1 JOHN 2

1Bwaan anaam, nkkpɔk ’kwɔng nfeewɔyɔng nkwaaning asiyɔng bubbi lɛnaang. Ɔzzànga ɔlɔɔt duu wa ɔnaangnɛ bubbi, iyanga Jesus Christ wa ulenɛ bbwak, ukkwoong ukkpenge abassɛ unnyiyɛlɛ. 2Christ biini ulenɛ ɔlɔɔt wa kussinɛ ka ammɛ basɔɔkyɛlɛ bubbi ayyɔɔt. Gɔɔ bubbi ayyɔɔt keem lissi, bubbi balɔɔt ɔkkpɛlɛ ɔgbaa. 3Itelenɛ lafɔɔ Ɔlɔɔmɔlɔɔm, nzang isanmɛ mung. 4Ɔlɔɔt ɔlɔk ɔttɛnɛ ɔsan mung Ɔlɔɔmɔlɔɔm, usi lafɔɔ ammɛ litele, kɛssanga ɔlɔɔt ’sɔng baang ɔkkala-lɛlaak, ɔgbaa lɔkkwɔɔn ka ammɛ ba lule. 5Ɔzzànga ɔlɔɔt duu wa utelenɛ lɛmmwɔɔl ammɛ, Ɔlɔɔt ’wɔng baang ulenɛ wa ɔyanganɛ kɛsaap Ɔlɔɔmɔlɔɔm sa lɔkkwɔɔn. Uwɔng ulenɛ tɛ̀ttɛ̀ isannɛ ittɛ ile ka bɔkaat bwa lɔkkwɔɔn la Ɔlɔɔmɔlɔɔm. 6Ɔlɔɔt wa ɔttɛnɛ ammɛ uddu ɔggyan bɔkaat bwa lɔkkwɔɔn la Ɔlɔɔmɔlɔɔm, ɔtaa tɛ̀ttɛ̀ Jesus Christ ɔtaanɛ. 7Inngwa anaam ya luppyam, lifɔɔ za nkkpɔkwɔnɛyɔng mung ufaa lissi; lile ɔtɔm a lifɔɔ za aggbanɛ lissi ayangayɔng ka ussinɛ ka lutte. Ɔtɔm a lifɔɔ ulenɛ kuttu kwa aggbanɛyɔng lippyee. 8Ɔzzànga mkkpa kɔnaang, lifɔɔ za nkkpɔkwɔnɛyɔng mung ufaa, lɔkkwɔɔn azzɛ ayɛnyɔng ka Christ la annyɔɔng. Kisul kile ka kɛsaknɛ, buppwolo biini butii ka kippwolo. 9Ɔlɔɔt duu wa ɔttɛnɛ ammɛ utii ka buppwolo, ɔkpana ammɛ utunmɛ, ɔlɔɔt ’wɔng baang utii ka kisul tɔttɔt ɛkɛtɛ ’yɔng baang. 10Ɔlɔɔt duu wa ɔttɛnɛ ɔkpana ammɛ ɔsaapmɛ lɔsaap, ule ka buppwolo. Bulɔk mɛ ba bule bwa bule bunaang ɔkpana ammɛ ɔttɔ ka bubbi. 11Ɔlɔɔt duu wa ɔkpana ammɛ utunmɛnɛ, ule ka kisul. Ɔssɛ ka ɔssɛnɛ baang, ba ɔsan ka ɛfɛɛn umiinɛ ka kisul kilemɛnɛ lɛnaang ussi ifim. 12Bwaan anaam, nkkpɔk nfeewɔyɔng annyɔɔng ka balewɔnɛyɔng bubbi annyɔɔng lɛsɔɔk ka lɛkɔɔl a Jesus Christ. 13Nkkpɔk nfeewɔyɔng annyɔɔng idedde, asanmɛyɔng lɔsan, ammɛ wa ɔggbanɛ lissi ule ka lutte. Nkkpɔk nfeewɔyɔng annyɔɔng bakolobya ka alenɛyɔng Ubbu lɛbɛtɛ. 14Bwaan anaam, nkkpɔk nfeewɔyɔng annyɔɔng, ka asannɛyɔng Dedde. Nkkpɔk nfeewɔyɔng annyɔɔng idedde, ka asannɛyɔng ɔlɔɔt wa ɔggbanɛ lissi ule ka lutte. Nkkpɔk nfeewɔyɔng annyɔɔng bakolobya ka akkaamnɛyɔng. Lɛmmwɔɔl Ɔlɔɔmɔlɔɔm lɛtaa la annyɔɔng. Abɛtɛyɔngbong Ɔlɔɔt-wa-ɔbbɔlnɛ bɛnaang. 15Tɛ̀ttɛ́ vveeng ’wɔng ɔsaapwɔyɔng, gɔɔ bɔfɛɛn ɔkkpɛlɛ bwa bulenɛ ka vveeng ’wɔng, nzang kɛsaap ba ayangayɔng atumyɔng Ssaawɔ annyɔɔng. 16Bɔfɛɛn duu bwa bulenɛ ka vveeng ’wɔng, bwa kkwɔɔt ɔnaang-a-bubbi liggyannɛ, balɔɔt bayɛnnɛ baggyanbwɛ kɛyanga la bɔfɛɛn ɔkkpɛlɛ bwa balɔɔt ɔkkyaanɛbɛ kwa abbwɛ. Nbyɔng mung ɔkkpɛlɛ ka Dedde ba bissi, ɔkkpɛlɛ abbyɛ bissi ka ɛkpansi. 17Vveeng la bɛfɛɛn ɔkkpɛlɛ bya bɛsaapnɛ balɔɔt vvenɛ bɛsak. Ɔzzanga ɔlɔɔt wa ɔnaangnɛ bwa Ɔlɔɔmɔlɔɔm ɔggyannɛ, ule ɔtaa ka kuddu kwa kɛfal a kɛfal. 18Bwaan anaam, lakpeke lakkɛtɛbong. Babwɔɔlɔwɔyɔngbong battɛ Ɔlɔɔt-a-kɔfɔk a Christ vvenɛ uffu, gedegede mung balɔɔt-a-kɔfɔk a Christ ggbadam batumabong, kwakkwɛ baang isannɛ ittɛ lakpeke lakkɛtɛbong. 19Balɔɔt ’bɔng baang ka likup ayyɔɔt ba bale ka lɔkkwɔɔn, kwakkwɛ baang bagbatanɛ bakɔngɔyɛlɛ. Balenɛ ka balenɛ ka likup ayyɔɔt, nzang bataa la ayyɔɔt. Ɔzzànga bagbata nkwaaning kɔnaang ɔlɔɔt ɔkkpɛlɛ ppwool isan ittɛ ka lɔkkwɔɔn ka likup ayyɔɔt ba bale. 20Ɔzzànga ayangayɔngbong Kuyeeng-Ɔlɔɔmɔlɔɔm kwa Christ unnyiwɔnɛyɔng, ɔkkpɛlɛ annyɔɔng asanyɔng mung lɔkkwɔɔn. 21Ɔzzànga ba nkkpɔk nfeewɔyɔng ka asinɛyɔng lɔkkwɔɔn a kɔlɔɔk lɛsan, nkkpɔk nfeewɔyɔng ka asannɛyɔng lɔkkwɔɔn a kɔlɔɔk. Asanyɔng lɔsan attɛyɔng lɛlaak ka lɔkkwɔɔn ba lissi. 22Nggka nnyinɛ ulenɛ ɔkkala-lɛlaak? Ɔlɔɔt duu wa ɔttɛnɛ Jesus lissi ulenɛ Ɔlɔɔt wa Ɔlɔɔmɔlɔɔm ɔsanganɛ. Kɛssanga ɔlɔɔt ’wɔng baang kilenɛ ɔlɔɔt-a-kɔfɔk a Christ, ufim Abassɛ la Waan ammɛ. 23Ɔlɔɔt duu wa ufimnɛ Awaan, ɔssɛbong ufim Abassɛ ɔgbaa. Ɔlɔɔt duu wa uyilanɛ kwa Awaan-Ɔssɛbong uyila kwa Abassɛ ɔgbaa. 24Asan ka lɔkkwɔɔn attɛ alokobong bɔtɔɔm Ɔlɔɔmɔlɔɔm ka luppyam annɔ bwa appyeenɛ ka ussinɛ ka lutte. Alokonɛ kwa appyeenɛ ka ussinɛ ka lutte, vvenɛ ataa ka bɔkaat la Abassɛ la Awaan ɛkɛtɛ ɔkkpɛlɛ. 25Ɔzzànga Christ biini usekelebong ɔttɛ vvenɛ unnyiyɛlɛ kuddu kwa kɛfal a kɛfal. 26Nkkpɔkwɔyɔng ’kwɔng ntum kwa balɔɔt ’bɔng baang ba babumwɔnɛyɔng kɛfɛɛt. 27Kwa annyɔɔng mung, Christ ɔtɔɔmbong Kuyeeng ammɛ ufeewɔyɔng. Tɛ̀ttɛ̀ Kuyeeng kule kɔtaa la annyɔɔng, ɔlɔɔt ɔlɔk ba ɔbɛlɛ lɛggyan ɔttɛ uffu ukupolowɔyɔng. Kuyeeng ammɛ kukopolowɔyɔngbong kutum bɛfɛɛn ɔkkpɛlɛ. Kwa kukopolonɛ, kule ka lɔkkwɔɔn, lɛlaak lissi. Atele lukopolo Kuyeeng-Ɔlɔɔmɔlɔɔm, ataayɔng ka bɔkaat la Christ. 28Iii, bwaan anaam ataayɔng la ammɛ nkwaaning ayangayɔng kɛkkaam a luppyam ka ɛkɛtɛ ya utumanɛ, ifɔngɔ kɛmma iddumu la izzit ka Kɛtɔm sa ule uffu. 29Asanyɔng lɔsan attɛyɔng Christ ule wa bbwak; asan attɛyɔng ɔlɔɔt wa ɔnaangnɛ kwa bbwak, ammɛ Waan-Ɔlɔɔmɔlɔɔm.

will be added

X\