1 TIMOTHY 2

1Ka kɛkɔɔm ɛtɔk a kɔlɔɔk, nggyan nttɛ lakkpenge la luzɔɔm la kɛbap a bɛfɛɛn la kiwomo kɛnaang ɔkkpɛlɛ bile bya ibapnɛ Ɔlɔɔmɔlɔɔm innyi 2babeet la bayanga lakke la ɔssɛbibit ɔkkpɛlɛ, nkwaaning itaa kɛtaa sa bbɛɛm ka bɔkaat, inaang linaang sa Ɔlɔɔmɔlɔɔm ɔggyannɛ ɔttɛ inaang. 3Nkwɔng kɔyyɛɛpnɛ kɔsaap Ɔlɔɔmɔlɔɔm ɔkkala ikkala ayyɔɔt. 4Ammɛ wa ɔggyannɛ ɔttɛ baddu kuddu kwa kɛfal a kɛfal ɔkkɔɔnɛ basan lɔkkwɔɔn a kɔlɔɔk. 5Ɔlɔɔmɔlɔɔm ule vvɔn keem, ɔlɔɔt ule vvɔn keem wa ulokonɛ Ɔlɔɔmɔlɔɔm la balɔɔt ka bɔkaat. Ammɛ ulenɛ Christ Jesus, 6wa ɔsammɛnɛ kɛyɔɔng unnyi nkwaaning ɔsanga balɔɔt ɔkkpɛlɛ ka kɔlɔɔk. Uwɔng baang ɔ̀dɔkɔ̀nɛ́ iyɔɔ ka ɛkɛtɛ ya bbwak ittɛ Ɔlɔɔmɔlɔɔm ɔggyan ɔttɛ ɔkkala ɔlɔɔt ɔkkpɛlɛ. 7Kwakkwɛ baang batɔɔmmɛnɛ battɛ nzzanga Uyilabɔtɔɔm Jesus wa Ikanakana la ukopolo-lukopolo abbɛ. Nbwɔɔlɔbɛ lɛmmwɔɔl a kiyila la lɔkkwɔɔn a kɔlɔɔk. Lɛlaak ba nkkala, nlɔɔk lɔkkwɔɔn a kɔlɔɔk. 8Nggyan nttɛ bwaanbwalam ka ifɛɛn ɔkkpɛlɛ keem bazɔɔm ka luzɔɔm la ggwɔn. Abbɛ ba balenɛbɛ kɛyɔɔng lɛsam bannyi Ɔlɔɔmɔlɔɔm bakkwoong bayeek labɔɔk abbɛ ka libat bassɛɛn luzɔɔm, kutun a kɔlɔɔk la ikangala bisi lile. 9Ɔgbaa nggyan nttɛ bwanavva basan kɛssanga iwɔkɔlɔ ya bawɔkɔlɔnɛ. Bawɔkɔlɔyɛ doddo. Tɛ̀ttɛ́ banaang kittulu kitook basak. Tɛ̀ttƐ́ bawɔkɔlɔ bɛfɛɛn bya banaanɛbyɛ la gold, ɔlɔk ifɔɔk akpana. Tɛ̀ttɛ́ bawɔkɔlɔ iwɔkɔlɔ ya iyyɛɛpnɛ isak ɔlɔk ikkaam kappya, 10banaang linaang sa doddo sa bbwak sa wanavva wa uttinamɛnɛ kɛyɔɔng ɔttɛ ule wa luzɔɔm Ɔlɔɔmɔlɔɔm ɔnaangnɛ. 11Bwanavva bakkoop kɔlɔɔk zzum zzum ka luzɔɔm la luppyam gwa latele. 12Ba nyila bwanavva bakopolo ɔlɔk bayanga lakke basak bwaanbwalam. Bataa zzum kulak. 13Ɔlɔɔmɔlɔɔm ɔdɔkɔ uteem Uyya (Adam) lɛlɔɔm tɛ́ttɛ́ ɔlɔɔm Uzoo (Eve). 14Uyya lissi ɔdɔkɔnɛ wa Satan ɔfɛɛtmɛnɛ. Ɔdɔkɔ Uzoo ka Satan ɔfɛɛtnɛ ɔbɛpɛ lafɔɔ Ɔlɔɔmɔlɔɔm. 15Ɔzzànga vvenɛ ule wa kɛkkala ɔyanganɛ bbwɔɔn, ukkwoong ɔkɔɔm kiyila ammɛ kkpɔk, ɔyanga kɛsaap ka luppyam la bɔllɛ lɛfal ɔbɛtɛ la kɛsan a kɔlɔɔk.

will be added

X\