1 CORINTHIANS 7

1Gedegede mung ile ka inngwanɛ kɔlɔɔk kwa akkpɔknɛ atumyɔng. Ɔlɔɔt ɔnaang bbwak ka usinɛ wanavva lɛtɔk. 2Kɛssɛ-kɛzak ka kilenɛ lɛsak lɛttala, ɔlɔɔt ɔkkpɛlɛ ɔtɔk wanavva wa ammɛ. Wanavva la vvɔn ɔyanga walam wa ammɛ biini. 3Waanwalam ɔnaang tɛ̀ttɛ̀ ɔtɔk-a-wanavva, wanavva ɔnaang tɛ̀ttɛ̀ ullu-walam. Ɔlɔɔt la vvɔn ɔnaang kwa wabbɛ ɔggyannɛ ɔttɛ ɔnaang. 4Wanavva lissi ulenɛ uyini a kkwɔɔt ammɛ biini. Kkwɔɔt ammɛ lile sa walam ammɛ. Kɔssɛ kule kɛssanga ssɔn: waanwalam lissi ulenɛ uyini a kkwɔɔt ammɛ biini. Kkwɔɔt ammɛ lile sa wanavva ammɛ. 5Tɛ̀ttɛ́ afimwɔyɔng kɛyɔɔng. Akkwoong mung anaangyɔng likup, anaangyɔng ning baang ka waan ɛkɛtɛ ssup nkwaaning ayangayɔng liggbili za kɛssɛɛn a luzɔɔm. Ɔzzànga appyɛlɛ ataayɔng ka bɔkaat tɛ̀ttɛ̀ walam la wanavva. Ataayɔng ka bɔkaat ɔkkɔɔnɛ Satan usi likkwoong ɔllɛwɔyɔng, ka ale asi likkwoong akɔɔmwɔyɔng kɛyɔɔng. 6Nbwɔɔlɔwɔyɔngbong ’kwɔng mung, ɔzzànga tɛ̀ttɛ̀ lafɔɔ lissi, kule tɛ̀ttɛ̀ kɛbba bikɔɔm. 7Kkpɔɔ ndɔkɔ nngwa nttɛ ɔkkpɛlɛ ataayɔng buyya tɛ̀ttɛ̀ anaam. Ɔzzànga ɔlɔɔt ɔlɔɔt ɔyanga lɛsɔɔk za Ɔlɔɔmɔlɔɔm unnyimɛnɛ. Ɔlɔɔt vvɔn ɔyanganɛ lɛsɔɔk ’zɔng; wa vvɔn ɔyanga lɛlɔk. 8Gedegede mung nlɔɔk ’kwɔng la balɔɔt ba batakanɛ bwanavva lɛtɔk la ba batakanɛ bwalam lillu, la ba bwalam abbɛ babbenɛ bakɔngɔbɛ. Nzang kule kɔtta lɛyyɛɛp ka ataanɛyɔng kɛyɔɔng tɛ̀ttɛ̀ anaam mung. 9Ɔzzànga asinɛyɔng likkwoong akkaamyɔng ippyam, atɔkyɔng bwanavva. Bwanavva bamii ballu bwalam. Kɔtta lɛyyɛɛp ka atɔknɛyɔng bwanavva; bwanavva ballu bwalam; lutini ataanɛyɔng la ikama ka ippyam. 10Kwa balɔɔt ba balenɛ bwanavva lɛtɔk la ba balenɛ bwalam lillu, nyanga lɔttama. Gwa anaam biini lissi, ɔzzànga gwa Uyini. Wanavva tɛ̀ttɛ́ ɔgbata ɔkɔngɔ walam ammɛ. 11Ɔnaangnɛ ning baang ule ɔppyɛɛ ɔtaa kɛyɔɔng ɔlɔk nzang ɔppyɛlɛ umii bataa ka bɔkaat la walam ammɛ. Waanwalam ɔgbaa tɛ̀ttɛ́ ɔggba wanavva ammɛ. 12Nlɔɔk kwa balɔɔt balɔk. Anaam nlɔɔknɛ, Uyini lissi. Ɔlɔɔt wa uyilanɛ kwa luzɔɔm ɔtɔknɛ wanavva wa ɔsɛlɛnɛ kiyila, wanavva uyilanɛ ɔttɛ vvenɛ ullumɛ, tɛ̀ttɛ́ ɔggbamɛ. 13Wanavva wa uyilanɛ kwa luzɔɔm ullunɛ walam wa usinɛ kiyila lɛyanga, waanwalam uyilanɛ ɔttɛ vvenɛ ɔtɔkmɛ tɛ̀ttɛ̀ wanavva ammɛ, wanavva tɛ̀ttɛ́ ufim walam ’wɔng baang. 14Ɔlɔɔmɔlɔɔm ɔtɔk mung waanwalam wa ɔsɛlɛnɛ kiyila ulenɛ ka ɔtɔknɛ wanavva wa ɔyanganɛ kiyila. Ɔlɔɔmɔlɔɔm ɔtɔk mung wanavva wa ɔsɛlɛnɛ kiyila ulenɛ ka ullunɛ la walam wa ɔyanganɛ kiyila ka Christ. Kusinɛ ning lile, bwɔɔn abbɛ bale bale tɛ̀ttɛ̀ ba balɔɔt ba batakanɛ baptizim lɛnaang. Ɔzzànga ka kulenɛ ning mung Ɔlɔɔmɔlɔɔm ɔtɔk mung bɛ. 15Ulenɛ bɔfɛɛn ɔlɔɔt wa ɔsɛlɛnɛ kiyila ɔttɛnɛ vvenɛ ɔgbata ɔkɔngɔ ɔlɔɔt wa uyilanɛ kwa luzɔɔm, ɔfɔngɔmɛ ɔgbata. Kulenɛ ka ɛtɔk ’yɔng baang ɔlɔɔt wa uyilanɛ kwa luzɔɔm, ule wanavva ɔlɔk waanwalam ukkwoong mung ɔnaang kwa uttinanɛ. Ɔlɔɔmɔlɔɔm ɔkkwɔɔwɔyɔngbong ɔttɛ ataayɔng ka bɔkaat. 16Wanavva wa ukupnɛ kwa Jesus! Ale anaang nang asan bentee attɛ baala akkwoong akkala walam annɔ? Waanwalam wa uyilanɛ kwa Jesus ale anaang nang asan attɛ baala akkwoong akkala wanavva annɔ? 17Ɔlɔɔt la vvɔn ɔnaang kwa lɛsɔɔk za Uyini unnyimɛnɛ. Ɔtaa tɛ̀ttɛ̀ ɔggbanɛ lissi ule ka Ɔlɔɔmɔlɔɔm ɔkkwɔɔmɛnɛ. Nkwɔng kulenɛ ɛtɔk ya nkopolonɛ ka izɔɔm ɔkkpɛlɛ. 18Ɔlɔɔt wa ulenɛ lɛtaa lɛzza ulenɛ kɛkkwɔɔ Ɔlɔɔmɔlɔɔm liyila, tɛ̀ttɛ́ ubum ɔttɛ ammɛ lɛtaa ba ɔtaka ɔzza. Ɔlɔɔt wa ɔtakanɛ lɛtaa lɛzza ulenɛ kɛkkwɔɔ Ɔlɔɔmɔlɔɔm liyila, tɛ̀ttɛ́ ɔzza lɛtaa. 19Kɛzza lɛtaa la kisi lɛtaa lɛzza kɔlɔɔk gaang lissi. Kwa kɔttanɛ ulenɛ kitele Lafɔɔ-Ɔlɔɔmɔlɔɔm. 20Ɔlɔɔt ɔkkpɛlɛ ɔtaa tɛ̀ttɛ̀ ɔggbanɛ lissi ule ka ɛkɛtɛ ya uyilanɛ kɛkkwɔɔ Ɔlɔɔmɔlɔɔm. 21Adɔkɔ ubili ka Ɔlɔɔmɔlɔɔm ɔkkwɔɔwɔnɛ ɔɔ? Kɔyyɛɛp mung. Ɔzzànga akkwoongnɛ ayanga kufuk kwa ale anaang atta ka bubili, akɔɔmkwɛ doddo. 22Ubili wa Uyini, Ɔlɔɔmɔlɔɔm ulemɛnɛ lɛkkwɔɔ ammɛ ulenɛ ɔlɔɔt wa Uyini, Ɔlɔɔmɔlɔɔm usimɛnɛ ubili lɛbɛlɛ lɛkkwɔɔ. Ɔlɔɔt wa usinɛ ka bubili lile, Christ ɔkkwɔɔmɛnɛ, ɔlɔɔt ’wɔng baang usseke ubili a Christ. 23Ɔlɔɔmɔlɔɔm ɔlɛɛpwɔyɔngbong, Tɛ̀ttɛ́ abbalyɔng ka bubili balɔɔt balɔk lile. 24Ikpana anaam, ɔlɔɔt la vvɔn ɔtaa ka bɔkaat la Ɔlɔɔmɔlɔɔm tɛ̀ttɛ̀ ɔdɔkɔnɛ ka Ɔlɔɔmɔlɔɔm ɔkkwɔɔmɛnɛ. 25Nkwɔng kutum kɔlɔɔk kwa akkpɔknɛ atumyɔng bwanavva ba batakanɛ bwalam lillu la bwaanbwalam ba batakanɛ bwanavva lɛtɔk: Nsi lɔdda ka Uyini lɛtɔk. Ɔzzànga nlɔɔk kwa luttina anaam biini ka nlenɛ ɔlɔɔt wa nlenɛ Ɔlɔɔmɔlɔɔm lɛttɔ libbe ulenɛ lakke linnyi. 26Ittinanɛ kwa akama wa gedegede mung, nttina nttɛ kɔtta lɛyyɛɛp ka ɔlɔɔt ɔtaanɛ tɛ̀ttɛ̀ ulenɛ. 27Ayangabong wanavva ɔɔ? Ulewɔnɛ baang, tɛ̀ttɛ́ asimɛ doddo lɛkɔɔm. Wanavva ba ayanga ɔɔ? Asinɛ lɛyanga tɛ̀ttɛ́ atɔk wanavva. 28Ɔzzànga atɔknɛ wanavva, bubbi ba ataka anaang. Wanavva wa ɔtakanɛ walam lillu, ullunɛ walam, bubbi ba ɔtaka ɔnaang. Ɔzzànga vvenɛ nkkalawayɔng ka lilɔɔk sa kɛtɔm ɔkkpɛlɛ sa balɔɔt ba batɔknɛ bwanavva bale bayanga. 29Ikpana anaam, nkwɔng kulenɛ kwa nttinanɛ; ɛkɛtɛ gaang ba ɛbɛlɛ lɛlɔm. Ɔzzànga ka ussinɛ mung umii ka lusso, batɔk-a-bwanavva bataa tɛ̀ttɛ̀ batakanɛ bwanavva lɛtɔk. 30Balɔɔt ba bakkwanɛ, bataa tɛ̀ttɛ̀ balenɛ ka laggele. Ba basɛɛknɛ bataa tɛ̀ttɛ̀ balenɛ ka lakpimili. Balɔɔt ba balɛɛpnɛ lɛlɛɛp bataa tɛ̀ttɛ̀ balɔɔt ba basinɛbɛ bwa balɛɛpnɛ linnyi. 31Balɔɔt ba battinanɛ kwa iyyɛɛp a vveengodde, batɔk iyyɛɛp tɛ̀ttɛ̀ ubbu kɔlɔɔk. Ɛkpansi ’yɔng mung tɛ̀ttɛ̀ elenɛ lule gedegede mung baala ettumu mmɛmmɛ. 32Nggyan nttɛ luppyam lɔfɔngɔwɔyɔng kɛbɛlɛ lɛzza. Ɔlɔɔt wa ɔtakanɛ wanavva lɛtɔk, ubee bbwak ka kɛnaang Ɔlɔɔmɔlɔɔm, ɔggyannɛ ɔttɛ ɔnaang kwa kɔsaapnɛ Ɔlɔɔmɔlɔɔm. 33Ɔlɔɔt wa ulenɛ wanavva lɛtɔk, ubee bbwak ka bɛfɛɛn a vveengodde, ɔggyannɛ ɔttɛ ɔnaang kwa kɔsaapnɛ wanavva ammɛ. 34Ɔzzànga ning baang lilɔɔk ’sɔng baang littuluwɔbong lafoom laffa-laffa. Wanavva wa ɔtakanɛ walam lillu ɔlɔk wanavva wa ɔtakanɛ la walam limini ɔsam kkwɔɔt ammɛ biini unnyi ka kɛnaang Uyini, ɔggyannɛ ppyɛɛ a kkwɔɔt ammɛ la kuyeeng ammɛ. Ɔzzànga wanavva wa ulenɛ walam lillu usseke ka uttinanɛ kwa iyyɛɛp a vveengodde ka ɔggyannɛ ɔttɛ ɔnaang kwa kɔsaapnɛ ulam. 35Nlɔɔk ’kwɔng ka nggyannɛ nttɛ nttelewɔyɔng. Ba nggyan nttɛ ntunuwɔyɔng ka lilɔɔk annyɔɔng. Lutini ’gwɔng, nggyan nttɛ anaangyɔng kɔlɔɔk kwa kɔyyɛɛpnɛ kule bbwak. Asamwɔyɔng kɛyɔɔng ɔkkpɛlɛ annyiyɔng ka kɛnaang Uyini tɛ̀ttɛ́ kufoom kɔlɔk kusseke. 36Ulenɛ iggyan ya wanavva la walam balenɛ litini battɛ baala ballu, waanwalam ɔsannɛ ɔttɛ ɔfafakabong avva ɔzzànga utii ka ɔsaapmɛnɛ kɛtɔk, bakkwoong mung ballu, bubbi ka ’kwɔng baang ba bule. 37Ɔzzànga ulenɛ bɔfɛɛn ɔlɔɔt wa basimɛnɛ kutut litut, ule littina kɛyɔɔng ɔttɛ wanavva baala ɔtɔk, ulenɛ likkwoong ɔkɔɔm luttina ammɛ kkpɔk, ɔnaang bbwak ka usinɛ wanavva lɛtɔk. 38Ɔlɔɔt wa ɔtɔknɛ wanavva ɔnaang doddo. Ɔzzànga ɔlɔɔt wa usinɛ wanavva lɛtɔk ɔttanɛ bbwak lɛnaang. 39Wanavva wa ullunɛ walam, gbɔɔgbɔɔgbɔɔ baala ɔssɛ ka utiinɛ ka ssala walam. Ɔzzànga walam ammɛ ubbenɛ, ukkwoong mung umii ullu walam ɔlɔk wa ɔsaapmɛnɛ. Ɔzzànga ullu ɔlɔɔt wa ukupnɛ kwa Jesus keem. 40Wanavva ’wɔng baang mkkpa kɔnaang vvenɛ uggele ulenɛ ka ɔtaanɛ tɛ̀ttɛ̀ ɛlɔm-ɛlɔm. Uwɔng mung ulenɛ luttina anaam. Ɔzzànga nttina nttɛ anaam ɔgbaa nyanga Kuyeeng-Ɔlɔɔmɔlɔɔm.

will be added

X\