1 CORINTHIANS 4

1Atɔkyɔngyɛlɛ tɛ̀ttɛ̀ ibɔɔyi ya Christ. Ulenɛ lilɔɔk a lalup Ɔlɔɔmɔlɔɔm sa lɔkkwɔɔn lɛsam ɔssɛɛnyɛlɛ ka labɔɔk. 2Bɔfɛɛn bwa ɔlɔɔt ɔggyannɛ ka ibɔɔk a bɔɔyi ammɛ ulenɛ kitele lɛmmwɔɔl ammɛ, ɔnaang bɛfɛɛn ɔkkpɛlɛ bya ɔttɛnɛ ɔnaang. 3Ba nffik nttɛ tɛ̀ttɛ́ ɔlɔɔt unnyinɛ kibbi, gɔɔ ka ɛtɔk duu. Anaam kibbi kɛyɔɔng nɛ ba nnyi. 4Luttina anaam lule ppwool. Ɔzzànga ’kwɔng ba kukkwoong kɔyɔɔ kɔttɛ bubbi ba ntaka nnaang. Uyini ulenɛ ɔlɔɔt wa ɔkaalnɛ kɛkaal anaam. 5Tɛ̀ttɛ́ annyi ɔlɔɔt ɔlɔk kibbi bong tɛ́ttɛ́ ɛkɛtɛ kɛkaal ammɛ ɛffɔ. Uyini uffubong tɛ́ttɛ́ kɛkaal sa lakpeke lɛffɔ. Uffunɛ, vvenɛ ɔsanga lilɔɔk sa balɔɔt balɔɔknɛ ka lalup ɔtta ka vveeng. Vvenɛ ɔsanga kwa ɔlɔɔt ulupnɛ ka luppyam ɔtta ka vveeng. Ɛkɛtɛ ’yɔng baang vvenɛ Ɔlɔɔmɔlɔɔm ubungu ɔlɔɔt ɔlɔɔt tɛ̀ttɛ̀ ɔnaangnɛ ɔffɔ. 6Ikpana anaam, ka lɛttɔ annyɔɔng, nkɔɔmbongyɛlɛ ayyɔɔt la Apollos nyɔɔwɔyɔng ɛtɔk ya ale akupyɔng ɔlɔk akkoopyɔng bwa bassanɛ ifɛɛt battɛ, “Atele Lafɔɔ za doddo.” Tɛ̀ttɛ́ ɔlɔɔt vvɔn ɔsaapwɔ usseke wa vvɔn. 7Nyinɛ ɔnaangwɔnɛyɔng ɔyɛnwɔyɔng kɛyɔɔng attayɔng balɔɔt balɔk? Ɔlɔɔmɔlɔɔm lissi unnyiwɔnɛyɔng bɛfɛɛn ɔkkpɛlɛ bya ayanganɛyɔng ɔɔ? Ammɛ lissi unnyiwɔnɛyɔng ɔɔ? Mbɔng tɛ́ttɛ́ ɔkkyaawɔyɔng tɛ̀ttɛ̀ bɛfɛɛn ’byɔng baang bisinɛ ka Ɔlɔɔmɔlɔɔm lissi? 8Gedegede mung ayangayɔngbong bɛfɛɛn ɔkkpɛlɛ bya aggyannɛyɔng ɔɔ? Atiiyɔng babeet, mkkpa ayyɔɔt isi babeet lile ɔɔ? Kɔyyɛɛp-ɔyyɛɛp. Nggele gaang gaang bulenɛyɔng babeet ka lɔkkwɔɔn nkwaaning ayyɔɔt issɛ ile babeet la annyɔɔng. 9Kɔtaanɛ tɛ̀ttɛ̀ Ɔlɔɔmɔlɔɔm ulenɛyɛlɛ ayyɔɔt, bayilabɔtɔɔm a Jesus, usseke isimi kɛtaa linnyi tɛ̀ttɛ̀ balɔɔt ba bazzanɛ kɛkaal abbɛ battɛ babbe bayɔɔ bayilabɔtɔɔm-Ɔlɔɔmɔlɔm la ɔssɛbibit. 10Bakkwɔɔbongyɛlɛ bazingizingi ka lɛttɔ a Christ. Ɔzzànga annyɔɔng asannɛyɔng kɔlɔɔk ka akupnɛyɔng Christ. Ayyɔɔt ba ikkaam ɔzzànga annyɔɔng akkaamyɔng lɔkkaam. Ayyɔɔt balɔɔt yɛlɛ ba batele; ɔzzànga annyɔɔng batelewɔyɔng lutele. 11Ka lɛmmwɔɔl a kamma mung ile ka buwɔɔng a bannyi la buwɔɔng a kazzi. Iwɔkɔlɔ babbu bɛssaka ibba. Lɔkkpat batupyɛlɛ ayyɔɔt. Issɛ gbɔɔgbɔɔgbɔɔ ikpikpiti. 12Inaang kɛnaang imɛɛm issuma tɛ́ttɛ́ iyɛn bwa izzinɛ. Ɛkɛtɛ ya babbaatnɛyɛlɛ elenɛ ɛkɛtɛ ya inaangnɛbɛ ppyɛɛ. Bayɔɔnɛyɛlɛ akama, ning baang ulenɛ ka ikamanɛ lɔkama ibbɔmɛ. 13Babbaatnɛyɛlɛ, ippyɛlɛbɛ kamma la lammwɔɔl za doddo. Ippyɛlɛ ile tɛ̀ttɛ̀ bɛfɛɛn bya kɛsam kɛzzɔɔk. Isseke ititiban ka ɛkpansi ka lɛmmwɔɔl a kamma mung. 14Nkkpɔk ’kwɔng gbɔɔ nnyiwɔyɔng ka alenɛyɔng bwaan a luppyam anaam. Nsi lɛggyan nttɛ izzit inaangwɔyɔng. 15Mkkpa ayangayɔng balɔɔt baffɔwɔyɔng innɔ innɔ ba bakopolowɔnɛyɔng kɔlɔɔk ka lɛfal annyɔɔng ka Christ, ssaawɔ ulewɔyɔng vvɔn keem. Ka lɛfal annyɔɔng ka Christ anaam nsseke dedde annyɔɔng ka nkɔɔmnɛ Kuttu kwa Doddo nfeewɔyɔng. 16Nkkpengewɔyɔng nttɛ akupyɔng eleme anaam. 17Akkwɛ kɔnaangnɛ nle ka ntɔɔmnɛ Timothy nfeewɔyɔng. Ammɛ, ulenɛ waan a luppyam anaam ka kkwɔɔt Uyini. Vvenɛ ukkewɔyɔng itɔk a lilɔɔk ya bbwak ya nkupnɛ ka ufaa lɛfal wa nkupnɛ Jesus Christ, la kwa nkopolonɛ ka idda izɔɔm ɔkkpɛlɛ. 18Balɔɔt balɔk ɔkkyaawɔyɔngbong ɔsak. Ba abɛlɛ littina attɛyɔng ntii ka nffunɛ nkoolowɔyɔng. 19Kɔsaapnɛ Uyini, nle nkka liffu ka annyɔɔng. Anaam biini vvenɛ nyɛn bwa balɔɔt ’bɔng baang ba ɔkkyaanɛbɛ banaangnɛ. Bwa bakkwoongnɛ balɔɔk ka kamma keem lissi. 20Itutum-Ɔlɔɔmɔlɔɔm ka kɛlɔɔk a lɛmmwɔɔl keem ba ile, ile ka lakke ɔgbaa. 21Mung ɔllɛwɔyɔng ’bɔng? Ɔllɛ ka nffunɛ la bipyoko faa la luppyam gwa bɛtɛbɛtɛ?

will be added

X\