1 Ikkpɔk kɔlɔɔk a lɛmmwɔɔl a kuddu za lɛggbanɛ lissi ka lutte ifeewɔyɔng: Ippyeebongzɛ, iyɛnbongzɛ ka zzeen ayyɔɔt. Iii, ikɔɔlɔbongzɛ, isingizɛ ka labɔɔk. 2 Iyɛn kuddu ’kwɔng ka kɔttanɛ ka vveeng. Ɔzzánga ilɔɔk kɔlɔɔk akkwɛ. Ibwɔɔlɔwɔyɔng kuddu kwa kɛfal a kɛfal kwa kulenɛ la Dedde, ulenɛyɛlɛ lɛnaang isankwɛ. 3 Ɔgbaa ibwɔɔlɔwɔyɔngbong bwa iyɛnnɛ ile lippyee nkwaaning atooloyɔng la ayyɔɔt ka kɔssɛ kwa iyanganɛ la Dedde la Awaan, Jesus Christ. 4 Ikkpɔk ’kwɔng nkwaaning laggele ayyɔɔt lattala. 5 Uwɔng ulenɛ lɛmmwɔɔl za ippyeenɛ ka Waan ammɛ ɔbwɔɔlɔwɔnɛyɔng: Ɔlɔɔmɔlɔɔm ulenɛ buppwolo, kisul ba kile la ammɛ. 6 Ittɛnɛ ayyɔɔt ile ka kɔssɛ la ammɛ, ilɔngɔlɔ ibbal ka kisul lɛtaa, nzang ikkalabong lɛlaak ka lɛmmwɔɔl la linaang ɔgbaa. 7 Ɔzzànga ayyɔɔt itaanɛ ka buppwolo tɛ̀ttɛ̀ ammɛ ulenɛ ka buppwolo, nzang iyanga bɔkaat la ba ayyɔɔt, linnyi Waan ammɛ, Jesus, linaangbongyɛlɛ itta ka bubbi. 8 Ittɛnɛ ayyɔɔt bubbi ba inaang, ibbwa-lɔbbwa, idɛmyɛlɛ kɛyɔɔng, lɔkkwɔɔn a kɔlɔɔk ka ayyɔɔt ba lule. 9 Ɔzzànga ibwɔɔlɔnɛ Ɔlɔɔmɔlɔɔm bubbi ayyɔɔt, vvenɛ ɔnaang kwa ɔttɛnɛ vvenɛ ɔnaang: Vvenɛ ɔsɔɔkyɛlɛ bubbi ayyɔɔt, ɔsangayɛlɛ ka lilɔɔk sa linaangyɛlɛ ibbɔl. 10 Ittɛnɛ bubbi ba itaka inaang, nzang ikkwɔɔbong Ɔlɔɔmɔlɔɔm ɔkkala-lɛlaak. Lɛmmwɔɔl ammɛ ka luppyam yɛlɛ ba lile.
