1 CORINTHIANS 5

1Nppyeebong ka battɛnɛ asseke ka akupnɛyɔng bwanavva gbɔɔgbɔɔgbɔɔ. Gɔɔ balɔɔt ba basɛlɛnɛ kiyila kɛssanga kɔlɔɔk tɛ̀ttɛ̀ assɛ baang ba banaang. Nppyeebong ka babwɔɔlɔnɛnɛ battɛ ɔlɔɔt ɔtɔkbong wanavva abassɛ ammɛ. 2Ngkka mung ɔkkyaawɔyɔng ’bɔng? Kɔyyɛɛp ka ataanɛyɔng bukee bunaangwɔyɔng. Aggbayɔng ɔlɔɔt wa ɔnaangnɛ kɛssanga kɔlɔɔk ’sɔng baang ka kɛkaan annyɔɔng. 3- 4Mkkpa nle fulufulu nssekewɔyɔng ka ɛkkpakkwɔɔt, luppyam anaam lule baang la annyɔɔng. Nnyibong ɔlɔɔt wa ɔnaangnɛ kɛssanga kɔlɔɔk ’sɔng baang kibbi eseese ka lakke Uyini ayyɔɔt, Jesus, tɛ̀ttɛ̀ bulenɛ baang la annyɔɔng. Aggbanɛyɔng ɛfɛɛn kkwɔn, anaam nle baang la annyɔɔng ka lakke Uyini ayyɔɔt, Jesus, za lalenɛ mung la ayyɔɔt. 5Asamyɔng ɔlɔɔt ’wɔng baang annyiyɔng Satan umii ɔbɛpɛ kkwɔɔt ammɛ nkwaaning ɔkkala lɛfɛkɛlɛ ammɛ ka Kɛtɔm-Uyini. 6Ba kɔyyɛɛp ka anaangnɛyɔng bizzeen. Asanyɔng lɔsan ifɛɛt ya battɛnɛ, “Bwaan izuku a yeast ssup ning bɛnaangnɛ ugɔngɔ a brɛɛd ɔkkpɛlɛ ammɛ utum.” 7Vvenɛ asangayɔng ɔtɔm a yeast a bubbi ’bwɔng mung ɔkkɔɔnɛ ayyɛɛp affatayɔng. Assekeyɔng ufaa ugɔngɔ a brɛɛd wa ɔsɛlɛnɛ yeast. Nsan lɔsan nttɛ aleyɔng ning baang ka lɔkkwɔɔn. Ɛkɛtɛ Kazzi-Kɛsak-Kɛkɔngɔ ayyɔɔt ɛbbalbong lɛffɔ ka balenɛ Christ wa ulenɛ Waan-ɛtɔɔn a Kazzi-Kɛsak-Kɛkɔngɔ lɛsam bawwɔɔl. 8Ka kulenɛ ning lile, izziyɔng kazzi ayyɔɔt la brɛɛd wa ɔsɛlɛnɛ yeast wa ulenɛ brɛɛd a bɔllɛ-luppyam la lɔkkwɔɔn a kɔlɔɔk. Ifɔngɔyɔng brɛɛd wa ɔyanganɛ ɔtɔm a yeast a bubbi la ibbyap lizzi. 9Ka lɛmmwɔɔl za nkkpɔknɛ, nbwɔɔlɔwɔyɔng nttɛ tɛ̀ttɛ́ assɛyɔng la balɔɔt ba bakupnɛ bwanavva balɔɔt. 10Mung ba nlɔɔk ntum basɛlɛ kiyila ba balenɛ balɔɔt ba bbɔlbbɔl ɔlɔk ba bawɔnɔnɛ, ɔlɔk la bassip, gɔɔ la bazɔɔm ilat tɛ. Asinɛ la balɔɔt ’bɔng mung lɛssɛ ɔllɛwɔ ka asinɛ wa ɛkpansi lɛbɛlɛ lile. 11Bwa nlɔɔknɛ mung nlɔɔk nttɛ tɛ̀ttɛ́ assɛyɔng la ɔlɔɔt wa ɔbbwanɛ ɔttɛ ammɛ ɔkpana annɔ ka Christ ɔppyɛɛ ule ukup a bwanavva gbɔɔgbɔɔgbɔɔ, ɔlɔk ule ɔwɔnɔwɔnɔ, ɔlɔk ɔzɔɔm-ilat ɔlɔk ɔbbɔl a bɛlɔɔk la balɔɔt, ɔlɔk ɔvva-batak, ɔlɔk uyip ssip. Tɛ̀ttɛ́ ataa ɔtaa gbɔɔ azziyɔng kazzi la kɛssanga ɔlɔɔt ’sɔng baang. 12Uvve kaang ’wɔng baang kɛnaang anaam lissi wa nle nkaal kɛkaal a balɔɔt ba basinɛ ka kɛkaan ayyɔɔt lile. Ɔlɔɔmɔlɔɔm ule ɔkaal kɛkaal abbɛ. Ɔzzànga mung annyɔɔng kɛkaal a bannyɔɔng a kɔssɛ baala akaalyɔng ɔɔ? 13Luvva-Ɔlɔɔmɔlɔɔm lɔttɛ, “Aggbayɔng ɔnaang-a-bubbi ka kɛkaan annyɔɔng.”

will be added

X\