1 Ikpana anaam, ka nffunɛ ka ɛfɛɛn annyɔɔng nkopolowɔyɔng lɛmmwɔɔl Ɔlɔɔmɔlɔɔm za lɔkkwɔɔn za lalup, baggboggbo lammwɔɔl la kukele nsi lɛkɔɔm. 2 Nnaangnɛ luttina gwa kisumala bɛfɛɛn ɔkkpɛlɛ ka ɛkɛtɛ ya nlenɛ la annyɔɔng, usseke Jesus Christ kɛyɔɔng ka nsinɛ lisumala, gaang gaang lubbe gwa ubbenɛ ka Cross. 3 Ka nffunɛ ka ɛfɛɛn annyɔɔng, la lakke nsi liffu. Ndɔkɔ ukeewaan, nffula ɔkkpɛlɛ a kkwɔɔt la bbwɔp. 4 Ɔgbaa nsi kukele ɔssɛbibit lɛkɔɔm ka lukopolo anaam la bɔtɔɔm bwa Ɔlɔɔmɔlɔɔm ɔtɔɔmnɛnɛ. Ɔzzànga kɔdɔkɔ ka iyɔɔ lakke Kuyeeng-Ɔlɔɔmɔlɔɔm za ladɛmnɛbɛ bayila. 5 Kiyila annyɔɔng ba kɛtaa la annyɔɔng kwa kɛsan a kɔlɔɔk ɔssɛbibit; kɛtaa ka lakke Ɔlɔɔmɔlɔɔm. 6 Ɔzzànga nlɔɔk mung kɔlɔɔk a bisana la balɔɔt ba balenɛ lɛkkpɛɛm ka kɛsan a lɛmmwɔɔl Ɔlɔɔmɔlɔɔm. Ɔzzànga kɛsan a kɔlɔɔk sa kissinɛ ka vveeng mung lissi, ɔlɔk ka lakke za lakɔɔmnɛ vveeng ’wɔng lissi; ɔlɔk ka lakke za lalenɛ ka kɛtaka lakke azzɛ biini. 7 Bisana pya nlɔɔknɛ mung nlɔɔk kɔlɔɔk a bisana lalup Ɔlɔɔmɔlɔɔm pya ulupnɛ usseke balɔɔt. Appyɛ bilenɛ bisana bya Ɔlɔɔmɔlɔɔm ulenɛ ɛtɔk lɛkɔɔm ɔsanga ka kibbe lɛttɔ ayyɔɔt, bong tɛ́ttɛ́ ɔnaang ɛkpansi. 8 Ɔssɛbibit vvɔn gbɔɔ wa ɔsannɛ bisana ’pyɔng mung usi lile. Balenɛ ka basannɛpyɛ, nzang basi Uyini-lakke ɔkkpɛlɛ lɛkama ka Cross. 9 Mkkpa kɔnaang, kule tɛ̀ttɛ̀ luvva-Ɔlɔɔmɔlɔɔm lulenɛ lɛttɛ, “Kwa ɔlɔɔt ɔtakanɛ lɛyɛn, ɔlɔk ɔtaka lippyee, ɔlɔk uttina utum, kukkwoong mung kɔnaang. Kɛssanga kɔlɔɔk ’kwɔng baang kulenɛ bɔfɛɛn bwa Ɔlɔɔmɔlɔɔm ɔnaangnɛ uloko balɔɔt ba batelemɛnɛ.” 10 Ɔzzànga kɔdɔkɔ kule kwa ayyɔɔt ka lakke Kuyeeng-Ɔlɔɔmɔlɔɔm lanaangnɛyɛlɛ isan kɔlɔɔk a lalup ammɛ. Kuyeeng-Ɔlɔɔmɔlɔɔm kuggbung kɔggyan bɛfɛɛn ɔkkpɛlɛ, ɔgbaa la kɔlɔɔk a lalup Ɔlɔɔmɔlɔɔm kwa ddɔng. 11 Ɔzzànga kulenɛ kwa ɔlɔɔt, kuyeeng ammɛ biini kɔsannɛ kɔlɔɔk kwa kutummɛnɛ ammɛ ɔkkpɛlɛ. Kule kɛssanga ssɔn, Kuyeeng-Ɔlɔɔmɔlɔɔm keem kɔsannɛ kɔlɔɔk Ɔlɔɔmɔlɔɔm ɔkkpɛlɛ. 12 Ayyɔɔt eleme a vveengodde ’wɔng ba itaka itɔk. Ule Kuyeeng kwa Ɔlɔɔmɔlɔɔm ɔtɔɔmnɛ ufeeyɛlɛ keem ka itɔknɛ, nkwaaning isan bɛfɛɛn ɔkkpɛlɛ bya Ɔlɔɔmɔlɔɔm ulenɛyɛlɛ linnyi. 13 Ɔzzànga ba ilɔɔk ka lammwɔɔl za bisana ɔssɛbibit bakopolonɛ, ilɔɔk ka lammwɔɔl za Kuyeeng-Ɔlɔɔmɔlɔɔm kukopolonɛ ka ibwɔɔlɔnɛ balɔɔt ba bayanganɛ Kuyeeng-Ɔlɔɔmɔlɔɔm, lɔkkwɔɔn a kɔlɔɔk a Kuyeeng-Ɔlɔɔmɔlɔɔm. 14 Ɔzzànga ɔlɔɔt wa usinɛ Kuyeeng-Ɔlɔɔmɔlɔɔm lɛyanga, ba ukkwoong ɔtɔk lɛsɔɔk za lissinɛ ka Kuyeeng-Ɔlɔɔmɔlɔɔm liffu ka usinɛzɛ lɛsan; ule bɔfɛɛn bwa gbɔɔ ka ammɛ. Akɔɔm Kuyeeng-Ɔlɔɔmɔlɔɔm keem akkwoong abwɔɔlɔ linaang abbɛ. 15 Ɔlɔɔt wa ɔyanganɛ Kuyeeng-Ɔlɔɔmɔlɔɔm ukkwoong mung ɔkaal kɛkaal a bɛfɛɛn ɔkkpɛlɛ, ɔzzànga ɔlɔɔt wa ule ukkwoong ɔkaalmɛ ammɛ ba ule. 16 Kule tɛ̀ttɛ̀ luvva-Ɔlɔɔmɔlɔɔm lulenɛ lɛlɔɔk lɔttɛ, “Nyinɔɔng ɔsannɛ luppyam Uyini? Nyinɔɔng ule ukkwoong ɔbbamɛ bikɔɔm?” Mkkpa kɔnaang ayyɔɔt iyanga luppyam a Christ.
