1 TIMOTHY 4

1Kuyeeng-Ɔlɔɔmɔlɔɔm kɔlɔɔkbong ppwool kɔttɛ ulenɛ lɛnaang, balɔɔt balɔk vvenɛ bakkyaa kiyila bazzɔɔk. Vvenɛ bappyɛɛ bayila kwa bakkala lɛlaak a liyeeng, bakup lukopolo ubbu. 2Lukopolo ’gwɔng mung lussi ka bakkala lalaak a balɔɔt. Abbɛ balenɛ ba ittina abbɛ ilenɛ libbe, ayɛnnɛ attɛ bakkɔm ka ukolo kɛfɔl a lɔkɔɔn. 3Abbɛ balenɛ balɔɔt ba bakopolonɛ battɛ bbwak ba kule ka ɔlɔɔt ɔtɔknɛ wanavva, ɔlɔk azzi kɛssanga kazzi ’sɔng ɔlɔk ’sɔng kang. Ɔzzànga Ɔlɔɔmɔlɔɔm ɔlɔɔmnɛ bɛfɛɛn ’byɔng baang ɔkkpɛlɛ ɔttɛ bile bya kuzzi, ka àlenɛ́ lɛzɔɔm awomo Ɔlɔɔmɔlɔɔm kɛnaang ka unnyiwɔnɛbyɛ. Balɔɔt ba bayanganɛ kiyila bale lɔkkwɔɔn a kɔlɔɔk lɛsan banaang ning. 4Bɔfɛɛn ɔkkpɛlɛ bwa Ɔlɔɔmɔlɔɔm ulenɛ lɛlɔɔm buyyɛɛpɔyyɛɛp. Bwa kifim ba bule. Ɔkkpɛlɛ abbyɛ bile bya kɛtɔk la kiwomo kɛnaang. 5Lɛmmwɔɔl Ɔlɔɔmɔlɔɔm la nzɔɔm bɛnaangnɛ Ɔlɔɔmɔlɔɔm ɔtɔk bɔfɛɛn. 6Abwɔɔlɔnɛyɔng ikpana ayyɔɔt lilɔɔk ’sɔng mung nzang vvenɛ aleyɔng ibɔɔyi a Christ Jesus ya doddo ka annyiwɔnɛyɔng kɛyɔɔng kazzi Kuyeeng la lɛmmwɔɔl a lɔkkwɔɔn a kɔlɔɔk kwa alenɛyɔng likup. 7Agbata assekeyɔng kɛkkala lɛlaak ibala ’sɔng baang sa kisinɛ kwa Ɔlɔɔmɔlɔɔm lɛsan. Ibala ’yɔng baang ba ile ya kɛzza lɛmmwɔɔl kitum ka nakanaka. Alokoyɔng lafal annyɔɔng ka lukkoop a kɔlɔɔk kwa kɔsaapnɛ Ɔlɔɔmɔlɔɔm. 8Kɛggwɔkɔ a kkwɔɔt kɛyanga isak ka ɛtɔk ya assɛ. Ɔzzànga kɛnaang kwa Kuyeeng kɔggyannɛ kɛyanga isak ka itɔk ɔkkpɛlɛ, ka kinnyinɛyɛlɛ kuddu kwa gedegede mung la kwa lusso. 9Mung kɔlɔɔk a lɔkkwɔɔn kwa Ɔlɔɔt ɔkkpɛlɛ ule ɔtɔk kwɛ. 10Kwakkwɛ baang ibumnɛ inaang kɛnaang gaang gaang ka ilenɛ ittina ayyɔɔt lɛsam iloko ka Ɔlɔɔmɔlɔɔm a kuddu wa ulenɛ Ɔkkala-ikkala balɔɔt ɔkkpɛlɛ. Gaang gaang balɔɔt ’bɔng baang ba bayilanɛ kwa ammɛ. 11Akopolo, abwɔɔlɔbɛ bɛfɛɛn ’byɔng mung ɔkkpɛlɛ. 12Tɛ̀ttɛ́ afɔngɔ ɔlɔɔt ɔlɔk ɔtɔkwɔ ka ikpɛnɛ ka alenɛ lɛffɔ ale waan. Ataa tɛ̀ttɛ̀ iyɔɔ bayanga-kiyila ka bikingi annɔ, la linaang, la kɛsaap sa ayanganɛ, la kiyila sa ayanganɛ la bɔllɛ eleme. 13Asam ɛkɛtɛ annɔ ɔkkpɛlɛ la lakke za ayanganɛ annyi ka kɛkkwɔɔ lɛmmwɔɔl Ɔlɔɔmɔlɔɔm kɛbwɔɔlɔ ɔlɔɔt ɔkkpɛlɛ la kɛbwɔɔlɔ lɛmmwɔɔl, la lukopolo ɔddɔkɔddɔkɔ nffu. 14Tɛ̀ttɛ́ akkyaa lɛsɔɔk ’zɔng baang za Kuyeeng kulewɔnɛ linnyi azzɔɔk. Azzɛ lilenɛ za Kuyeeng kunnyiwɔnɛ ka ɛkɛtɛ bayilabɔtɔɔm Ɔlɔɔmɔlɔɔm la bagɛlɛnya batolonɛ basam labɔɔk batelewɔ. 15Akkoop bɛfɛɛn ’byɔng mung asamwɔ kɛyɔɔng annyibyɛ, ɔkkɔɔnɛ balɔɔt bayɛn lɛmmala kɛnaang annɔ. 16Akatwɔ kɛyɔɔng. Asan tɛ̀ttɛ̀ akopolonɛ. Ɔkkaamwɔ ning baang. Anaang ning, vvenɛ akkalawɔ kɛyɔɔng ɔgbaa la balɔɔt ba bagɔpɔlɔwɔnɛ.

will be added

X\