1 Mung kɔlɔɔk a lɔkkwɔɔn: Ɔlɔɔt kɔbɛtɛmɛnɛ ɔttɛ ule ɔgga ka luzɔɔm, ɔlɔɔt ’wɔng baang ɔkkɔlɔbong kɛnaang sa kɛttanɛ bɛnaang ɔkkpɛlɛ lɛyyɛɛp. 2 Ɔlɔɔt wa uzzinɛ bugga luzɔɔm, ule ɔlɔɔt wa usinɛ tɔkɔtɔkɔtɔkɔ lɛnaang. Ɔtɔk wanavva vvɔn keem. Ule ɔlɔɔt wa ukkwoongnɛ uttina kɔlɔɔk. Ukkwoong ɔbwɔɔp luppyam ammɛ kɛyɔɔng. Ukekeen ɔsaapmɛ, ukkwoong lukopolo. 3 Tɛ̀ttɛ́ ɔvva batak ubimi. Tɛ̀ttɛ́ ule ɔnyanga-binyanga. Ɔnaang kɔlɔɔk bɛtɛbɛtɛ, bɔkaat busaapmɛ. Tɛ̀ttɛ́ ule ɔlɔɔt wa ɔsaapnɛ ikkpoko. 4 Ukkwoong ɔkɔɔm wanavva ammɛ la bwɔɔntiti doddo. Ɔnaang bwɔɔn ammɛ batelemɛ. 5 Ɔlɔɔt usinɛ likkwoong ɔkɔɔm kɛsana-ssala ammɛ, ule ɔnaang nang ukkwoong ɔkɔɔm luzɔɔm Ɔlɔɔmɔlɔɔm? 6 Ɔfɔngɔ ɔlɔɔt wa ussumanɛ ka luzɔɔm lɛmal lile. Nzang vvenɛ ɔkkyaamɛ ɔttɔ ka kɔlɔɔk a Satan. 7 Ule ɔlɔɔt wa balɔɔt ba basinɛ ka luzɔɔm lile batelemɛnɛ bagbaa, nkwaaning basimɛ kɔlɔɔk izzit lɛnaang badɛmmɛ umii ɔttɔ ka ɔnnya Satan. 8 Balɔɔt ba bayaamnɛ ka kɛnaang a luzɔɔm bassɛ bale balɔɔt ba bayyɛɛpnɛ eleme. Kɔlɔɔk a luzɔɔm kulebɛ ka luppyam. Tɛ̀ttɛ́ bavva batak basak. Tɛ̀ttɛ́ ikkpoko isaapmɛ gaang isak. 9 Bakɔɔm iyɔɔ kiyila kkpɔk ka luppyam gwa doddo. 10 Eleme balɔɔt ’bɔng baang èlébong la kɛllɛ. Bàsákbong illɛ ’yɔng baang tɛ́ttɛ́ banaang kɛnaang. 11 Bwanavva abbɛ bale la ileme ya doddo. Bafɔngɔ kɛlɔɔk a balɔɔt ka isimi. Bakkwoong battina kɔlɔɔk bafɔngɔ kɛkkaala lɛlaak. 12 Ɔlɔɔt wa ɔyaamnɛ ka kɛnaang a luzɔɔm ɔtɔk wanavva vvɔn keem. Ukkwoong ɔkɔɔm kɛsana-ssala ammɛ doddo. 13 Balɔɔt ba banaangnɛ doddo bayanga kibee sa bbwak sa babbɔnɛ balɔɔk kɔlɔɔk batum kiyila abbɛ ka Jesus Christ. 14 Nkkpɔk lɛmmwɔɔl ’zɔng mung nfeewɔyɔng, nttina nttɛ baala ɔmmɛ tɛ́ttɛ́ nffu nkoolowɔyɔng. 15 Ɔzzànga nsinɛ lɛkka liffu, asanyɔng ka lɛmmwɔɔl ’zɔng mung tɛ̀ttɛ̀ ile ikɔɔmyɛlɛ kɛyɔɔng ka kɛkaan a balɔɔt a ssala Ɔlɔɔmɔlɔɔm. Abbɛ balenɛ luzɔɔm a Ɔlɔɔmɔlɔɔm a kuddu gwa lulenɛ likoop la ufik-a-lɔkkwɔɔn-a-kɔlɔɔk. 16 Ɔlɔɔt wa ukkwoongnɛ ɔkala bɔttala kɔlɔɔk a lalup a luzɔɔm ayyɔɔt ba ule: Ɔtta ka vveeng la Ɛkkpakkwɔɔt ɔlɔɔt, Kuyeeng kɔyɔɔ ɛkpansi kɔttɛ ule bbwak. Bayilabɔtɔɔm-Ɔlɔɔmɔlɔɔm bayɛnmɛ. Bakopolo kɔlɔɔk ammɛ ka ikaan ɔkkpɛlɛ, bayila kɔlɔɔk ammɛ ka ɛkpansi ɔkkpɛlɛ, Basammɛ umii ka libat.
