1 Ulenɛ ka ɔlɔɔt ɔyanganɛ kɔwɔlɔ la wabbɛ, ɔyanga-kiyila ule ɔnaang nang umii ubee ka lusso balɔɔt ba basɛlɛnɛ kiyila, ɔkaal kɛkaal usi lɛfɔngɔ balɔɔt Ɔlɔɔmɔlɔɔm bakaal kɛkaal ’sɔng baang? 2 Ba asan attɛyɔng balɔɔt Ɔlɔɔmɔlɔɔm vvenɛ bakaal vveeng ’wɔng ɔɔ? Akkwoongnɛ akaalyɔng kɛkaal a vveeng ’wɔng ɔkkpɛlɛ, ule usseke lilɔɔk sa sɛkɛsɛkɛ asiyɔng likkwoong akaalyɔng ɔɔ? 3 Ba asan attɛyɔng vvenɛ ikaal kɛkaal a bayilabɔtɔɔm Ɔlɔɔmɔlɔɔm ɔɔ? Ikaalnɛ kɛkaal a bayilabɔtɔɔm Ɔlɔɔmɔlɔɔm, ule usseke bɛfɛɛn a vveeng ’wɔng mung isi kɛkaal abbyɛ lɛkaal ɔɔ? 4 Lilɔɔk tɛ̀ttɛ̀ assɛ baang littɔnɛ, vvenɛ asamyɔng kwɛ afeeyɔng balɔɔt ba basinɛ ka luzɔɔm lile bakaalwɔyɔng kwɛ ɔɔ? 5 Nlɔɔk ’kwɔng nttɛ nkwaaning izzit inaangwɔyɔng. Ɔlɔɔt ka bɛzzɔkɔ annyɔɔng ba ɔsɛlɛ wa ɔsannɛ kɔlɔɔk, ukkwoong ɔkaal kɛkaal Ɔyanga-kiyila la wabbɛ ɔɔ? 6 Lutini gwa ɔyanga-kiyila ɔkkwɔɔnɛ wabbɛ kɛkaal ka lusso basɛlɛ-kiyila. 7 Kɛkkwɔɔ bɛkaal bya akkwɔɔwɔnɛyɔng annyɔɔng annyɔɔng kɛyɔɔbong kɛttɛ asiyɔngbong lizzeme ka kikup a Christ ka naka-naka. Ba kɔtta lɛyyɛɛp ka ɔlɔɔt ɔnaangwɔnɛyɔng annyɔɔng bubbi ɔɔ? Ba kɔtta lɛyyɛɛp ka bayipwɔnɛyɔng bɛfɛɛn ɔɔ? 8 Annyɔɔng appyɛɛ anaangwɔyɔng annyɔɔng annyɔɔng bubbi, ayipwɔyɔng annyɔɔng annyɔɔng! 9 Kule kule asanyɔng mung attɛyɔng banaang-a-bubbi Itutum-Ɔlɔɔmɔlɔɔm baala bayɛn ɔɔ? Tɛ̀ttɛ́ afɛɛtwɔyɔng kɛyɔɔng. Balɔɔt ba banaangnɛ linaang sa bbɔlbbɔl bazɔɔm ilat, bakup bwanavva balɔɔt, basam bɛfɛɛn a balɔɔt, bazak babbɛ bwaanbwalam 10 ɔlɔk bannaa bɛfɛɛn a balɔɔt ka lakke, ɔlɔk bayip, bavva batak; gɔɔ ɔgbɛɛk a lɔgbɛɛk; ɔlɔɔt wa ɔnaangnɛ ’byɔng, Itutum-Ɔlɔɔmɔlɔɔm ka zzeen baala ɔyɛn. 11 Annyɔɔng balɔɔt balɔk adɔkɔyɔng tɛ̀ttɛ̀ abbɛ baang. Ɔzzànga attayɔngbong ka bubbi, basamwɔyɔngbong bannyi Ɔlɔɔmɔlɔɔm. Kuyeeng-Ɔlɔɔmɔlɔɔm kulokowɔyɔngbong bbwak la Ɔlɔɔmɔlɔɔm ka lakke a Jesus Christ Uyini. 12 Ɔlɔɔt ɔlɔk vvenɛ ɔttɛ, “Bayila mung battɛ nnaang bɔfɛɛn la duu.” Kule baning, ɔzzànga bɛfɛɛn ɔkkpɛlɛ lissi bɛyyɛɛpwɔnɛ. Anaam nkkwoong mung nttɛ bayilabong battɛ nnaang bɛfɛɛn ɔkkpɛlɛ. Ɔzzànga baala nfɔngɔ bɔfɛɛn bulɔk butɔknɛ ka bubili. 13 Ɔlɔɔt ɔlɔk vvenɛ ɔttɛ, “Kazzi kale kwa lɛmmɛ, lɛmmɛ lile za kazzi.” Kule baning, ɔ̀zzàngà Ɔlɔɔmɔlɔɔm vvenɛ ɔnaang bɛfɛɛn ’byɔng baang bɛffa bikpeke. Ba kɔyyɛɛp ka akɔɔmnɛ kkwɔɔt annɔ ka ɛtɔk a kɛssɛ-kɛzak. Kkwɔɔt lile sa Uyini, Uyini unnyinɛsɛ kuddu. 14 Ɔlɔɔmɔlɔɔm ufungalanɛ Uyini ka lubbe, Vvenɛ ɔssɛ ufungalyɛlɛ ayyɔɔt ning baang ka lakke ammɛ. 15 Asanyɔng lɔsan attɛyɔng kkwɔɔt annyɔɔng lilenɛ bikkeep a Christ. Nsam kikkeep a Christ nnaang kikkeep a kkwɔɔt a wa àkkpàlà ɔɔ? Ba kɔyyɛɛp. 16 Faa ba asan attɛyɔng ɔlɔɔt wa ɔsamnɛ kkwɔɔt ammɛ utoolo la sa wa àkkpàlà usseke bɔfɛɛn bwɔn la ammɛ ɔɔ? Luvva-Ɔlɔɔmɔlɔɔm lɔlɔɔk ppwool ppwool lɔttɛ, “Balɔɔt ’bɔng baang baffa basseke kkwɔɔt ssɔn.” 17 Ɔzzànga ɔlɔɔt wa ɔsammɛnɛ kɛyɔɔng utoolo la Uyini usseke bɔfɛɛn bwɔn la ammɛ ka Lakke Kuyeeng-Ɔlɔɔmɔlɔɔm. 18 Akkyaayɔng kɛssɛ-kɛzak afɔngɔyɔng. Bubbi bulɔk bwa ɔlɔɔt ɔnaang bubɛpɛ kkwɔɔt ammɛ ɔgbaa la kɛssɛ-kɛsak ba bule. Ɔzzànga ɔlɔɔt ka ɔbɛpɛnɛ lafɔɔ, ka umininɛ la wanavva, ɔnaangbong bubbi utum kkwɔɔt ammɛ biini. 19 Ba asan attɛyɔng kkwɔɔt annyɔɔng lile ggwoon a Kuyeeng-Ɔlɔɔmɔlɔɔm, Kuyeeng-Ɔlɔɔmɔlɔɔm ullunɛ ka tɔkɔlɔ annyɔɔng ɔɔ? Kɛyɔɔng wɔyɔng ba ayangayɔng. Ɔlɔɔmɔlɔɔm ɔyangawɔnɛyɔng. 20 Ɔlɛɛpwɔyɔngbong ukkpele kappya. Ɔzzànga akɔɔmyɔng kkwɔɔt annyɔɔng ka latele Ɔlɔɔmɔlɔɔm.
