1 PETER 2

1Akkyaayɔng bubbi annyɔɔng ɔkkpɛlɛ azzɔɔkyɔng, kɛkkala lɛlaak ba kɛbɛlɛ lile, ɔlɔk kɛnaang a lagban, ɔlɔk luleep, ɔlɔk ɔbbaatyɔng lifɔk. 2Ataayɔng tɛ̀ttɛ̀ bwɔɔn ba bassumanɛ lɛmaat, aggyanyɔng libee za doddo avvayɔng la ɛkɛtɛ la ɛkɛtɛ ɔkkɔɔnɛ ka avvanɛyɔngzɛ ammalayɔng aleyɔng ba kɛkkala. 3Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Allɛyɔngbong kiggwoom a kɔlɔɔk Ɔlɔɔmɔlɔɔm.” 4Affuyɔng ka ɛfɛɛn Uyini, lɛttaal-a-kuddu za balɔɔt bafimnɛzɛ battɛ bɔfɛɛn bwa gbɔɔ, ɔzzànga Ɔlɔɔmɔlɔɔm ɔsanganɛzɛ azzɛ ɔttɛ, lile bɔfɛɛn a kukkam. 5Affuyɔng tɛ̀ttɛ̀ lakkpɔ lattaal-a-kuddu, afɔngɔ bakɔɔmwɔyɔng annyɔɔng biini babɔɔk ggwoon a Kuyeeng-Ɔlɔɔmɔlɔɔm, ka ɛfɛɛn ale assɛɛnyɔng luzɔɔm tɛ̀ttɛ̀ bassɛɛn-a-luzɔɔm ba bbwak ka Kuyeeng-Ɔlɔɔmɔlɔɔm, la lɛtɔm za bale banaang bannyi Ɔlɔɔmɔlɔɔm ka labɔɔk a Jesus Christ. 6Luvva Ɔlɔɔmɔlɔɔm lɔttɛ, “Nsangabong lɛttaal a kukkam ntte lutte kɛbat a ggwoon Ɔlɔɔmɔlɔɔm ka Zion ɔzzànga ɔlɔɔt duu wa uyilanɛ kwa azzɛ baala usi lɛyɛn bwa ɔggyannɛ.” 7Lɛttaal ’zɔng mung lile lɛttaal a kukkam za lɛbaang ka ggwoon Ɔlɔɔmɔlɔɔm kwa annyɔɔng balɔɔt ba ayilanɛyɔng. Ɔzzanga kwa balɔɔt ba basinɛ liyila, “Lɛttaal ’zɔng baang za babɔɔk a ssoon bafimnɛ lɛppyɛɛbong lɛzzánga lɛttaal za doddo.” 8Lɛmmwɔɔl lɛlɔk lɛttɛ, “Lɛttaal ’zɔng mung lile lɛnaang balɔɔt bavvun battɔ”. Bavvun ka basinɛ lɛmmwɔɔl Ɔlɔɔmɔlɔɔm liyila. Uwɔng ulenɛ kwa Ɔlɔɔmɔlɔɔm uttinanɛ utumbɛ. 9Ɔzzànga annyɔɔng alenɛyɔng balɔɔt ba balewɔnɛyɔng lɛsanga. Bassɛɛn a luzɔɔm Ubeet Ebinukkpaapi, lɔfɔɔn gwa latele, balɔɔt Ɔlɔɔmɔlɔɔm biini, ba ɔsangawɔnɛyɔng ɔttɛ abwɔɔlɔyɔng linaang a bikɛɛlɛ Ɔlɔɔmɔlɔɔm wa ɔkkwɔɔwɔnɛyɔng ka tɔkɔlɔ kisul uffu ka buppwolo bikɛɛlɛ ammɛ biini. 10Ka ɛkɛtɛ nnyɔn, annyɔɔng balɔɔt Ɔlɔɔmɔlɔɔm adɔkɔ asiyɔng lile, ɔzzànga gedegede mung atiiyɔng ba ammɛ. Ka ɛkɛtɛ nnyɔn, kibbelɛttɔ Ɔlɔɔmɔlɔɔm adɔkɔ asiyɔng lɛsan ɔzzàngà mung atɔkyɔngbong kibbelɛttɔ ammɛ. 11Inngwa anaam, nkkpengewɔyɔng annyɔɔng ba alenɛyɔng bakekeen la bamma-lɛkɔɔng ka ɛkpansi ’yɔng nttɛ tɛ̀ttɛ́ asamwɔyɔng kɛyɔɔng annyiyɔng bɛfɛɛn bya billeknɛ kkwɔɔt annyɔɔng. Gbisii bile ka lɛkɔɔng la luppyam. 12Akɔɔmyɔng ileme ya doddo ateleyɔng ikpana annyɔɔng ya itakanɛ kɔlɔɔk Ebinukkpaapi lɛsan, nkwaaning ɛkɛtɛ ya bakaawɔnɛyɔng basan budoddo annyɔɔng; nkwaaning babungu Ɔlɔɔmɔlɔɔm ka Kɛtɔm sa ule uffu. 13Ateleyɔng ɔlɔɔt ɔkkpɛlɛ attinayɔng Ɔlɔɔmɔlɔɔm: Ateleyɔng Ubeet wa uzzinɛ lɛttɔ ɔkkpɛlɛ, 14la bakɔɔm ɛkpansi ba ɔtɔɔmnɛbɛ ɔttɛ bayɔɔ balɔɔt ba banaangnɛ bubbi akama, babungu balɔɔt ba banaangnɛ doddo. 15Nkwɔng kulenɛ kwa Ebinukkpaapi ɛttɛnɛ anaangyɔng. Anaangyɔng budoddo, balɔɔt ba basinɛ kɔlɔɔk lɛsan bataa zzum. 16Ataayɔng tɛ̀ttɛ̀ batta ka kɔlɔɔk, ɔzzanga tɛ̀ttɛ́ akɔɔmyɔng lakke annyɔɔng alupyɔng bubbi bwa anaangnɛyɔng. Ataayɔng tɛ̀ttɛ̀ babili Ebinukkpaapi. 17Ateleyɔng balɔɔt ɔkkpɛlɛ, balɔɔt ba bayanganɛ kiyila tɛ̀ttɛ̀ annyɔɔng basaapwɔyɔng. Ebinukkpaapi ɛbbwɔpɔwɔyɔng, ateleyɔng Uzzilɛttɔ. 18Annyɔɔng ibɔɔyi, asamwɔyɔng kɛyɔɔng annyiyɔng issaawɔ annyɔɔng, annyiyɔngbɛ latele za lɔkkwɔɔn. Balɔɔt ba baggwoomnɛ kɔlɔɔk, ɔlɔɔt ubbebɛ lɛttɔ keem lissi ka ale ateleyɔng. Balɔɔt ba banyangawɔnɛyɔng ɔgbaa assɛ annyiyɔngbɛ latele. 19Ebinukkpaapi vvenɛ ɛnaangwɔyɔng ppyɛɛ ka ’kwɔng alenɛyɔng baang ka appyeenɛyɔng bɔssɔp gbɔɔ ka lɛsɔɔk ka alenɛyɔng bwa ɔttɛnɛ anaangyɔng lɛsan. 20Isak ilewɔnɛyɔng ka ’bɔng abbɔnɛyɔng akama ka battupwɔnɛyɔng ka asinɛyɔng bbwak lɛnaang. Ɔzzànga appyɛɛnɛ abbɔyɔng akama ka anaangnɛyɔng budoddo, Ɔlɔɔmɔlɔɔm vvenɛ ɔnaangwɔyɔng ppyɛɛ ka akkwɛ. 21Kɔdɔkɔ ka ’kwɔng ka Ɔlɔɔmɔlɔɔm ɔkkwɔɔwɔnɛyɔng, ka Christ biini ɔyɛnnɛ akama ka lɛttɔ annyɔɔng ɔ̀zzánga ɔtaa tɛ̀ttɛ̀ iyɔɔ ɔkkɔɔnɛ akeetmɛyɔng. 22Bubbi usi lɛnaang, ɔlɔɔt vvɔn gbɔɔ wa ulenɛ lippyee ka ɔnaangnɛ lɛlaak ba ule. 23Ka ɛkɛtɛ babbaatmɛnɛ, kamma usi lɛppyɛlɛ la lifɔk. Ɛkɛtɛ ɔyɛnnɛ akama, kusimɛ lɛssɔp. Ɔzzanga luttina ammɛ lulemɛ ka Ɔlɔɔmɔlɔɔm, Ɔkaal-a-kɛkaal wa Bbwak. 24Christ biini ɔsamnɛ bubbi ayyɔɔt uzzenge ka kkwɔɔt ubbe ka Cross, nkwaaning ibbe innyi bubbi, iddu kuddu kwa budoddo. Ka bidopo ammɛ uttulabongyɛlɛ. 25Adɔkɔ aleyɔng tɛ̀ttɛ̀ itɔɔn ya itaaknɛ, ɔzzànga gedegede mung, bakɔɔmwɔyɔngbong bappyɛlɛ isimi-simi affuyɔng akupyɔng Ɔkat-itɔɔn la Ɔkat-a-kuddu annyɔɔng.

will be added

X\