1 CORINTHIANS 16

1Kwa akkpɔknɛ atumyɔng kissi ikkpoko ya kɛyaam a balɔɔt Ɔlɔɔmɔlɔɔm ka Judea, anaangyɔng kwa nbwɔɔlɔnɛ balɔɔt a izɔɔm ka Galatia nttɛ banaang. 2Kɛtɔm-a-luzɔɔm la ssɔn, ɔlɔɔt ɔlɔɔt unnyi ikkpoko tɛ̀ttɛ̀ ɔyanganɛ nkwaaning kussi kɔlɔk kusi lile ka ɛkɛtɛ ya nle nffu. 3Nlenɛ liffu vvenɛ ntɔɔm balɔɔt ba asanganɛyɔng la ileta ibwɔɔlɔ, basam lasɔɔk annyɔɔng bamii Jerusalem. 4Kɔyyɛɛpnɛ ka anaam nssɛnɛ nmii, vvenɛ ikkuma la abbɛ imii. 5Vvenɛ nsak ka Macedonia nffu ka ɛfɛɛn annyɔɔng. 6Usinɛ lɛkkyam vvenɛ ntaa ka waan ɛkɛtɛ la annyɔɔng, ɔlɔk ntaa la annyɔɔng lukook lɔsaal. Ɔlɔk attelenɛyɔng ka kɔssɛ anaam, ɛfɛɛn duu ya nle nbbal limii. 7Ba nggyan nttɛ nyɛnwɔyɔng la lazzuma. Nttina kɛtaa la annyɔɔng mmɛmmɛ ulenɛ ka Uyini ule ɔfɔngɔnɛ. 8Ɔzzànga vvenɛ ntaa mung ka Ephesus tɔttɔt ɔffɔ kɛtɔm-a-Pentecost. 9Kufuk a kɛnaang a kɛnaang sa bbwak sa doddo kule baang, mkkpa kusi balɔɔt balɔk lɛsaap. 10Timothy uffunɛ ɛfɛɛn annyɔɔng, atɔkmɛyɔng ka latele tɛ̀ttɛ́ ɔbbwɔpɔmɛ, ɔnaangnɛ kɛnaang Uyini tɛ̀ttɛ̀ anaam nnaangnɛ. 11Ɔlɔɔt ɔlɔk tɛ̀ttɛ́ ɔkkpɛnmɛ. Attelemɛyɔng ka kɔssɛ ammɛ ka bɔkaat nkwaaning ɔppyɛlɛ uffu ka ɛfɛɛn anaam; ka nlenɛ baang ka nkatnɛ kɛppyɛlɛ ammɛ la ikpana ammɛ. 12Kwa Apollos, ɔkpana ayyɔɔt: nle baang nlɔɔknɛ nttɛ ukoolowɔyɔng la ikpana ayyɔɔt ilɔk, ɔzzànga ba ɔtaka uyila gedegede mung ɔttɛ vvenɛ umii. Ɛkɛtɛ ya ɔyanganɛ kufuk mkkpa kɔnaang vvenɛ umii. 13Akatyɔng, abeeyɔng kkpɔk ka kiyila annyɔɔng. Akwulayɔng, akkaamyɔng. 14Anaangyɔng kɛnaang annyɔɔng ɔkkpɛlɛ ka kɛsaap. 15Asanyɔng mung kwa Stephanas la itutum ammɛ ɔɔ? Abbɛ balenɛ bakɔɔm-ɛtɔk a balɔɔt a luzɔɔm ka Greece. Basambongbɛ kɛyɔɔng bannyi ka kɛnaang Ɔlɔɔmɔlɔɔm. Ikpana anaam, nkkpengewɔyɔng lukkpenge, 16nttɛ akupyɔng linaang a kizzilɛttɔ tɛ̀ttɛ̀ sa balɔɔt ’bɔng mung, la ɔlɔɔt ɔlɔk duu wa ɔnaangnɛ kɛnaang la abbɛ ɔlɔk ɔtaa la abbɛ. 17Nggelebong ka kiffu sa Stephanas la Fortunatus, la Achaicus baffunɛ. Baffubong batɔk kɛtaa annɔ ka asinɛ lile. 18Banaangnɛbong nggele tɛ̀ttɛ̀ banaangwɔnɛ annɔ. Kɛssanga balɔɔt tɛ̀ttɛ̀ ’sɔng bale ba kɛssɛɛn ka luppyam. 19Izɔɔm ya ilenɛ ka ɛkpansi a Asia battɛ nwomowɔyɔng: Aquila la Priscilla la balɔɔt a luzɔɔm ba bataanɛ ka ssala abbɛ batɔɔmnɛ luwomo tɛ̀ttɛ̀ balɔɔt a luzɔɔm battɛ nwomowɔyɔng. 20Ikpana ayyɔɔt ya ilenɛ mung ɔkkpɛlɛ itɔɔm luwomo ifeewɔyɔng. Awomoyɔng ɔlɔɔt la vvɔn la kigbugba tɛ̀ttɛ̀ ɔkpana annyɔɔng. 21Anaam Paul nkɔɔmnɛ kɔbɔɔk anaam nkkpɔk ’kwɔng: “Nwomowɔyɔngbong ɔkkpɛlɛ.” 22Ɔlɔɔt duu wa usinɛ Uyini litele nzɔɔm ɔkaamɛ ammɛ! Marana tha— ning baang ulenɛ Uyini, affu. 23Lakke Uyini ayyɔɔt, Jesus Christ, lataa annyɔɔng. 24Kɛsaap anaam kɛtaa la annyɔɔng ɔkkpɛlɛ ka Christ Jesus.

will be added

X\