1 JOHN 4

1Inngwa luppyam anaam, Tɛ̀ttɛ́ ayila akupyɔng balɔɔt ɔkkpɛlɛ ba battɛnɛ bayanga mung Kuyeeng Ɔlɔɔmɔlɔɔm ɔzzànga allɛbɛ ɔkkɔɔnɛ ulenɛ ka kuyeeng kwa bayanganɛ kussinɛ ka Ɔlɔɔmɔlɔɔm, asan. Bakkala-lalaak, ba battɛnɛ abbɛ bappyee-kutolo Ɔlɔɔmɔlɔɔm, ggbadam batii ifɛɛn ifɛɛn ɔkkpɛlɛ. 2Uwɔng ulenɛ tɛ̀ttɛ̀ ale asan Kuyeeng-Ɔlɔɔmɔlɔɔm. Ɔlɔɔt duu wa ɔttɛnɛ Jesus Christ ɔdɔkɔ uffu tɛ̀ttɛ̀ ɔlɔɔt ɔyanga Kuyeeng kwa kussinɛ ka Ɔlɔɔmɔlɔɔm kuffu. 3Ɔzzànga ɔlɔɔt duu wa ɔkalanɛ ’kwɔng utum Jesus, Kuyeeng kwa kussinɛ ka Ɔlɔɔmɔlɔɔm ba ɔyanga. Kuyeeng ’kwɔng baang kussi ka Ɔlɔɔt-a-kɔfɔk a Christ. Appyeebong attɛyɔng vvenɛ kuffu, gɔɔ gedegede mung kutii ka vveengodde. 4Ɔzzànga, bwaan anaam, aleyɔng ba Ɔlɔɔmɔlɔɔm. Abɛtɛyɔngbong bakkala-lɛlaak ba battɛnɛ abbɛ bappyee kutolo Ɔlɔɔmɔlɔɔm, ka Kuyeeng kwa kulenɛ ka annyɔɔng kɔttanɛ liggbenge kɔtta kuyeeng kwa balɔɔt ba balenɛ ka vveengodde. 5Litolo abbɛ litum lilɔɔk a vveengodde, vveengodde ɔgɔpɔlɔsɛ ka lilenɛ lilɔɔk sa ammɛ. 6Ɔzzànga ayyɔɔt ile ba Ɔlɔɔmɔlɔɔm. Ɔlɔɔt duu wa ɔsannɛ Ɔlɔɔmɔlɔɔm ɔgɔpɔlɔ kwa ayyɔɔt. Ɔlɔɔt duu wa usinɛ wa Ɔlɔɔmɔlɔɔm lile kwa ayyɔɔt ba ɔgɔpɔlɔ. Ɔzzànga ’wɔng ulenɛ ɛtɔk ya ikkwoongnɛ ibwɔɔlɔ bubuubuu Kuyeeng kwa lɔkkwɔɔn la kuyeeng kwa kusinɛ kwa lɔkkwɔɔn lile. 7Inngwa anaam, isaapyɛlɛ kɛyɔɔng, ɔlɔɔt ɔlɔk ɔfɔngɔwɔyɔng kitun ka kɛsaap kissinɛ ka Ɔlɔɔmɔlɔɔm. Ɔlɔɔt duu wa ɔyanganɛ kɛsaap la balɔɔt ule Waan-Ɔlɔɔmɔlɔɔm, ɔsan Ɔlɔɔmɔlɔɔm. 8Ɔlɔɔt duu wa ɔsɛlɛnɛ kɛsaap, Ɔlɔɔmɔlɔɔm baala ɔsan ka Ɔlɔɔmɔlɔɔm ulenɛ kɛsaap. 9Nkwɔng kulenɛ tɛ̀ttɛ̀ Ɔlɔɔmɔlɔɔm ɔyɔɔnɛyɛlɛ kɛsaap ammɛ. Ɔtɔɔm waan ammɛ wa ɔyanganɛ keem, uffu ka vveeng ’wɔng nkwaaning iyanga kuddu kwa kussinɛ ka ammɛ. 10Kɛsaap kile ning mung; Kɛttɛ Ɔlɔɔmɔlɔɔm ɔsaap mung yɛlɛ lissi. Ɔzzànga ayyɔɔt isaapnɛ Ɔlɔɔmɔlɔɔm. Ɔtɔɔm waan ammɛ uffu nkwaaning ule ɛtɔk a kɛsɔɔk a bubbi ayyɔɔt. 11Inngwa anaam, ulenɛ ka isaapnɛ Ɔlɔɔmɔlɔɔm ning mung, nzang wayyɔɔt ɔ́saapyɛlɛ. 12Ɔlɔɔt ɔlɔk wa ulenɛ Ɔlɔɔmɔlɔɔm ka zzeen lɛyɛn ba ule. Ulenɛ ka wayyɔɔt ɔsaapnɛyɛlɛ nzang Ɔlɔɔmɔlɔɔm ɔtaa ka bɔkaat la ayyɔɔt. Ɔnaang kɛsaap ammɛ ka tɔkɔlɔ ayyɔɔt kile sa doddo ka lɔkkwɔɔn. 13Nkwɔng kulenɛ kwa kɔnaangnɛ isan ka lɔkkwɔɔn ittɛ ile ka bɔkaat la Ɔlɔɔmɔlɔɔm, ammɛ ɔssɛ ule ka bɔkaat la ayyɔɔt ka ulenɛyɛlɛ Kuyeeng ammɛ linnyi. 14Ɔzzànga iyɛnbong isan, ibwɔɔlɔ balɔɔt balɔk ittɛ Abassɛ ɔtɔɔmnɛ Waan ammɛ ɔttɛ uffu ɔzzánga Ɔkkala-ikkala vveeng ’wɔng. 15Ɔlɔɔt duu wa ɔbwɔɔlɔnɛ ppwool ɔttɛ Jesus ulenɛ Waan-Ɔlɔɔmɔlɔɔm, Ɔlɔɔmɔlɔɔm ule la ammɛ, ammɛ ɔssɛ ule la Ɔlɔɔmɔlɔɔm. 16Ayyɔɔt biini isan, iyila kwa kɛsaap sa Ɔlɔɔmɔlɔɔm ɔyanganɛ la ayyɔɔt. Ɔlɔɔmɔlɔɔm ulenɛ kɛsaap, ɔlɔɔt duu wa ɔtaanɛ ka kɛsaap, ɔtaa ka bɔkaat la Ɔlɔɔmɔlɔɔm, Ɔlɔɔmɔlɔɔm ɔssɛ ɔtaa ka bɔkaat la ammɛ. 17Ɔlɔɔmɔlɔɔm ɔnaang kɛsaap kigbengeyɛlɛ ka tɔkɔlɔ ɔkkɔɔnɛ iyanga kɛkkaam a luppyam ka kɛtɔm-a-kɛkaal. Ɔzzànga vvenɛ iyangasɛ ka kuddu ayyɔɔt ka vveeng ’wɔng kulenɛ kɛssanga ssɔn tɛ̀ttɛ̀ kwa Christ. 18Bbwɔp ka kɛsaap ba lile. Kɛsaap sa lɔkkwɔɔn kɛggba lilɔɔk a bbwɔp ɔkkpɛlɛ. Ɔzzànga ka kulenɛ ning mung, kɛsaap sa doddo ba kile ka luppyam ɔbbwɔp ka bbwɔp lissɛnɛ ka kɛyɛn akama. 19Iyanga kɛsaap, ka ayyɔɔt ittenɛ Ɔlɔɔmɔlɔɔm lɛsaap. 20Ulenɛ ka ɔlɔɔt ɔlɔk ɔlɔɔknɛ ɔttɛ, “Ntele Ɔlɔɔmɔlɔɔm”, wabbɛ utunmɛ, ɔlɔɔt ’wɔng baang ɔkkala-lɛlaak. Ba ukkwoong utele Ɔlɔɔmɔlɔɔm wa ɔtakamɛnɛ lɛyɛn ka zzeen ka usinɛ wabbɛ wa ulemɛnɛ ka zzeen lɛyɛn litele. 21Uwɔng ulenɛ lafɔɔ za Christ unnyinɛyɛlɛ. Ɔlɔɔt wa Ɔlɔɔmɔlɔɔm ɔsaapmɛnɛ wabbɛ ɔssɛ ɔsaapmɛ ɔgbaa.

will be added

X\