1 PETER 5

1Nkkpenge batumalɔɔt a luzɔɔm ka bɛzzɔkɔ annyɔɔng, anaam biini wa nssɛnɛ nle utumalɔɔt ka luzɔɔm. Anaam nlenɛ ttɛɛsɛ kɛyɛn akama Christ. Ɔzzànga vvenɛ nyanga etini ka ppyɛɛ wa ule uffu. Nkkpengewɔyɔng lukkpenge. 2Azzangayɔng bakat-itɔɔn ya Ɔlɔɔmɔlɔɔm unnyiwɔnɛyɔng, appyɛɛkyɔngyɛ annyɛ ka luppyam gwa doddo, tɛ̀ttɛ̀ Ɔlɔɔmɔlɔɔm ɔggyannɛ ɔttɛ anaangyɔng. Ɔzzànga ka luppyam gwa bbɔl bbɔl lissi. Anaangyɔng kɛnaang afɔngɔyɔng kwa kikkpele kiffik, ɔzzàngà kussiwɔyɔng ka luppyam annyɔɔng anaangyɔng. 3Tɛ̀ttɛ́ abum attɛ annyɔɔng azzangayɔng bazzilɛttɔ balɔɔt ’bɔng baang ba balewɔnɛyɔng linnyi battɛ appyɛɛkyɔngbɛ. Ɔzzànga ataa tɛ̀ttɛ̀ iyɔɔ ka kɛkaan ’sɔng baang. 4Ɛkɛtɛ ya Uzzilɛttɔ kɛkat-itɔɔn utumanɛ, vvenɛ ɔttɔpɔwɔyɔng ododo wa unnyiwɔnɛyɔng lakke za lale lasi lɛbɛlɛ lɛsaal. 5Kɔssɛ kule ning baang la annyɔɔng. Ɔgbaa, annyɔɔng bakolobya annyiyɔng batumalɔɔt latele. Ɔzzànga ɔkkpɛlɛ annyɔɔng ayɔɔyɔng linaang annyɔɔng sa doddo kkpelegedee, abum atelewɔyɔng kɛyɔɔng, tɛ̀ttɛ̀ luvva-Ɔlɔɔmɔlɔɔm lɔlɔɔknɛ, lɔttɛ, “Ɔlɔɔmɔlɔɔm vvenɛ ɔkaal kɛkaal a balɔɔt ba ɔkkyaanɛbɛ, unnyi bakee-bwɔɔn latele.” 6Atɔkwɔyɔng kɛyɔɔng ka bukee-waan. Ɔzzànga ataayɔng ka lakke labɔɔk Ɔlɔɔmɔlɔɔm, nkwaaning ɔsamwɔyɔng uyeek ka libat ka ɛkɛtɛ ya ammɛ biini ya bbwak. 7Asamyɔng lilɔɔk annyɔɔng ɔkkpɛlɛ annyimɛyɔng ka ulemɛnɛ ammɛ ɔkatwɔnɛyɔng. 8Asan anaangyɔng, akatyɔng! Ɔlɔɔt a kɔfɔk annyɔɔng, Ɔnaanga-a-kɛsɛɛm-a-kuyeeng, ule baang ka ɔssɛnɛ ukkpit ɔkɔɔm ubungu tɛ̀ttɛ̀ ugɛbɛ ulenɛ ka kɛggyan a bɔfɛɛn bwa ɔkaanɛ uzzi. 9Kiyila annyɔɔng kɛkkaam lɔkkaam, tɛ̀ttɛ́ afɔngɔ ɔbɛtɛwɔyɔng ka asannɛ attɛ balɔɔt ɔkkpɛlɛ ka ɛkpansi ba bayanganɛ kiyila bassɛ bayɛn akama kɛssanga ssɔn. 10Ɔzzǹga alenɛyɔng akama lɛyɛn ka waan ɛkɛtɛ ssup ning, Ɔlɔɔmɔlɔɔm wa ɔyanganɛ lakke ɔkkpɛlɛ, wa ɔkkwɔɔwɔnɛyɔng ɔttɛ affu ayangayɔng etini ka lakke ammɛ za kɛfal a kɛfal ka bɔkaat la Christ, ammɛ biini vvenɛ ɔnaangwɔyɔng aleyɔng bbwak, unnyiwɔyɔng bɔkkaam la lagabwɔ, ka lutte gwa lɔkkwɔɔn. 11Lakke za kɛfal a kɛfal lale ka ammɛ. Kule ning. 12Silas uttelenɛbong nkkpɔkwɔyɔng waan a lɛmmwɔɔl ’zɔng mung. Ammɛ ulenɛ wa nttinanɛ nttɛ ule ɔkpana ayyɔɔt wa ɔyanganɛ kiyila. Nggyan nttɛ nttamawɔyɔng ka lafɔɔ za nle ka nnyiwɔnɛyɔng za lalenɛ lakke Ɔlɔɔmɔlɔɔm ka lɔkkwɔɔn. Abeeyɔng bbwak ka azzɛ. 13Ikpana annyɔɔng ya ilenɛ ka Babylon ba Ɔlɔɔmɔlɔɔm ulenɛbɛ lɛssang ɔgbaa, batɔɔm luwomo bafeewɔyɔng. Waan anaam Mark ɔssɛ uwomowɔyɔng. 14Awomoyɔng bannyɔɔng la kigbugba kɛsaap a balɔɔt a Christ. Bɔkaat butaa la annyɔɔng ɔkkpɛlɛ ba alenɛyɔng ba Christ.

will be added

X\