1 THESSALONIANS 2

1Ikpana anaam, annyɔɔng biini asanyɔng lɔsan attɛyɔng kikoolo sa iffunɛ ikoolowɔyɔng, ggbɔɔ kisi lɛttɔ kɛtaak. 2Aggbayɔng lippyee tɛ̀ttɛ̀ banaangnɛyɛlɛ babbu bɛfɛɛn, banyɔɔkayɛlɛ ka Philippi, tɛ́ttɛ́ iffu ka ɛfɛɛn annyɔɔng mung ka Thessalonica. Ɔzzànga Ɔlɔɔmɔlɔɔm unnyiyɛlɛ kɛkkaam a luppyam ɔttɛ ibwɔɔlɔ Kuttu-Budoddo ammɛ mkkpa ndɔk ikàngálá ittala. 3Kɛkkwɔɔ sa ikkwɔɔwɔnɛyɔng kisi sa kɛbbɔlnɛ lile ɔlɔk ittina kwa kɔbbɔlnɛ ippyɛɛkwɔyɔng, tɛ́ttɛ́ vvenɛ iyanga luttina gwa kɛfɛɛt ɔlɔɔt ɔlɔk. 4Lutini ’gwɔng, ilɔɔk tɛ̀ttɛ̀ Ɔlɔɔmɔlɔɔm ɔttɛnɛyɛlɛ ilɔɔk ɛkɛtɛ ɔkkpɛlɛ ka ulenɛyɛlɛ lɛbwɔɔlɔ, ɔsam Kuttu-Budoddo ammɛ unnyiyɛlɛ. Ba ibum ittɛ inaang kwa kɔsaapnɛ balɔɔt, ibum ittɛ inaang kwa kule kɔsaap Ɔlɔɔmɔlɔɔm wa ɔllɛnɛ ileme ayyɔɔt. 5Asanyɔng lɔsan ka lɔkkwɔɔn attɛyɔng kutolo kwa kɛkkala lɛlaak isi lɛkɔɔm iffu ka ɛfɛɛn annyɔɔng ɔlɔk vvenɛ ikɔɔm kɛyyɛɛp a kamma ivvoong kuwɔnɔk. Ɔlɔɔmɔlɔɔm ulenɛ tɛɛsɛ ayyɔɔt. 6Isi lɛnaang ittɛ ɔlɔɔt ɔlɔk ubunguyɛlɛ, gɔɔ annyɔɔng ɔlɔk balɔɔt balɔk. 7Nzang ikkwoong mung ibapwɔyɔng bɛfɛɛn ka ilenɛ bayilabɔtɔɔm a Christ. Ɔzzànga idɔkɔ ikɔɔmwɔyɔng doddo ka idɔkɔnɛ la annyɔɔng tɛ̀ttɛ̀ ɔmaat-a-bwɔɔn ɔkɔɔmnɛ bwaan ammɛ. 8Kɛsaap sa asaapnɛyɔngyɛlɛ kɛnaangbong iyila kinnyiwɔyɔng lafal ayyɔɔt ɔgbaa la Kuttu-Budoddo Ɔlɔɔmɔlɔɔm. Aleyɔngyɛlɛ ka ippyam gaang gaang. 9Ikpana anaam, kule ka lɔkkwɔɔn, akkeyɔng mung tɛ̀ttɛ̀ inaangnɛ kɛnaang la annyɔɔng ka latele. Inaang kɛnaang kikoon la kɛtɔm nkwaaning isi kɔlɔɔk kwa kɔbbɔlnɛ lɛnaang ka ikopolowɔnɛyɔng Kuttu-Budoddo kwa kussinɛ ka Ɔlɔɔmɔlɔɔm. 10Annyɔɔng alenɛyɔng ittɛɛsɛ ayyɔɔt tɛ̀ttɛ̀ Ɔlɔɔmɔlɔɔm ulenɛ. Linaang ayyɔɔt ka kkwɔɔt annyɔɔng balɔɔt ba ayilayɔng kɔlɔɔk Ɔlɔɔmɔlɔɔm lidɔkɔ lile sa bbwak. La kɔlɔɔk kwa kɔbbɔlnɛ ka tɔkɔlɔ lisi lile. 11Asan lɔsan attɛyɔng idɔkɔ ikɔɔm ɔlɔɔt la vvɔn tɛ̀ttɛ̀ ɔfɔɔn-a-bwɔɔn ɔkɔɔmnɛ bwɔɔn ammɛ. 12Issɛɛnwɔyɔng kɛkkaam a luppyam, inaangwɔyɔng ɔwaawɔyɔng. Iddawɔyɔng ittɛ ataayɔng kɛtaa sa kɛsaapnɛ Ɔlɔɔmɔlɔɔm wa ɔkkwɔɔwɔnɛyɔng ɔttɛ affu ayangayɔng etini ka Itutum ammɛ ɔbɛtɛ la ppyɛɛ ammɛ. 13Ifɛɛt ilɔk ile baang ya iwomonɛ Ɔlɔɔmɔlɔɔm kɛnaang ɛkɛtɛ ɔkkpɛlɛ, ka kuttu budoddo kwa ikɔɔmnɛ ifeewɔyɔng. Appyeeyɔngkwɛ atɔkyɔngkwɛ. Ɔzzànga asiyɔngkwɛ lɛtɔk tɛ̀ttɛ̀ bɔtɔɔm bwa ɔlɔɔt ɔtɔɔmnɛ, adɔkɔ atɔkyɔngkwɛ tɛ̀ttɛ̀ lɛmmwɔɔl za lɔkkwɔɔn za lissinɛ ka Ɔlɔɔmɔlɔɔm; kɔdɔkɔ ning ka Ɔlɔɔmɔlɔɔm ulenɛ ka kɛnaang ka kkwɔɔt annyɔɔng, balɔɔt ba ayilanɛyɔng kwa ammɛ. 14Ikpana anaam, kɛssanga kɔlɔɔk ’kwɔng kɛnaangwɔyɔngbong tɛ̀ttɛ̀ kɛnaangnɛ balɔɔt a luzɔɔm Ɔlɔɔmɔlɔɔm ka Judaea la balɔɔt a Christ Jesus ba balenɛ baang. Ayɛnyɔngbong kɛssanga akama ssɔn la abbɛ ka kɔlɔɔk a balɔɔt a lɔkaan annyɔɔng, tɛ̀ttɛ̀ abbɛ bayɛnnɛ ka labɔɔk a balɔɔt a Jews. 15Kɛssanga balɔɔt ’sɔng baang kɛwwɔɔlnɛ Jesus, Uyini, la Bappyee-kutolo Ɔlɔɔmɔlɔɔm. Bayɔɔyɛlɛ ayyɔɔt akama. Batun Ɔlɔɔmɔlɔɔm lutun basak. Bàbbyap la ɔlɔɔt ɔkkpɛlɛ. 16Gɔɔ babumyɛlɛ kitunu battɛ tɛ̀ttɛ́ ikopolo Ikanakana bɔtɔɔm bwa bule bukɔɔmbɛ bumii ka buppwolo. Uwɔng ulenɛ lakuma bubbi bwa banaangnɛ. Gedegede mung Ɔlɔɔmɔlɔɔm kutunmɛbong la abbɛ kukuma. 17Ikpana anaam, ka ɛkɛtɛ igbatanɛ ikɔngɔwɔyɔng ka waan ɛkɛtɛ ssup, ittina ayyɔɔt lissi igbatanɛ ka kkwɔɔt annyɔɔng. Kkwɔɔt ayyɔɔt keem ligbatanɛ. Ittina gaang gaang itumwɔyɔng. Ibum ittɛ ibbalwɔyɔng liffu iyɛn. 18Iggyan ittɛ nzang ippyɛlɛ isimisimi iffu ka ɛfɛɛn annyɔɔng. Anaam Paul nbum kɛppyɛlɛ kiffu bikkpit bikkpit, ɔzzànga Satan usiyɛlɛ lɛfɔngɔ iffu. 19Mkkpa kɔnaang luppyam luleyɛlɛ bbɛɛm ka ulewɔnɛyɔng annyɔɔng ba asinɛyɔng tɛ̀ttɛ̀ balɔɔt balɔk lɛbɛlɛ lile. Annyɔɔng alenɛyɔng luppyam ayyɔɔt la laggele ayyɔɔt. Ka inaangnɛ kamma ittɛ vvenɛ ibɛtɛ ka lusso Uyini, ka ule ɔppyɛlɛ uffu, ittinawɔyɔng annyɔɔng. 20Annyɔɔng alenɛyɔng balɔɔt ba inaangnɛ kamma itum. Annyɔɔng alenɛyɔng laggele ayyɔɔt za lɔkkwɔɔn.

will be added

X\