1 CORINTHIANS 9

1Anaam wa nlenɛ ka bubili lɛtta lissi ɔɔ? Anaam uyilabɔtɔɔm a Jesus lissi ɔɔ? Anaam Jesus, Uyini ayyɔɔt, ba ntaka nyɛn ɔɔ? Annyɔɔng lissi alenɛyɔng balɔɔt ba nkkwɔɔnɛ nnyi Uyini ɔɔ? 2Mkkpa balɔɔt balɔk basinɛ lɛtɔk tɛ̀ttɛ̀ uyilabɔtɔɔm a Jesus, annyɔɔng atɔknɛyɔng lɔtɔk! Kuddu annyɔɔng, ka kulenɛ ka bɔkaat la Uyini, kɔyɔɔbong kɔttɛ anaam uyilabɔtɔɔm a Jesus. 3Balɔɔt bakpɛnnɛnɛ, uwɔng ulenɛ tɛ̀ttɛ̀ nkkalanɛnɛ kɛyɔɔng. 4Bbwak nɛ ba kule ka bannyinɛnɛ kazzi la batak ka kɛnaang anaam ɔɔ? 5Mung lakke ba nyanga za ntɔknɛ wanavva-luzɔɔm nsam nmii kɔssɛ tɛ̀ttɛ̀ bayilabɔtɔɔm a Jesus balɔk la ikpana Uyini la Peter banaangnɛ ɔɔ? 6Barnabas la anaam keem ilenɛ balɔɔt ba inaangnɛ kɛnaang iggyan kuddu ayyɔɔt keem ɔɔ? 7Bɔka wa sɔgya ukkpelemɛnɛ kɛyɔɔng ka busɔgya? Bɔka uwoop-a-bɔtɔɔm usinɛ bwa uwoopnɛ ka bɔtɔɔm ammɛ lizzi? Bɔka ɔkɔɔm-igɔdɔ usinɛ libee za lissinɛ ka igɔdɔ ammɛ lɛvva? 8Baala nkɔɔng ka kɛkɔɔm a bɛfɛɛn bya ippyeenɛ la kɛtɔm la kɛtɔm ntolo kutolo ka Lafɔɔ lassɛnɛ lalɔɔk ning baang. 9Ikkwɔɔ la Lafɔɔ a Moses za lattɛnɛ, “Tɛ̀ttɛ́ aggbɔ ɔgɔdɔ kamma ka ɛkɛtɛ ya ɔssalwɔnɛ bɛfɛɛn.” Ngkka mung Ɔlɔɔmɔlɔɔm kɔbɛtɛmɛ kwa igɔdɔ ɔɔ? 10Anngwa attɛyɔng ayyɔɔt lissi ka ɔkkwɔɔnɛ ɔɔ? Ka lɔkkwɔɔn, nkwɔng badɔkɔ bakkpɔk kwa ayyɔɔt. Ɔlɔɔt wa uwoopnɛ bɔtɔɔm la ɔlɔɔt wa ɔyaatnɛ liyaat banaang kɛnaang battina kwa bale bassɛ bayanga etini ka kɛnaang sa banaangnɛ. 11Ikɔɔmbong lɛmmwɔɔl Ɔlɔɔmɔlɔɔm ifeewɔyɔng. Ɔzzánga ba kɔyyɛɛp ka iyanganɛ lɛsɔɔk ɔɔ? 12Balɔɔt balɔk bayanganɛ lakke za kɛggyan a bɔfɛɛn ka labɔɔk annyɔɔng, ba anngwa attɛyɔng lakke za ayyɔɔt laggbenge latta za abbɛ ɔɔ? Ɔzzànga lakke ’zɔng mung ba itaka iyɔɔ. Lutini ’gwɔng, inaangbong lutini kɔlɔɔk ɔkkpɛlɛ nkwaaning bɔfɛɛn bulɔk busi lile bwa butununɛ Kuttu-Budoddo a Christ. 13Asanyɔng lɔsan attɛyɔng balɔɔt ba banaangnɛ kɛnaang ka Ggwoon-Ɔlɔɔmɔlɔɔm, kazzi abbɛ kassi baang ka Ggwoon-Ɔlɔɔmɔlɔɔm. Balɔɔt ba banaangnɛ lɛtɔm ka labun Ɔlɔɔmɔlɔɔm bayanga etini abbɛ ka labun Ɔlɔɔmɔlɔɔm. 14Kɔssɛ kule kɛssanga ssɔn. Uyini ɔlɔɔkbong ɔttɛ balɔɔt ba bakopolonɛ Kuttu-Budoddo Ɔlɔɔmɔlɔɔm bale bayanga kazzi abbɛ baang. 15Ɔzzànga ba ntaka nbap kwa etini anaam, ɔlɔk vvenɛ nkkpɔk lilɔɔk ’sɔng mung nggyan etini anaam biini. Lutini ’gwɔng nkɔɔm ɛtɔk nbbe. Ɔlɔɔt ba ule wa ule ukkwoong usikili lɔbba anaam gwa bbwak usseke babbu lammwɔɔl. 16Lakke ba nyanga za kɛnaang a libba ka nlenɛ lɛffɔ nkopolo Kuttu-budoddo Ɔlɔɔmɔlɔɔm. Kkpɔɔ Uyini ɔttɛnɛ nkopolo Kuttu-budoddo Ɔlɔɔmɔlɔɔm. Nzang vvenɛ nyɛn akama nsak businɛ Kuttu-budoddo Ɔlɔɔmɔlɔɔm likopolo. 17Nlenɛ ka nnaangnɛ kɛnaang anaam tɛ̀ttɛ̀ kɛnaang sa nsanganɛ gbɔɔ, nzang vvenɛ nggyan ikipili. Ɔzzànga ntɔkbongsɛ tɛ̀ttɛ̀ kɛnaang anaam ka ulenɛ Ɔlɔɔmɔlɔɔm ulenɛnɛ lɛkpaka ɔttɛ nnaang. 18Ikipili anaam ulenɛ ’bɔng? Ikipili ya nyanganɛ ulenɛ kikopolo kuttu budoddo Ɔlɔɔmɔlɔɔm, sa nkopolonɛ nsi kappya lɛbɛkɛ. Kikkpele ba ntɔk ka nkopolonɛ Kuttu-budoddo Ɔlɔɔmɔlɔɔm. 19Anaam ubili lissi. Ka bubili kɔbɔɔk ɔlɔɔt ba nle. Nllɔllɔ nsammɛ kɛyɔɔng nsseke ubili ɔlɔɔt ɔkkpɛlɛ nttɛ nkwaaning nyanga balɔɔt ggbadam tɛ̀ttɛ̀ nkkwoongnɛ. 20Ka ɛkɛtɛ ya nnaangnɛ kɛnaang la balɔɔt a Jews, nkup eleme balɔɔt a Jews nkwaaning bayila kwa anaam. Anaam ɔlɔɔt a Lafɔɔ a Moses lissi, ɔzzànga nnaang tɛ̀ttɛ̀ balɔɔt a Jews nkwaaning bayila kwa anaam. 21Kɔssɛ kule kɛssanga ssɔn, ka ɛkɛtɛ ya nlenɛ la Ikanakana nnaang tɛ̀ttɛ̀ wakanakana wa usinɛ ka Lafɔɔ balɔɔt a Jews lile nkwaaning Ikanakana bayila kwa anaam. Nkwɔng baang lissi kule kɔnaang nsi Lafɔɔ Ɔlɔɔmɔlɔɔm litele. Anaam ka lɔkkwɔɔn nle ka tɔkɔlɔ lafɔɔ a Christ. 22Nffɔnɛ ka ɛfɛɛn a balɔɔt ba basɛlɛnɛ kiyila sa kɛkkaamnɛ, nsikili tɛ̀ttɛ̀ ɔlɔɔt abbɛ vvɔn nkwaaning bayila kwa anaam. Nsikili bɛfɛɛn ɔkkpɛlɛ ka ɛfɛɛn a balɔɔt ɔkkpɛlɛ nkwaaning nkkala balɔɔt balɔk ka ɛtɔk duu ya nkkwoongnɛ. 23Nkwɔng mung ɔkkpɛlɛ nnaang ka lɛttɔ Kuttu-budoddo Ɔlɔɔmɔlɔɔm nkwaaning nyanga etini ka ppyɛɛ ’wɔng baang. 24Asanyɔng lɔsan attɛyɔng balɔɔt ggbadam bammanɛ lɔfat, ule ɔlɔɔt vvɔn keem ka ule ɔbɛtɛ ɔkkpɛlɛ. Ammayɔng ning baang nkwaaning abɛtɛyɔng ayangayɔng lɛsɔɔk. 25Ɔlɔɔt duu wa ukkoopnɛ kɛmma lɔfat utele lafɔɔ lɔfat. Ɔnaang ning baang nkwaaning ɔttɔpɔ ododo wa ule usi lɛbbɔ. Ɔzzánga ayyɔɔt inaang kwa ododo wa ule ɔbbɔ kɛfal a kɛfal. 26Kwakkwɛ baang nmmanɛ ssɔng nmii ka lɔkkwɔɔn gwa lulenɛ ka lakpeke. Kwakkwɛ baang nlenɛ tɛ̀ttɛ̀ ɔtɔɔp-iddu wa usinɛ iddu ammɛ gbɔɔgbɔɔ lɛtɔɔp. 27Nkkaam ka iddu ya batɔɔpnɛnɛ. Nkat kkwɔɔt anaam doddo, tɛ̀ttɛ́ baffu babɛtɛnɛ ka nlenɛ balɔɔt balɔk lɛkkwɔɔ nttɛ baffu ikanga.

will be added

X\