1 JOHN 5

1Ɔlɔɔt duu wa uyilanɛ ɔttɛ Jesus ulenɛ Ɔlɔɔt-wa Ɔlɔɔmɔlɔɔm ɔsanganɛ, ulenɛ waan-Ɔlɔɔmɔlɔɔm. Ɔlɔɔt duu wa utelenɛ abassɛ ɔlɔɔt, ɔssɛbong utele awaan ɔgbaa. 2Nkwɔng kɔnaangnɛ isan ittɛ bwaan-Ɔlɔɔmɔlɔɔm basaapyɛlɛ lɔsaap; Kule ka Ɔlɔɔmɔlɔɔm ule ɔsaapyɛlɛ, itele lafɔɔ ammɛ. 3Ifɛɛt Ɔlɔɔmɔlɔɔm ɔsaapnɛyɛlɛ ilenɛ ka ile itele lafɔɔ ammɛ. Lafɔɔ ammɛ gaang yɛlɛ ba lakoolo. 4Waan ɔkkpɛlɛ wa ulenɛ wa Ɔlɔɔmɔlɔɔm ukkwoong lukkwoong ɔbɛtɛ vveengodde. Uwɔng ulenɛ tɛ̀ttɛ̀ inaangnɛ ikkwoong ibɛtɛ vveeng ’wɔng mung ka kiyila ayyɔɔt. 5Nyinɔɔng ukkwoongnɛ ɔbɛtɛ vveeng ’wɔng? Ɔlɔɔt wa uyilanɛ ɔttɛ Jesus ulenɛ Waan-Ɔlɔɔmɔlɔɔm keem kɛyɔɔng ukkwoongnɛ. 6Jesus Christ uffu la bannyi baptizim ammɛ la linnyi lubbe ammɛ. Bannyi ’bɔng baang keem lissi ka ɔkɔɔmnɛ uffu, ɔkɔɔm bannyi la linnyi uffu. Kuyeeng biini kɔbwɔɔlɔ kɔttɛ kule ka lɔkkwɔɔn, ka Kuyeeng kulenɛ lɔkkwɔɔn. 7Ittɛɛsɛ ile ikkyaat. 8Kuyeeng la bannyi la linnyi. Ɔkkpɛlɛ abbyɛ bɛlɔɔk kɛssanga ssɔn. 9Iyilanɛ kwa ittɛɛsɛ ya ɔssɛbibit ubeenɛ, ɔzzànga ittɛɛsɛ ya Ɔlɔɔmɔlɔɔm unnyinyɛlɛ ittanɛ lɛkkaam. Ittɛɛsɛ ’yɔng ilenɛ ya Ɔlɔɔmɔlɔɔm unnyinɛ utum Awaan. 10Ɔlɔɔt duu wa uyilanɛ kwa Awaan ɔyanga ittɛɛsɛ ’yɔng baang ka luppyam ammɛ biini. Ɔlɔɔt duu wa usinɛ liyila kwa Ɔlɔɔmɔlɔɔm ɔlɔɔknɛ ɔkkwɔɔbong Ɔlɔɔmɔlɔɔm ɔkkala-lɛlaak ka ufimnɛ kiyila kwa Ɔlɔɔmɔlɔɔm ɔlɔɔknɛ utum Waan ammɛ. 11Ɔzzànga ’kwɔng kulenɛ ittɛɛsɛ: Ɔlɔɔmɔlɔɔm unnyibongyɛlɛ kuddu kwa kɛfal a kɛfal. Kuddu ’kwɔng kussi ka Awaan. 12Ɔlɔɔt duu wa balenɛ ka bɔkaat la Awaan, ɔyanga kuddu ’kwɔng baang. Ɔlɔɔt duu wa usinɛ ka bɔkaat la Waan Ɔlɔɔmɔlɔɔm lile, kuddu ba ɔyanga. 13Nkkpɔk ’wɔng nfeewɔyɔng nkwaaning asan attɛyɔng ayangayɔng kuddu kwa kɛfal a kɛfal, annyɔɔng ba ayanganɛyɔng kiyila atumyɔng Waan Ɔlɔɔmɔlɔɔm. 14Iyanga kɛkkaam a luppyam ka isannɛ ittɛ ibapmɛnɛ bɔfɛɛn duu bwa ammɛ uffiknɛ, bule bbwak, vvenɛ ɔgɔpɔlɔ uppyee. 15Uppyeeyɛlɛ luppyee ɛkɛtɛ duu ya ibapmɛnɛ, ka isannɛ ittɛ ’kwɔng kule ka lɔkkwɔɔn, ɔgbaa isan lɔsan ittɛ unnyi mung yɛlɛ bwa ibapmɛnɛ. 16Ayɛnnɛ ɔkpana annɔ ka ɔnaangnɛ bubbi bwa bule busimɛ lɛwwɔɔl, azɔɔm annyi Ɔlɔɔmɔlɔɔm, wa ule unnyimɛ kuddu. Nkwɔng mung kule kwa balɔɔt ba bubbi abbɛ bule busi bɛ lɛwwɔɔl. Ɔzzànga bubbi bule baang bwa buwwɔɔlnɛ ɔlɔɔt, ba nlɔɔk nttɛ azɔɔm annyiyɔng Ɔlɔɔmɔlɔɔm ka ’kwɔng baang. 17Kɛnaang a lilɔɔk sa libbɔlnɛ ɔkkpɛlɛ bubbi, ɔzzànga bubbi bule baang bwa businɛ ɔlɔɔt lɛwwɔɔl. 18Isan mung ittɛ waan Ɔlɔɔmɔlɔɔm duu wa ɔnaangnɛ bubbi kkpɛt kkpɛt ba ule, ka Waan-Ɔlɔɔmɔlɔɔm ɔkatmɛnɛ; Ɔnaang-a-kɛsɛɛm-a-kuyeeng ba ukkwoong uddopomɛ. 19Isan lɔsan ittɛ ile ba Ɔlɔɔmɔlɔɔm mkkpa vveeng ɔkkpɛlɛ ule ka kɔkɔɔm Ɔnaang-a-kɛsɛɛm-a-kuyeeng. 20Isan lɔsan ittɛ Waan-Ɔlɔɔmɔlɔɔm uffubong. Unnyiyɛlɛ kippyee kɔlɔɔk nkwaaning isan Ɔlɔɔmɔlɔɔm wa lɔkkwɔɔn. Itaa ka bɔkaat la Ɔlɔɔmɔlɔɔm wa lɔkkwɔɔn, itaa ka bɔkaat la Jesus Christ, Waan Ammɛ. Uwɔng ulenɛ Ɔlɔɔmɔlɔɔm wa lɔkkwɔɔn. Uwɔng ulenɛ kuddu kwa kɛfal a kɛfal. 21Bwaan anaam, akatwɔyɔng kɛyɔɔng assekeyɔng ilat!

will be added

X\