulenɛ kwa kɔsaapnɛ Ɔlɔɔmɔlɔɔm gaang gaang. 5Wanavva wa ulenɛ wanavva-ubbu ka lɔkkwɔɔn ɔsɛlɛ ɔlɔɔt wa ɔkɔɔmmɛnɛ, ɔsam luttina ammɛ uloko ka Ɔlɔɔmɔlɔɔm, ɔzɔɔm ɛkɛtɛ ɔkkpɛlɛ ɔbapmɛ ɔttɛ uttelemɛ kikoon la kɛtɔm. 6Ɔzzànga wanavva-ubbu wa ɔsamnɛ luttina ammɛ unnyi kizzi kuddu la bwaanbwalam, wanavva ’wɔng baang ɔggba libbe mkkpa ndɔk utii ka kuddu. 7Attamabɛ nkwaaning basi kibbi lizzi, balɔɔt balɔɔkbɛ. 8Ɔlɔɔt usinɛ inaaka likkwoon ɔppyɛɛk doddo, gaang gaang balɔɔt a kɛsana ssala ammɛ biini, usibong kiyila lɛyanga. Ammɛ ɔppyɛɛbong ɔtta lɛbbɔl ɔsak ɔlɔɔt wa ɔsɛlɛnɛ kiyila. 9Tɛ̀ttɛ́ asam lɛkɔɔl a wanavva ubbu ɔlɔk agbaa la lakɔɔl a bwanavva babbu balɔk, wanavva ’wɔng baang ɔtakabong ɔkkpɛɛm, ɔggbamɛ lalɔp a likkpa lakkyaat la kitele. Ɔgbaa utiimɛ walam vvɔn keem ka ullunɛ tɛ̀ttɛ̀ ubbe ɔkɔngɔmɛ. 10Ule wanavva wa ɔyyɛɛpnɛ eleme, ɔkɔɔm bwaan ammɛ doddo. Ukkwoong ukeke ukekeen. Ɔnaang bɛfɛɛn a latele unnyi babbɛ bayanga kiyila. Uttele balɔɔt ba battɔnɛ ka kɔlɔɔk, kɔbɛtɛmɛ ka kɛnaang a budoddo ka itɔk ɔkkpɛlɛ. 11Tɛ̀ttɛ́ assɛɛn lakɔɔl a bwanavva babbu ba batiinɛ bazozo. Ba ippyam abbɛ ile idɛmbɛ baggyan killu bwalam balɔk, bakkyaa kwa Christ bafɔngɔ. 12Balɔɔt vvenɛ bakpɛnbɛ ka balenɛ ka kɔlɔɔk lɛttɔ ka babɛpɛnɛ nsekele abbɛ wa battenɛ lɛnaang la luzɔɔm ka ikeeng. 13Ɔgbaa vvenɛ babɛpɛ ɛkɛtɛ ka kɛssɛ kikkpit kɛmal ka ggwoon ’gwɔng kɛtta ka gwakang. Vvenɛ bakama-ɔkama babbɔl ka bale bakkoop kɛlɔɔk a balɔɔt ka isimi kɔbɛtɛbɛ ka kɛnaang a balɔɔt balɔk. Bassɛ gbɔɔgbɔɔgbɔɔ balɔɔk lilɔɔk sa businɛ lɛlɔɔk. 14Kwakkwɛ nttinanɛ nttɛ kule kɔtta lɛyyɛɛp ka bazozo ba bwalam abbɛ babbenɛ bakɔngɔbɛ ballunɛ bwalam balɔk ɔlɔk bamaat bwɔɔn, bakkwoong bakɔɔm ssala abbɛ doddo nkwaaning basi balɔɔt a kɔfɔk ayyɔɔt kufuk linnyi kwa kɛlɔɔk a bubbi kitumyɛlɛ. 15Bwanavva babbu balɔk bassangbong basikili basseke ka bakupnɛ Satan. 16Ɔzzànga ɔlɔɔt wa ukupnɛ Jesus ɔyanganɛ bwanavva ba bwalam abbɛ babbenɛ bakɔngɔbɛ ka itutum ammɛ, ɔkɔɔmbɛ doddo. Tɛ̀ttɛ́ ɔsam lɛtɔkɔ ’zɔng baang ufeek luzɔɔm, nkwaaning luzɔɔm lukkwoong lɔkɔɔm bwanavva babbu ba basɛlɛnɛ ɔkɔɔm-ɔkɔɔm. 17Bagɛlɛnya ba banaangnɛ kɛnaang sa doddo tɛ̀ttɛ̀ bazzilɛttɔ bale ba batɔknɛ ikipili ya lɛbaang a lɛbaang, gaang gaang bagɛlɛnya ba banaangnɛ kɛnaang kɔbɛtɛbɛ ka kɛbwɔɔlɔ lɛmmwɔɔl Ɔlɔɔmɔlɔɔm, la lukopolo. 18Luvva Ɔlɔɔmɔlɔɔm lɔttɛnɛ, “Tɛttɛ aggbɔ ɔgɔdɔ kamma ka ɛkɛtɛ ya ulenɛ ka kitup alaasi.” “Uyilabɔtɔɔm uzzi labɔɔk isapala.” 19Tɛ̀ttɛ́ agɔpɔlɔ kɔlɔɔk kwa kɔbbɔlnɛ kwa ɔlɔɔt ɔlɔɔknɛ utum ɔgɛlɛnya atakabong appyeekwɛ ka kamma ittɛɛsɛ iffa ɔlɔk ikkyaat. 20Awɔlɔ balɔɔt ba banaangnɛ bubbi ppwool ppwool ka lusso balɔɔt ɔkkpɛlɛ, nkwaaning ba bassekenɛ ɔbbwɔpɔbɛ. 21Ka lusso Ɔlɔɔmɔlɔɔm la Christ Jesus, la bayilabɔtɔɔm-Ɔlɔɔmɔlɔɔm, nkkwɔɔwɔ ka luzɔɔm Ɔlɔɔmɔlɔɔm nttɛ atele lɔttama ’gwɔng, afɔngɔ ɔlɔɔt wa ɔsaapwɔnɛ keem kitele ka kɔlɔɔk duu kwa anaangnɛ. 22Tɛ̀ttɛ́ azzuma asam labɔɔk annɔ atele ɔlɔɔt, anaangmɛ ppyɛɛ attɛ ɔnaang kɛnaang Uyini. Tɛ̀ttɛ́ atɔk bubbi balɔɔt balɔk azzenge; ataa zzekep assekebɛ. 23Tɛ̀ttɛ́ avva bannyi keem. Avva waan a batak ssup agbaa wa ule uttelewɔ lɛmmɛ lɛnaangwɔ ppwool; ka alenɛ ɔlɔɔt wa ɔffaakwɔnɛ gbɔɔgbɔɔ. 24Bubbi balɔɔt balɔk kɛyɛn ba bukoolo. Bubbi abbɛ bukɔɔmnɛ ɛtɔk bumii kɛkaal bukɔngɔbɛ abbɛ biini. Ɔzzànga bubbi bwa balɔɔt balɔk bummɛbong tɛ́ttɛ́ ayɛnbwɛ. 25Kule kɛssanga ssɔn, linaang sa doddo ayɛnsɛ kkpelegedee, gɔɔ linaang sa lisinɛ sa doddo lile ba likkwoong liddumu.

will be added

X\