1 Anaam Paul, la Silas, la Timothy ikkpɔknɛ lɛmmwɔɔl ’zɔng mung ifeewɔyɔng annyɔɔng balɔɔt a luzɔɔm ka Thessalonica ba balenɛ ba Dedde Ɔlɔɔmɔlɔɔm la Jesus Christ, Uyini. Ppyɛɛ Ɔlɔɔmɔlɔɔm la bɔkaat ammɛ butaa la annyɔɔng. 2 Iwomo Ɔlɔɔmɔlɔɔm kɛnaang ɛkɛtɛ duu innyiwɔyɔng. Italawɔyɔng ɛkɛtɛ duu ya issɛɛnnɛ luzɔɔm ayyɔɔt. 3 Ikkebong ka lusso Ɔlɔɔmɔlɔɔm, Dedde ayyɔɔt, tɛ̀ttɛ̀ ayɔɔnɛyɔng kiyila annyɔɔng ka linaang, tɛ̀ttɛ̀ kɛsaap annyɔɔng kɛnaangwɔnɛyɔng anaangyɔng kɛnaang gaang gaang. Ibbalwɔyɔng likke ka luttina annyɔɔng lɔkkaamnɛ lutum Jesus. 4 Ikpana anaam, isan lɔsan ittɛ Ɔlɔɔmɔlɔɔm asaapmɛyɔng lɔsaap, kwakkwɛ ɔsangawɔnɛyɔng ɔttɛ aleyɔng ba ammɛ. 5 Ka ikɔɔmnɛ Kuttu-Budoddo Ɔlɔɔmɔlɔɔm ifeewɔyɔng, ka lɛmmwɔɔl keem lissi ka ikɔɔmnɛ iffu. Idɔkɔ ikɔɔmkwɛ la lakke ɔbɛtɛ la Kuyeeng-Ɔlɔɔmɔlɔɔm, la lɔkkwɔɔn a kɔlɔɔk ɔkkpɛlɛ. Akkeyɔng mung tɛ̀ttɛ̀ idɔkɔnɛ itaa la annyɔɔng, ɔdɔkɔ kwa budoddo annyɔɔng. 6 Akeetyɔngbongyɛlɛ la Uyini, ɔzzànga mkkpa ayɛnyɔng akama, atɔkyɔngbong lɛmmwɔɔl ’zɔng mung za lissinɛ ka Kuyeeng-Ɔlɔɔmɔlɔɔm ka laggele. 7 Ataayɔngbong tɛ̀ttɛ̀ balɔɔt iyɔɔ ka lusso balɔɔt ba bayanganɛ kiyila ka Macedonia la Greece. 8 Kuttu kwa kussinɛ ka annyɔɔng kumii Macedonia la Greece baang keem kusi likpeke. Kumiibong ifɛɛn ifɛɛn ɔkkpɛlɛ. Bulɔk ba bubɛlɛ lile bwa ibbalnɛ lɛlɔɔk. 9 Balɔɔt ’bɔng baang ɔkkpɛlɛ balɔɔk kɔlɔɔk annyɔɔng tɛ̀ttɛ̀ akɔɔmnɛyɔngyɛlɛ ka ɛkɛtɛ ya iffunɛ ikoolowɔyɔng. Balɔɔk tɛ̀ttɛ̀ alenɛyɔng ilat annyɔɔng lɛsam azzɔɔkyɔng asseke ka akupnɛyɔng ɛtɔk Ɔlɔɔmɔlɔɔm, atelenɛyɔng Ɔlɔɔmɔlɔɔm a kuddu wa lɔkkwɔɔn. 10 Ataa akatyɔng Waan ammɛ ka ule ussi ka libat uffu. Waan ammɛ, Jesus, wa ufungalanɛ ka lubbe ɔkkalayɛlɛ ka binyanga Ɔlɔɔmɔlɔɔm pya bile biffu.
