1 THESSALONIANS 4

1Ikpana anaam, akkoopyɔngbong ka ayyɔɔt tɛ̀ttɛ̀ ale akɔɔmyɔng lafal annyɔɔng kɔsaap Ɔlɔɔmɔlɔɔm. Nsan lɔsan nttɛ ’wɔng ulenɛ ɛtɔk ya aggbanɛ lissi anaangyɔng. Ɔzzànga gedegede mung ikkpengewɔyɔng lukkpenge ka lakke Jesus Uyini, itutwɔyɔng ɔgbaa ittɛ anaangyɔng gaang gaang agbaayɔng. 2Asanyɔng lɔsan attɛyɔng lukopolo gwa ikopolowɔnɛyɔng idɔkɔ ikopolowɔyɔng ka lakke Jesus, Uyini. 3Nkwɔng mung kulenɛ kwa Ɔlɔɔmɔlɔɔm uttinanɛ utumwɔyɔng annyɔɔng. Ɔggyan ɔttɛ ataayɔng ka budoddo ɔkkpɛlɛ, afɔngɔyɔng kikup a bwanavva balɔɔt gbɔɔ-gbɔɔ-gbɔɔ. 4Annyɔɔng bwaanbwalam, asanyɔng tɛ̀ttɛ̀ akɔɔmnɛyɔng bwanavva annyɔɔng doddo atɔkyɔngbɛ ka latele. 5Tɛ̀ttɛ́ ateleyɔng zzeen ka bwanavva balɔk tɛ̀ttɛ̀ balɔɔt ba bazɔɔmnɛ ilat basi kwa Ɔlɔɔmɔlɔɔm lɛsan, banaangnɛ. 6Ka kulenɛ ning, ɔlɔɔt ɔlɔk tɛ̀ttɛ́ ɔnaang kɔlɔɔk kɔlɔk kwa kɔbbɔlnɛ la wabbɛ, ɔlɔk vvenɛ ɔnaangmɛ kɛbɛtɛ. Ibwɔɔlɔwɔyɔngbong kkpal, ittamawɔyɔng ittɛ Uyini vvenɛ ɔyɔɔ balɔɔt ba banaangnɛ babbu lilɔɔk ’sɔng baang akama. 7Ɔlɔɔmɔlɔɔm usiyɛlɛ lɛkkwɔɔ ɔttɛ ifal lɛfal a kɛssɛ?-?kɛzak. Ɔkkwɔɔyɛlɛ ɔttɛ ifal lɛfal za doddo. 8Kwakkwɛ ɔlɔɔt duu wa ufimnɛ lukopolo ’gwɔng mung, ukopolo?-?lukopolo lissi ka ufimnɛ, ufim Ɔlɔɔmɔlɔɔm wa unnyiwɔnɛyɔng Kuyeeng ammɛ. 9Kɔlɔɔk kɔlɔk ba kɔbɛlɛ lile kwa nle nbbal lɛkkpɔk ntum, ɔgbaa la kɛttɛ annyɔɔng bayanga-kiyila ka Uyini asaapwɔyɔng kɛyɔɔng; Ɔlɔɔmɔlɔɔm ukopolowɔyɔngbong tɛ̀ttɛ̀ wannyɔɔng ule ɔsaapwɔyɔng. 10Akɔɔmyɔngbong eleme ’yɔng mung ka lɔkkwɔɔn la ikpana annyɔɔng ɔkkpɛlɛ ka Macedonia. Ikpana ayyɔɔt, ikkpengewɔyɔng lukkpenge ittɛ anaangyɔng gaang gaang agbaayɔng. 11Kɔbɛtɛwɔyɔng kwa buzum. Appyɛɛkyɔng ɛtɔk ya annyɔɔng ssɔng, akɔɔmwɔyɔng kɛyɔɔng ɔlɔk ataayɔng tɛ̀ttɛ̀ iggbawɔnɛyɔng lɛbwɔɔlɔ. 12Anaangnɛyɔng ning, vvenɛ balɔɔt ba basɛlɛnɛ kiyila batelewɔyɔng. Baala aggyanyɔng bɔfɛɛn bulɔk abapyɔng ɔlɔɔt ɔlɔk. 13Ikpana ayyɔɔt, iggyan ittɛ asanyɔng lɔkkwɔɔn a kɔlɔɔk atumyɔng balɔɔt ba balenɛ libbe nkwaaning tɔkɔlɔ usiwɔyɔng lɛbbɔl tɛ̀ttɛ̀ ɔbbɔlnɛ balɔɔt ba basinɛ kwa lufat littina. 14Ìyila ittɛ Jesus ubbe, ɔppyɛlɛ ufungala ka lubbe. Kwakkwɛ iyilanɛ ittɛ Ɔlɔɔmɔlɔɔm vvenɛ ufungala balɔɔt ba bayanganɛ kiyila batum Jesus bale libbe tɛ̀ttɛ̀ Jesus. 15Uwɔng mung ulenɛ lukopolo Ɔlɔɔmɔlɔɔm gwa ibwɔɔlɔwɔnɛyɔng. Ayyɔɔt ba ilenɛ ikokolo mung baala ikɔngɔ balɔɔt ba balenɛ libbe ka kɛtɔm ’sɔng baang sa Uyini ule uffu. 16Vvenɛ ippyee lɛmmwɔɔl Ɔkɔɔm-a-lakke, lɛmmwɔɔl Uyilabɔtɔɔm Ɔlɔɔmɔlɔɔm, lɛmmwɔɔl a luffi Ɔlɔɔmɔlɔɔm, tɛ́ttɛ́ Uyini ussi ka libat uffu kuttɔɔk. Balɔɔt ba bayilanɛ kwa Christ bale libbe, vvenɛ bakɔɔm ɛtɔk bafungala ka lubbe, 17tɛ́ttɛ́ bɔk ayyɔɔt ba ile itii ka kuddu, ɛkɛtɛ ’yɔng baang babbiyɛlɛ ɛfɛɛn kkwɔn ɔkkpɛlɛ ifeele ka kɛkaan, ka ikkpala imii ikup Uyini ka libat. Itaa bakang la ammɛ ɛkɛtɛ ɔkkpɛlɛ. 18Ka alenɛyɔng ning lippyee, akɔɔmyɔng lɛmmwɔɔl ’zɔng anaangyɔng ɔlɔɔt la vvɔn ɔwaamɛ.

will be added

X\