1 CORINTHIANS 3

1Ka lɔkkwɔɔn, ikpana anaam, ba nkwoong nlɔɔk la annyɔɔng tɛ̀ttɛ̀ nlɔɔknɛ la balɔɔt ba bayanganɛ Kuyeeng-Ɔlɔɔmɔlɔɔm. Nle nlɔɔk la annyɔɔng tɛ̀ttɛ̀ balɔɔt ɛkpansi, ɔgbaa tɛ̀ttɛ̀ bwɔɔntiti ba bassumanɛ lɛfal liffu ka kɛkaan a balɔɔt a Christ. 2Ndɔkɔ nnyiwɔyɔng libee, kilaam lissi ka asinɛyɔng lɛbama akatyɔngsɛ. Gɔɔ gedegede mung ba ataka abamayɔng, 3ka atiinɛ ka anaangnɛyɔng linaang a balɔɔt ɛkpansi. Ayangayɔng luleep la bannyɔɔng, awɔlɔyɔng, ning baang ba asan attɛ atiiyɔng balɔɔt ɛkpansi ba bakupnɛ eleme ɛkpansi ɔɔ? 4Ɔlɔɔt ɔlɔk ɔlɔɔknɛ ɔttɛ, “Anaam nbee la Paul.” Ɔlɔk ɔlɔɔk ɔttɛ, “Anaam nbee la Apollos.” Baang tɛ̀ttɛ̀ balɔɔt ɛkpansi lissi ka anaangnɛyɔng ɔɔ? 5Kkpɔɔ nyinɛ ulenɛ Apollos? Kkpɔɔ nyinɛ ulenɛ Paul? Ɔkkpɛlɛ ayyɔɔt-a-baffa ibɔɔyi Ɔlɔɔmɔlɔɔm ba ilewɔnɛyɔng lɛnaang ayangayɔng kiyila. Ɔkkpɛlɛ ayyɔɔt, ɔlɔɔt ɔlɔɔt ɔnaang kɛnaang sa Uyini unnyimɛnɛ. 6Anaam nkɔɔnnɛ ɛfɔɔk a bɛfɛɛn, Apollos ɔllɔtyɛ bannyi ɔttɛ ɛmmala. Ɔzzànga Ɔlɔɔmɔlɔɔm ɔnaangnɛ tɛ́ttɛ́ kɛssɛ ’sɔng baang kiddu. 7Ɔkɔɔnɔkɔɔn la ɔllɔt-a-bannyi ka bulɔk ba bale. Ɔlɔɔmɔlɔɔm ulenɛyɛlɛ ka kukkam kwa lɛbaang ka ɔnaangnɛ bɛssɛ biddu. 8Ɔkɔɔnɔkɔɔn la ɔllɔt-a-bannyi buubuu ba bale. Ɔlɔɔmɔlɔɔm ule unnyi ɔlɔɔt ɔkkpɛlɛ lɛsɔɔk ɔssanga ka kɛnaang sa ɔnaangnɛ. 9Ayyɔɔt itaa tɛ̀ttɛ̀ balɔɔt ba inaangnɛ kɛnaang ɛfɛɛn kkwɔn innyi Ɔlɔɔmɔlɔɔm. Annyɔɔng alenɛyɔng bɔtɔɔm ammɛ. Annyɔɔng ɔgbaa assɛnɛ aleyɔng ggwoon Ɔlɔɔmɔlɔɔm. 10Nkɔɔm lakke za Ɔlɔɔmɔlɔɔm unnyinɛnɛ ntte lutte tɛ̀ttɛ̀ ɔlɔɔt wa ɔbɛtɛnɛ ka kɛbɔɔk a ssoon. Mung ɔlɔɔt ɔlɔk ule baang ka ɔbɔɔknɛ ka lutte ’gwɔng baang. Ɔzzànga ɔlɔɔt ɔkkpɛlɛ ɔsan tɛ̀ttɛ̀ ɔbɔɔknɛ. 11Ɔlɔɔmɔlɔɔm ɔsambong Jesus uloko ka lutte. Ɔlɔɔt wa ule ɔbbal lutte lɔlɔk litte ba ɔbɛlɛ lile. 12Balɔɔt balɔk bale bakɔɔm silver ɔlɔk gold ɔlɔk ifɔɔk ikpana batte lutte. Balɔk bakɔɔm bɛssɛ ɔlɔk lifɔɔk. 13Bubbi la bɔllɛ kɛnaang ɔlɔɔt la duu vvenɛ butta ka vveeng ka ɛkɛtɛ Jesus ule uffu. Lɔkɔɔn a kɛtɔm ’sɔng baang vvenɛ lɔssanga innyɔ balɔɔt ɔkkpɛlɛ. Vvenɛ lɔllɛ linaang abbɛ lɔyɛn tɛ̀ttɛ̀ liyyɛɛpnɛ liffɔ. 14Ulenɛ ka linaang ɔlɔɔt lisinɛ lɔkɔɔn lippyee, ɔlɔɔt ’wɔng baang vvenɛ ɔyanga lɛsɔɔk. 15Ɔzzànga ɔppyɛɛnɛ ule bɔfɛɛn a linaang ɔlɔɔt likkɔmnɛ lɔkɔɔn, vvenɛ ɔsɛlɛsɛ. Ɔlɔɔmɔlɔɔm vvenɛ ɔkkala ɔlɔɔt ’wɔng baang ɔfɔngɔ, ɔzzànga ule ule tɛ̀ttɛ̀ ɔttanɛ ka lalaak a lɔkɔɔn. 16Asan lɔsan attɛ annɔ alenɛ Ggwoon-Ɔlɔɔmɔlɔɔm. Kuyeeng-Ɔlɔɔmɔlɔɔm kule baang la annɔ ka kɔtaanɛ. 17Ɔlɔɔt wa ɔbɛpɛnɛ Ggwoon-Ɔlɔɔmɔlɔɔm, Ɔlɔɔmɔlɔɔm vvenɛ ɔbɛpɛmɛ. Ggwoon-Ɔlɔɔmɔlɔɔm lule gwa doddo, annyɔɔng biini alenɛyɔng ggwoon ammɛ. 18Ɔlɔɔt ɔlɔk tɛ̀ttɛ́ ɔdɛmmɛ kɛyɔɔng ugbigbini. Ɔlɔɔt ɔlɔk ka bɛzzɔkɔ annyɔɔng uttinamɛnɛ kɛyɔɔng ɔttɛ ɔsan kɔlɔɔk a vveeng ’wɔng, kkwɔɔmɛyɔng ukun ɔkkɔɔnɛ ɔsan kɔlɔɔk. 19Bɔfɛɛn bwa ɛkpansi ’yɔng ettinanɛ ɛttɛ baang kɛsan a kɔlɔɔk, bule bwa ggbɔɔ ka lusso Ɔlɔɔmɔlɔɔm. Tɛ̀ttɛ̀ luvva-Ɔlɔɔmɔlɔɔm lɔlɔɔknɛ lɔttɛ, “Ɔlɔɔmɔlɔɔm ule ɔkaa balɔɔt ba battinanɛ battɛ abbɛ basan a kɔlɔɔk ka lagban abbɛ.” 20Lɔbbal lɛlɔɔk lɔttɛ, “Ɔlɔɔmɔlɔɔm ɔsan lɔsan ɔttɛ ittina basan-a-kɔlɔɔk ile ya ggbɔɔ, ka bulɔk ba iffɔ.” 21Ɔlɔɔt tɛ̀ttɛ́ ɔnaang kamma utum bɔfɛɛn bwa ɔssɛbibit ukkwoongnɛ ɔnaang. Uvve bɛfɛɛn ɔkkpɛlɛ bile bya annyɔɔng. 22Paul, Apollos la Peter, vveengodde, kuddu la lubbe, kɔlɔɔk kwa gedegede mung la kwa lusso, ɔkkpɛlɛ abbyɛ bile bya annyɔɔng. 23Annyɔɔng ba Christ, Christ wa Ɔlɔɔmɔlɔɔm.

will be added

X\