1 Ikpana anaam, nggyan nttɛ nkkewɔyɔng kɔlɔɔk a Kuttu-Budoddo Ɔlɔɔmɔlɔɔm kwa nkopolowɔnɛyɔng, kwa atɔknɛyɔng kiyila annyɔɔng kɛkkaam. 2 Uwɔng baang ule lɛmmwɔɔl Ɔlɔɔmɔlɔɔm la bɔtɔɔm bwa nkopolowɔnɛyɔng. Lɛmmwɔɔl Ɔlɔɔmɔlɔɔm lile lɛkkalawɔyɔng, akɔɔmnɛyɔngzɛ kkpɔk. Asinɛyɔngzɛ kkpɔk lɛkɔɔm, nzang kiyila asiyɔngbong lɛyanga. 3 Anaam nnyiwɔyɔng bwa ntɔknɛ ka Ɔlɔɔmɔlɔɔm. Abbwɛ bulenɛ bwa buttanɛ lɛyyɛɛp. Bule buttɛ: Christ ubbe ka bubbi ayyɔɔt, tɛ̀ttɛ̀ bakkpɔknɛ ka Luvva-Ɔlɔɔmɔlɔɔm. 4 Ballimɛ. Bɛtɔm bɛffa ka bɛkkyaat, Ɔlɔɔmɔlɔɔm ufungalamɛ ka lubbe ɔtaa ka kuddu tɛ̀ttɛ̀ Luvva-Ɔlɔɔmɔlɔɔm lɔlɔɔknɛ. 5 Ufungalanɛ, ɔyɔɔmɛ kɛyɔɔng ka ɛfɛɛn a Peter. Ɔttɛ ɔnaang, ɔbbalmɛ kɛyɔɔng lɛyɔɔ ka ɛfɛɛn a bayilabɔtɔɔm ammɛ ba zzɔɔppabaffa. 6 Ɔttɛ ɔbbal lɛnaang, ɔbbalmɛ kɛyɔɔng lɛyɔɔ ka ɛfɛɛn a kibbi balɔɔt ammɛ sa kɛsaknɛ nnɔ la lalɔp kubbwɔɔk ka balenɛ balɔɔt a kɔssɛ ammɛ. Balɔk babbebong ɔzzànga balɔk badɔkɔ batii ikokolo. 7 Utuma ka ɛfɛɛn a James, ɔbbal lituma ka ɛfɛɛn a bayilabɔtɔɔm ammɛ ɔkkpɛlɛ. 8 Ka lakuma, utuma ka ɛfɛɛn anaam, mkkpandɔk nle ɔlɔɔt wa basimɛnɛ ka bbwak lɛmaat. 9 Anaam nttanɛ lɛbbɔl ntta bayilabɔtɔɔm a Jesus ɔkkpɛlɛ. Ba nkkɔnɔ kɛkkwɔɔnɛ uyilabɔtɔɔm a Jesus ka nyɔɔnɛ luzɔɔm akama gaang gaang. 10 Latele za unnyinɛnɛ lanaangnɛ nle wa nlenɛ gedegede mung. Nnaangbong kɛnaang gaang gaang ntta bayilabɔtɔɔm ammɛ ɔkkpɛlɛ. Ka lakke anaam biini lissi ka nnaangnɛ, nnaang ka lakke Ɔlɔɔmɔlɔɔm wa ɔnaangnɛnɛ ppyɛɛ. 11 Ɔzzànga mkkpa kussi ka anaam kuffu ɔlɔk ka abbɛ, nkwɔng kulenɛ kwa ɔkkpɛlɛ ayyɔɔt ikopolonɛ, annyɔɔng ayilayɔng. 12 Gedegede mung ka bɔtɔɔm bwa ɔtɔɔmnɛyɛlɛ bulenɛ buttɛ Christ ufungalabong ka lubbe, ’bɔng tɛ́ttƐ́ annyɔɔng balɔɔt balɔk attɛyɔng babbu baala bafungala ka lubbe bataa ka kuddu? 13 Kwa alɔɔknɛyɔng baang kulenɛ ka lɔkkwɔɔn, ɔzzànga ɔ̀ttɛ́ Christ usi lifungala ka lubbe. 14 Ɔlɔɔmɔlɔɔm butakanɛ Christ lifungala ka lubbe, nzang bulɔk ba iyanga bwa ikopolonɛ. Gɔɔ annyɔɔng bulɔk ba bule bwa ale ayilayɔng. 15 Gɔɔ nzang bayɔɔbongyɛlɛ battɛ ikkala lɛlaak itum Ɔlɔɔmɔlɔɔm, ka ilɔɔknɛ ittɛ ufungalabong Christ ka lubbe; nzang kule ka lɔkkwɔɔn babbu ka lubbe baala bafungala bataa ka kuddu. 16 Babbu batakanɛ lifungala, nzang Christ ba ɔtaka ufungala. 17 Christ ɔtakanɛ lifungala nzang kiyila annyɔɔng kile bɔfɛɛn bwa gbɔɔ. Atiiyɔng ka bubbi. 18 Ɔgbaa nzang balɔɔt ba bayilanɛ kwa Christ bale libbe, bataakbong. 19 Ulenɛ ka kiyila ayyɔɔt ka Christ kɛyyɛɛpnɛ ka lɛfal ’zɔng keem ka ɛkpansi, kɔlɔk kusi lɛbɛlɛ lile, nzang nzɔɔn ɔtta wa ayyɔɔt lile ɔtta wa balɔɔt ɔkkpɛlɛ ka vveeng ’wɔng. 20 Ka lɔkkwɔɔn Christ ufungalabong ka lubbe. Ning baang ulenɛ kɛttɛ balɔɔt ba babbenɛ vvenɛ bafungala ka lubbe ɔgbaa. 21 Lubbe ka lussinɛ ka ɔlɔɔt vvɔn luffu ka ɛkpansi, kifungala ka lubbe kɛssɛ kissi ning baang ka ɔlɔɔt vvɔn kiffu ka ɛkpansi. 22 Balɔɔt ɔkkpɛlɛ ka babbenɛ ka bɔkaat abbɛ la Adam (Uyya), bɔkaat abbɛ la Christ vvenɛ bussɛ bufungalabɛ ka lubbe bataa ka kuddu. 23 Ɔzzànga ɔlɔɔt la vvɔn ule ule ka ɛfɛɛn ammɛ ya bbwak: Christ ɔkɔɔm ɛtɔk, balɔɔt ba balenɛ ba Christ bakupmɛ ka ɛkɛtɛ kiffu ammɛ. 24 Nkwɔng kɔsaknɛ, lakpeke laffu. Christ vvenɛ ɔbɛpɛ liyeeng ɔkkpɛlɛ ɔgbaa la lakke la lagabwɔ, tɛ́ttɛ́ ɔsam vveengodde unnyi abassɛ, Ɔlɔɔmɔlɔɔm. 25 Christ vvenɛ ɔkɔɔm vveengodde tɔttɔt Ɔlɔɔmɔlɔɔm ɔbɛtɛ lifɔk ammɛ ɔkkpɛlɛ, ɔsambɛ uloko using bukkpɔ. 26 Kɔfɔk ammɛ kwa ule ɔbɛtɛ ka lakpeke ulenɛ lubbe. 27 Luvva-Ɔlɔɔmɔlɔɔm lɔttɛ, “Ɔlɔɔmɔlɔɔm ɔsam bɛfɛɛn ɔkkpɛlɛ uloko using bukkpɔ.” Kule ppwool ka lɔkkwɔɔn, lɛmmwɔɔl ’zɔng za “Bɛfɛɛn ɔkkpɛlɛ” ba liffik Ɔlɔɔmɔlɔɔm wa ɔsamnɛ bɛfɛɛn ɔkkpɛlɛ unnyi Christ lɛssɛɛn. 28 Ka bɛfɛɛn ɔkkpɛlɛ bìlénɛ bya Christ lile, ammɛ biini, Waan-Ɔlɔɔmɔlɔɔm, vvenɛ ɔsammɛ kɛyɔɔng la bɛfɛɛn unnyi Ɔlɔɔmɔlɔɔm, ɔppyɛɛ ɔkɔɔm ɔkkpɛlɛ. 29 Balɔɔt ’bɔng baang ba balenɛ baptizim lɛnaang kwa babbu bɛɛ? Badɔkɔ battɛ isak abbɛ ulenɛ ’bɔng? Kulenɛ ka lɔkkwɔɔn tɛ̀ttɛ̀ balɔɔknɛ battɛ babbu ba babɛlɛ lifungala bataa ka kuddu; ’bɔng tɛ́ttɛ́ balɔɔt ballɔt bannyi kwa babbu? 30 Mbɔng ayyɔɔt isinɛ lubbe lɛmma? 31 Ikpana anaam nyɛn lubbe ka zzeen ɛkɛtɛ ɔkkpɛlɛ. Bɔwaa bwa nyanganɛ ka lafal ayyɔɔt la annyɔɔng ka Christ Jesus, Uyini ayyɔɔt, bunaangnɛnɛ nlɔɔk ’kwɔng: 32 Kulenɛ tɛ̀ttɛ̀ kɔdɔkɔnɛ ka nllunɛ kullu la isɛɛn-a-kɛmat ka Ephesus ka lagabwɔ, mung isak ilenɛnɛ ka ’bɔng? Ulenɛ ka babbu basinɛ lifungala bappyɛlɛ bataa ka kuddu, afɔngɔ izziyɔng, ivva iggeleyɔng ka lufat ile ibbe; ikupnɛ imma balɔɔt. 33 Tɛ̀ttɛ́ ayila ɔlɔɔt ɔdɛmwɔyɔng, ɛnngwa ya ɛbbɔlnɛ ɛbɛpɛ eleme ɔlɔɔt. 34 Appyɛlɛ anaangyɔng ittina ya bbwak. Akkyaayɔng kɛnaang a bubbi afɔngɔyɔng. Izzit inaangwɔyɔng ka annyɔɔng balɔk asinɛyɔng Ɔlɔɔmɔlɔɔm lɛsan. 35 Ɔlɔɔt ɔlɔk vvenɛ ɔbap ɔttɛ, “Mung ɔnaang nang vvenɛ babbu bafungala ka lubbe. Bale bayanga bɔkka kɛssanga kkwɔɔt?” 36 Ukun! akɔɔnnɛ ɛfɔɔk a bɛfɛɛn ka lisse, ebbebong tɛ̀ttɛ̀ emeet. 37 Ka akɔɔnnɛyɛ ka lisse, ele ɛfɔɔk a bɛfɛɛn keem, ɔlɔk ɛfɔɔk a alaasi, ɔlɔk ɛfɔɔk a bɛfɛɛn ɛlɔk. Lɛsan biini lissi ka limeetnɛ. 38 Ɔlɔɔmɔlɔɔm unnyinɛ ɛfɔɔk a bɛfɛɛn ’yɔng baang kkwɔɔt tɛ̀ttɛ̀ uttinanɛ. Unnyi ɛfɔɔk la nnyɔn kkwɔɔt sa likkɔnɔnɛyɛ. 39 Ekkpakkwɔɔt a bɛfɛɛn bya bɛyanganɛ kuddu kɛssanga ssɔn ba ele. Ɔlɔɔt ule ka kkwɔɔt sa ammɛ zzekep. Isɛɛn a kɛmat ile ka kkwɔɔt sa annyɛ zzekep. Bunɔɔn bule ka kkwɔɔt sa abbwɛ zzekep. Isɛɛnabannyi ile ka kkwɔɔt sa annyɛ zzekep. 40 Bɛfɛɛn bya libat bile bakang ka libat. Bya ɛkpansi bile mung ka ɛkpansi. Bɔllɛ bwa bɛfɛɛn bya libat bule buu la bɔllɛ bwa bɛfɛɛn bya ɛkpansi. 41 Livve luwee lɛyanga bɔllɛ bwa azzɛ. Ettuma ɛyanga kɛssanga bɔllɛ bulɔk. Bwaanttuma bayanga bɔllɛ bwa abbɛ zzekep. Bwaanttuma balɔk bale baang ba bɔllɛ bwa abbɛ bubbalnɛ zzekep lile. 42 Kule kule ning mung ka ɛkɛtɛ ya babbu bale bafungala ka lubbe bappyɛlɛ bataa ka kuddu. Basamnɛ ɔlɔɔt balli, ubbebong. Ɛkɛtɛ ya Ɔlɔɔmɔlɔɔm ufungalamɛnɛ ka lubbe, ba ɔbɛlɛ libbe kɛfal a kɛfal. 43 Ka lilli, ale ubbu bɔfɛɛn wa wikiwiki. Ɔzzanga ɛkɛtɛ ya Ɔlɔɔmɔlɔɔm ufungalawɔnɛ vvenɛ ayanga bɔllɛ bwa lɔkkwɔɔn la bɔkkaam. 44 Ka lilli ale la kkwɔɔt ’sɔng kaang. Ɛkɛtɛ ya Ɔlɔɔmɔlɔɔm ufungalawɔnɛ, asseke la kkwɔɔt sa kuyeeng ammɛ. Kule baning, kkwɔɔt sa iyɛnnɛ mung lile baang, Kwakkwɛ baang kkwɔɔt a kuyeeng lissɛnɛ lile baang. 45 Luvva Ɔlɔɔmɔlɔɔm lɔttɛ, “Ɔlɔɔmɔlɔɔm ɔdɔkɔ ɔnaang Adam, ɔkɔɔm-ɛtɔk ɔlɔɔt, ɔttɛ ɔyanga kuddu.” Ɔzzanga usseke-isimi-Adam ulenɛ Kuyeeng kwa kunnyinɛ kuddu. 46 Lɛfal za kuyeeng lissi littenɛ liffu. Lɛfal za gbɔɔ littenɛ liffu tɛ́ttɛ́ za kuyeeng liffu. 47 Ɔlɔɔmɔlɔɔm ɔdɔkɔ ɔbɛkɛ kɛbat ɛkpansi ɔnaang Adam wa ɔkɔɔmnɛ ɛtɔk. Adam wa ɔbbalnɛ liffu mung ussi ka libat uffu. 48 Balɔɔt ba balenɛ ba ɛkpansi bale tɛ̀ttɛ̀ ɔlɔɔt wa bakɔɔmnɛ kɛbat banaangmɛ. Ba balenɛ ba libat, bale tɛ̀ttɛ̀ ɔlɔɔt wa ussinɛ ka libat uffu. 49 Tɛ̀ttɛ̀ ayyɔɔt ibalnɛ ɔlɔɔt wa Ɔlɔɔmɔlɔɔm ɔlɔɔmnɛ ile issɛ ibal Ɔlɔɔt wa ussinɛ ka libat uffu ning baang. 50 Ikpana anaam, kwa nlɔɔknɛ, nlɔɔk nttɛ bɔfɛɛn bwa banaangnɛbwɛ la ɛkkpakkwɔɔt la linnyi ba bukkwoong bumii ka Itutum-Ɔlɔɔmɔlɔɔm. Bɔfɛɛn bwa bubbenɛ ba bukkwoong buyanga etini businɛ libbe. 51 - 52 Agɔpɔlɔyɔng lɔkkwɔɔn a kɔlɔɔk a lalup ’kwɔng: Ɔkkpɛlɛ ayyɔɔt baala ibbe. Ɔzzanga ɔffɔnɛ ka luffi gwa lakuma lɔttanɛ, ɔkkpɛlɛ ayyɔɔt vvenɛ ifoolo eseese. Ka ɛkɛtɛ lɛmmwɔɔl usseke-isimi luffi lile lɛtta, babbu vvenɛ bafungala ka lubbe baddu kuddu, tɛ́ttɛ́ ɔkkpɛlɛ ayyɔɔt ifoolo. 53 Bɔfɛɛn bwa bubbenɛ vvenɛ busam bwa businɛ libbe buvvoongbwɛ kɛyɔɔng. Bɔfɛɛn bwa buddɔlɔnɛ, vvenɛ busam bɔfɛɛn bwa businɛ lɛddɔlɔ buvvoongbwɛ kɛyɔɔng. 54 Bɔfɛɛn bwa bubbenɛ bulenɛ bwa businɛ libbe lɛsam buvvoongbwɛ kɛyɔɔng, bwa buddɔlɔnɛ bule bwa businɛ lɛddɔlɔ lɛsam buvvoongbwɛ kɛyɔɔng, lɔkkwɔɔn a kɔlɔɔk a luvva-Ɔlɔɔmɔlɔɔm vvenɛ luffu bɔk ka lɔttɛnɛ, “Vvenɛ ɔbɛpɛ lubbe, ɔbɛtɛ ɔkkpɛlɛ.” 55 “Lubbe, annɔ abɛtɛ nang? Lakke za kɛwwɔɔl lalewɔ yang?” 56 Lubbe lɔtɔk lakke kɛwwɔɔl ka bubbi. Bubbi butɔk lakke ka Lafɔɔ. 57 Nzɔɔn kɛnaang ule wa Ɔlɔɔmɔlɔɔm wa unnyinɛyɛlɛ Jesus Christ wa ulenɛ lakke kɛbɛtɛ lubbe. 58 Ikpana anaam, abeeyɔng kibee annyɔɔng kɛkkaamwɔyɔng. Anaangyɔng kɛnaang a Uyini ɛkɛtɛ ɔkkpɛlɛ. Duu bwa anaangnɛ annyiyɔng Uyini busɛlɛ isak ba bule.
