1 PETER 3

1Bwanavva, asamwɔyɔng kɛyɔɔng annyiyɔng bwalam annyɔɔng, nkwaaning linaang annyɔɔng lidɛm bwaanbwalam balɔk ba basinɛ lɛmmwɔɔl Ɔlɔɔmɔlɔɔm liyila bassɛ baang bayila. Gɔɔ lɛmmwɔɔl baala azza atum kwɛ, 2ka bale bayɛn tɛ̀ttɛ̀ linaang annyɔɔng liyyɛɛpnɛ liyanga latele liffɔ. 3Tɛ̀ttɛ́ akɔɔmyɔng bɛfɛɛn bya vveeng kaang ning, anaang ɔkkɔɔnɛ akwɛnyɔng, tɛ̀ttɛ̀ alokonɛyɔng kittulu annyɔɔng, ɔlɔk bɛfɛɛn a gold bya akwulanɛyɔng ka lukat, ɔlɔk iwɔkɔlɔ ya awɔkɔlɔnɛyɔng ka kkwɔɔt. 4Lutini ’gwɔng bɔllɛ annyɔɔng bule bɔllɛ luppyam. Bɔllɛ bwa businɛ likpeke la latele, la kuyeeng kwa zzum. Akkwɛ kulenɛ kwa lɛbaang ka lusso Ɔlɔɔmɔlɔɔm. 5Bwanavva ba iyɛddɛ iyɛddɛ ba basamnɛbɛ kɛyɔɔng bannyi ka luzɔɔm, ba battinanɛ kwa Ɔlɔɔmɔlɔɔm, banaangbɛ abbɛ biini kɛyɔɔng bayyɛɛp ka ɛtɔk ’yɔng, ka basamnɛbɛ kɛyɔɔng bannyi bwalam abbɛ. 6Sarah ɔdɔkɔ ule ning baang tɛ̀ttɛ̀ bwanavva ’bɔng baang, utele Abraham, ɔkkwɔɔmɛ “Dedde anaam.” Gedegede mung annyɔɔng bwaan ammɛ ba bwanavva, ulenɛ ka anaangnɛyɔng budoddo, kɔlɔɔk kɔlɔk kusiwɔyɔng lɛbbwɔpɔ. 7Annyɔɔng bwalam ɔgbaa ka allunɛyɔng la bwanavva annyɔɔng, akɔɔlɔyɔng asan attɛyɔng abbɛ balenɛ kukup a balɔɔt ba basɔɔnɛ. Akɔɔmyɔngbɛ ka latele. Ɔkkpɛlɛ annyɔɔng vvenɛ atɔkyɔng lɛsɔɔk a kuddu Ɔlɔɔmɔlɔɔm. Anaangyɔng ’kwɔng nkwaaning bulɔk busi luzɔɔm annyɔɔng lɛnaang. 8Kitele lɛttɔ ulenɛ kɛttɛ, vvenɛ ɔkkpɛlɛ annyɔɔng ayangayɔng luttina la kɛssanga linaang ssɔn. Wannyɔɔng ɔsaapwɔyɔng tɛ̀ttɛ̀ ikpana annyɔɔng; ayyɛɛpyɔng bɛnaang la lutini ɔlɔɔt ɔkkpɛlɛ. Ɔzzanga atɔkwɔyɔng kɛyɔɔng ka bukee. 9Tɛ̀ttɛ́ apipili wannyɔɔng wa ɔnaangwɔnɛ bubbi, ɔlɔk abbaat wannyɔɔng wa ɔbbaatwɔnɛ. Lutini ’gwɔng anaangmɛ ppyɛɛ, ka ppyɛɛ ulenɛ nsekele wa Ɔlɔɔmɔlɔɔm unnyiwɔnɛyɔng ka ɛkɛtɛ ya ɔkkwɔɔwɔnɛyɔng. 10Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɔlɔɔt duu wa ɔggyannɛ ɔttɛ ɔtaa ka laggele ɛkɛtɛ ɔkkpɛlɛ ka lɛfal ammɛ, ɔkkyaa kɛlɔɔk a lilɔɔk sa libbɔlnɛ ɔfɔngɔ, ɔkkyaa kɛnaang a lɛlaak ɔfɔngɔ. 11Ɔkkyaa lilɔɔk a bubbi ɔfɔngɔ ɔppyɛɛ ɔnaang budoddo. Vvenɛ kɔbɛtɛmɛ kwa bɔkaat. 12Uyini ɔppyɛɛk balɔɔt ba banaangnɛ kwa bbwak ɔgɔpɔlɔ luzɔɔm abbɛ ɛkɛtɛ ɔkkpɛlɛ. Kɔlɔɔk kutunmɛ la balɔɔt ba banaangnɛ bubbi.” 13Nnyinɔɔng ule uddopowɔ ka aggyannɛ attɛ anaang kɔlɔɔk kwa kɔyyɛɛpnɛ? 14Ɔzzànga mkkpa ayɛn akama ka aggyannɛ attɛ anaang kwa bbwak, ale aggele nang? Tɛ̀ttɛ́ balɔɔt babbwɔpɔwɔyɔng, tɛ̀ttɛ́ ittina ibbɔlwɔyɔng. 15Ɔzzànga asam Christ assɛɛnwɔ kɛyɔɔng ka luppyam. Atelemɛ tɛ̀ttɛ̀ Uyini annɔ. Abama ɛkɛtɛ ɔkkpɛlɛ, appyɛlɛ ɔlɔɔt duu kamma wa ule ɔbapwɔ ɔttɛ abwɔɔlɔmɛ luttina gwa ayanganɛ ka tɔkɔlɔ. 16Anaangkwɛ bɛtɛbɛtɛ la latele. Aloko luttina annɔ kkpaladada, nkwaaning ɛkɛtɛ ya banyɔɔkawɔnɛ, balɔɔt ’bɔng baang ba balɔɔknɛ bubbi batum kɛyyɛɛp a linaang annɔ tɛ̀ttɛ̀ balɔɔt ba bakupnɛ Christ, battɔ ka izzit ka lukopolo abbɛ. 17Kɔtta lɛyyɛɛp ka ɔlɔɔt ɔyɛnnɛ akama ka kɛnaang a budoddo, kulenɛ kwa Ɔlɔɔmɔlɔɔm ɔggyannɛ, lutini kɛnaang a ubbu kɔlɔɔk. 18Christ biini ubbe ka lɛttɔ ayɔɔt kikkpit ssɔn kɔsaal. Ubbe ffet kwa banaang a bubbi. Ɔlɔɔt wa doddo ubbe ɔkkala lɛttɔ babbu balɔɔt ba basinɛ lɛyyɛɛp, ɔggyan ɔttɛ ɔkɔɔmwɔyɔng umii ka ɛfɛɛn Ɔlɔɔmɔlɔɔm. Bawwɔɔlmɛ tɛ̀ttɛ̀ bawwɔɔlnɛ ɔlɔɔt ɔkkpɛlɛ, ɔppyɛlɛ ufungala ka lakke Kuyeeng-Ɔlɔɔmɔlɔɔm ɔtaa ka kuddu. 19Ɛkɛtɛ ya ulenɛ ka kuddu tɛ̀ttɛ̀ kuyeeng, umii ukopolo liyeeng sa lilenɛ ka igbakkɔpɔ. 20Uwɔng ulenɛ liyeeng a balɔɔt ’bɔng baang ba basinɛ Ɔlɔɔmɔlɔɔm litele. Ka ubbenɛ luppyam bɛɛm ɔtaa ɔkat bɛtɔm a Noah ɔdɔkɔnɛ ka kɛnaang akkpaat. Bwaan a balɔɔt badɔkɔ ssup ning ba balenɛ ka tɔkɔlɔ akkpaat, ɔkkpɛlɛ abbɛ bale balɔɔt bannambanna ka bannyi basinɛbɛ lɛmmɛɛl. 21Baang ɔdɔkɔ iyɔɔ ya kɛnaang a baptizim, ya ikkalawɔnɛyɔng gedegede mung. Kwa kɛzzaa bɔkkpɔtɔ a kkwɔɔt lissi. Ule kwa nsekele wa ɔnaangnɛ la Ɔlɔɔmɔlɔɔm ka ussinɛ ka luppyam gwa doddo. Kɔkkalawɔyɔng ka kifungala ka lubbe sa Jesus Christ ufungalanɛ. 22Ammɛ wa ulenɛ ka libat limii ɔzzánga ùlé ka kɔbɔɔk ɛlaabɔɔk Ɔlɔɔmɔlɔɔm. Ammɛ ulenɛ uzzilɛttɔ bayilabɔtɔɔm Ɔlɔɔmɔlɔɔm la lakke libat ɔkkpɛlɛ.

will be added

X\