1 TIMOTHY 1

1Lɛmmwɔɔl ’zɔng lissi ka anaam Paul, uyilabɔtɔɔm a Christ Jesus. Nkkpɔk ka lakke Ɔlɔɔmɔlɔɔm, Ɔkkala ikkala ayyɔɔt, la Christ Jesus wa ulenɛ luttina ayyɔɔt, 2nfee Timothy, waan anaam wa lɔkkwɔɔn ka kiyila. Dedde, Ɔlɔɔmɔlɔɔm, la Christ Jesus, Uyini ayyɔɔt, banaangwɔ ppyɛɛ, abbebɛ lɛttɔ, bannyiwɔ bɔkaat. 3Nggyan nttɛ ataa ka Ephesus tɛ̀ttɛ̀ nddawɔnɛ ka ɛkɛtɛ nlenɛ ka kimii Macedonia. Balɔɔt balɔk bale baang ka bakopolonɛ lukopolo gwa lusinɛ bbwak lile. Abwɔɔlɔbɛ bakkyaa lukopolo ’gwɔng baang bafɔngɔ. 4Abwɔɔlɔbɛ bakkyaa lilɔɔk sa lisinɛ ka lɔkkwɔɔn lile bafɔngɔ la uggbɔng a lakɔɔl a balɔɔt iyɛddɛ-iyɛddɛ. Lilɔɔk ’sɔng liggyan ikangala keem. Ba banaang kwa Ɔlɔɔmɔlɔɔm ɔggyannɛ. Akkwɛ asankwɛ ka kiyila. 5Lɔdda ’gwɔng mung lɔggyan lɔttɛ kɛsaap kissiwɔ ka luppyam gwa doddo, la luttina gwa ppwool la kiyila sa kissiwɔnɛ ka luppyam. 6Balɔɔt balɔk bafimbong ’kwɔng mung bassɛɛp ɛtɔk ka kikun a kutolo. 7Baggyan battɛ bale bakopolo lafɔɔ Ɔlɔɔmɔlɔɔm ɔzzànga ba basan bwa abbɛ biini balɔɔknɛ ɔlɔk vvenɛ basan lɛkkɔ za batolonɛ. Ɔzzànga batolo la kibbe luppyam ɔkkpɛlɛ. 8Isan lɔsan ittɛ Lafɔɔ layyɛɛpɔyyɛɛp ulenɛ bɔfɛɛn a akɔɔmnɛzɛ bbwak. 9Ikke isan ittɛyɔng lafɔɔ ba bassɛɛn kwa banaang a budoddo. Bassɛɛn lafɔɔ kwa balɔɔt ba babɛpɛnɛ lafɔɔ la bazzɔɔk a kɔlɔɔk, la balɔɔt ba basinɛ Ɔlɔɔmɔlɔɔm lɛsan, la banaang a bubbi, la balɔɔt ba basinɛ bbwak la Ɔlɔɔmɔlɔɔm lile, la balɔɔt ba bawwɔɔlnɛ ibakka la ibassɛ, la bawwɔɔl a balɔɔt, 10la bassɛ kɛzak, la bwaanbwalam ba bazaknɛ abbɛ abbɛ, la balɔɔt ba bakaanɛ balɔɔt ka itɔk, la bakkala-lalaak, la balɔɔt ba banaangnɛ kwa kusinɛ bbwak la lukopolo gwa lɔkkwɔɔn lile. 11Lukopolo ’gwɔng mung gwa lulenɛ gwa lɔkkwɔɔn lule ka Kuttu-Budoddo Ɔlɔɔmɔlɔɔm unnyinɛnɛ ɔttɛ nbwɔɔlɔ balɔɔt. Akkwɛ kussinɛ ka Ɔlɔɔmɔlɔɔm a lakke la latele. 12Nwomo Christ Jesus, Uyini ayyɔɔt, wa ulenɛnɛ lakke linnyi ka kɛnaang anaam. Nzɔnɔmɛ kɛnaang ka uttinanɛ ɔttɛ nle wa bbwak tɛ́ttɛ́ ɔsanganɛ ɔttɛ nnaang kɛnaang ammɛ. 13Mkkpa ndɔk nsi budoddo lɛlɔɔk ntummɛ ka iyaadɛ. Nyɔɔ balɔɔt ammɛ akama. Nyɔɔkamɛ ammɛ biini. Ɔzzànga Ɔlɔɔmɔlɔɔm nbbemɛbong lɛttɔ ka nsinɛ kiyila lɛyanga ndɔkɔ nsi lɛsan bwa nnaangnɛ. 14Ɔzzànga Uyini ayyɔɔt ɔnaangnɛ bong ppyɛɛ ɔttala. Unnyinɛ kiyila la kɛsaap. Abbyɛ bilenɛ bya ayyɔɔt la Christ Jesus ka bɔkaat. 15Uwɔng kɔlɔɔk a lɔkkwɔɔn kwa atɔknɛkwɛ ɔkkpɛlɛ akkwɛ ayila kwa akkwɛ. Christ Jesus uffu ka vveeng ’wɔng kɛkkala banaang a bubbi. Anaam nttanɛ banaang a bubbi ɔkkpɛlɛ lɛbbɔl. 16Keem nbbe Ɔlɔɔmɔlɔɔm lɛttɔ nkwaaning Christ Jesus ɔyɔɔ kibbe luppyam ammɛ la anaam wa nttanɛ bubbi lɛnaang. Kɔtaa kɛtaa iyɔɔ ya ɔyɔɔnɛ balɔɔt ba bale bayila kwa ammɛ baddu kuddu kɛfal a kɛfal. 17Lakke la latele lale za Ubeet a Kɛfal a kɛfal, wa usinɛ libbe, isimɛ lɛyɛn, ule Ɔlɔɔmɔlɔɔm wa kɛfal a kɛfal! Kulening. 18Timothy, waan anaam, nsekelewɔbong lakke ’zɔng. Kule tɛ̀ttɛ̀ lɛmmwɔɔl a biyɛnɛ za baggbanɛ lɛlɔɔk batumwɔ. Akɔɔm lɛmmwɔɔl ’zɔng baang tɛ̀ttɛ̀ bɛfɛɛn a kullu ɔkkɔɔnɛ allu kullu kɔyyɛɛp. 19Akɔɔm kiyila annɔ kkpɔk la luttina gwa doddo. Balɔɔt balɔk bale baang ba batakanɛ kwa luttina abbɛ lɛgɔpɔlɔ, kiyila abbɛ kile lɛbɛpɛ. 20Abbɛ balenɛ Hymenaeus la Alexander la balɔɔt balɔk ba nlenɛbɛ lɛtɔk nssɛɛn Satan ka kɔbɔɔk, nkwaaning oggbe ukpekebɛ kɛlɔɔk a babbu lilɔɔk kitum Ɔlɔɔmɔlɔɔm.

will be added

X\