1 PETER 4

1Ka Christ ɔyɛnnɛ akama ka kkwɔɔt ammɛ biini, annyɔɔng ɔgbaa assɛ attinayɔng ɛtɔk ’yɔng baang. Ɔlɔɔt duu wa ɔyɛnnɛ akama ka kkwɔɔt ammɛ baala ɔttɔ ka bubbi. 2Ka ussinɛ gedegede mung umii ka lusso, akkyaayɔng lafal annyɔɔng ka vveeng ’wɔng mung afɔngɔyɔng Ɔlɔɔmɔlɔɔm ɔkɔɔm, afɔngɔyɔng kɛtaa la luttina gwa ɔssɛbibit. 3Ka isimi ka isimi aleyɔng baang ka anaangnɛyɔng bɛfɛɛn bya balɔɔt ba basinɛ kwa Ɔlɔɔmɔlɔɔm liyila banaangnɛ. Adɔkɔyɔng la babbu ittina, la lɔgbɛɛk, la kɛvva batak, la kɛnaang a bɛfɛɛn izzit, la lakup a kɛvva la lakup ilat. 4Gedegede mung balɔɔt ba basinɛ kɔlɔɔk Ɔlɔɔmɔlɔɔm liyila kɔkɛɛlɛbongbɛ ka basiwɔnɛyɔng lɛbɛlɛ lɛyɛn ka atulnɛyɔng la abbɛ anaangyɔng babbu lilɔɔk, kwakkwɛ babbaatwɔnɛyɔng. 5Vvenɛ babwɔɔlɔ Ɔlɔɔmɔlɔɔm wa ɔkaalnɛ bakokolo la babbu kɔlɔɔk duu kwa balenɛ lɛnaang. 6Kwakkwɛ bakopolonɛ babbu lɛmmwɔɔl Ɔlɔɔmɔlɔɔm ɔgbaa la balɔɔt ba balenɛbɛ lɛkaal ka linaang abbɛ tɛ̀ttɛ̀ bakaalnɛ ɔlɔɔt ɔkkpɛlɛ, bakopolobɛ nkwaaning bataa ka lafal abbɛ tɛ̀ttɛ̀ Ɔlɔɔmɔlɔɔm ɔggyannɛ. 7Lakpeke bɛfɛɛn ɔkkpɛlɛ lakkɛtɛbong. Akatwɔyɔng kɛyɔɔng, abeeyɔng kkpɔk akkwoong assɛɛnyɔng luzɔɔm. 8Kwa kɔttanɛ liggbenge ulenɛ kɛttɛ, bannyɔɔng basaapwɔyɔng gaang gaang. Kɛsaap kɛbɛtɛnɛ bubbi ppwap. 9Awongoloyɔng ssala annyɔɔng alokoyɔng balɔɔt ɔkkpɛlɛ, afɔngɔyɔng lɔzzɔ kɛssɛ. 10Ɔlɔɔt la vvɔn ule tɛ̀ttɛ̀ ɔlɔɔt wa ukkwoongnɛ ɔkɔɔm lɛsɔɔk za Ɔlɔɔmɔlɔɔm unnyimɛnɛ. Vvenɛ ɔkɔɔm lɛsɔɔk ammɛ ’zɔng baang za lissimɛnɛ ka Ɔlɔɔmɔlɔɔm uttele babbɛ balɔɔt balɔk. 11Ɔlɔɔt duu wa ɔbwɔɔlɔnɛ ibwɔɔlɔ Ɔlɔɔmɔlɔɔm ule ɔbwɔɔlɔ lɛmmwɔɔl Ɔlɔɔmɔlɔɔm. Ɔlɔɔt duu wa ɔnaangnɛ kɛnaang ɔkɔɔm lakke za Ɔlɔɔmɔlɔɔm unnyimɛnɛ ɔnaang, nkwaaning ka utini bɛfɛɛn ɔkkpɛlɛ ibunguyɔng Ɔlɔɔmɔlɔɔm ka ussinɛ ka Jesus Christ, wa latele la lakke lalenɛ za ammɛ ka kɛfal a kɛfal. Kulening. 12Inngwa anaam ka luppyam, tɛ̀ttɛ́ kɔkɛɛlɛwɔyɔng ka akama wa ayɛnnɛyɔng, tɛ̀ttɛ̀ bɔfɛɛn bwa butakawɔnɛ kkpal lɛnaang. 13Lutini ’gwɔng aggeleyɔng attɛyɔng ayɛnyɔng akama la Christ, nkwaaning aggeleyɔng gaang gaang ɛkɛtɛ ule ɔyɔɔ lakke ammɛ. 14Laggele lale za annyɔɔng balɔɔt ba banaangwɔnɛyɔng bɛfɛɛn izzit ka akupnɛyɔng Christ. Uwɔng ulenɛ kɛttɛ lakke Kuyeeng kwa Ɔlɔɔmɔlɔɔm kule baang la annyɔɔng. 15Ɔlɔɔt ɔlɔk tɛ̀ttɛ́ ɔyɛn akama ammɛ ulenɛ ɔwwɔɔl a balɔɔt, ɔlɔk ussip, ɔlɔk ɔttɔ-ka-lafɔɔ, ɔlɔk ubum kɛtɔk a kɛnaang a balɔɔt. 16Ɔzzànga ayɛnnɛ akama ka alenɛ ɔlɔɔt a Christ tɛ̀ttɛ́ izzit inaangwɔ, awomo Ɔlɔɔmɔlɔɔm kɛnaang alenɛ la lɛkɔɔl a Christ. 17Ɛkɛtɛ ɛffɔbong ya kɛkaal kile ka kittenɛ, Balɔɔt Ɔlɔɔmɔlɔɔm balenɛ balɔɔt ba bale batte lɛkaal kɛkaal abbɛ. Kittenɛ ka ayyɔɔt kile kikpeke nang la balɔɔt ba basinɛ kiyila lɛyanga batum kuttu budoddo Ɔlɔɔmɔlɔɔm? 18Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Kɔkɔɔt lɔkɔɔt tɛ́ttɛ́ bakkala balɔɔt ba doddo, nkka kule kɔtaa nang la balɔɔt ba basinɛ ba Ɔlɔɔmɔlɔɔm lile la banaang a bubbi?” 19Kule ning baang la balɔɔt ba bayɛnnɛ akama ka kɔlɔɔk a Ɔlɔɔmɔlɔɔm, batelebɛ kɛyɔɔng ɔkkpɛlɛ bannyi Ɔlɔɔmɔlɔɔm ka budoddo kɛnaang abbɛ. Ɔlɔɔmɔlɔɔm wa ulokonɛ nsekele ammɛ ɛkɛtɛ ɔkkpɛlɛ.

will be added

X\