1 Kɛsaap ulenɛ bɔfɛɛn bwa abumnɛ gaang gaang attɛ ayanga. Asam ippyam annyɔɔng alokoyɔng ka lɛsɔɔk za Kuyeeng-Ɔlɔɔmɔlɔɔm kunnyiwɔnɛyɔng, gaang gaang lɛsɔɔk za kɛbwɔɔlɔ lɛmmwɔɔl Ɔlɔɔmɔlɔɔm. 2 Ɔlɔɔt wa ɔlɔɔknɛ bafaa likaan, ba ɔlɔɔk unnyi balɔɔt. Ɔlɔɔk la Ɔlɔɔmɔlɔɔm. Ɔlɔɔknɛ kɔlɔɔk a lalup a lɔkkwɔɔn ka lakke Kuyeeng-Ɔlɔɔmɔlɔɔm, balɔɔt baala bappyee. 3 Ɔzzànga ɔlɔɔt wa ɔbwɔɔlɔnɛ lɛmmwɔɔl Ɔlɔɔmɔlɔɔm, ɔlɔɔk ɔbwɔɔlɔ balɔɔt, uttelebɛ, ɔnaangbɛ bakkaam luppyam, ɔnaangbɛ ɔwaabɛ ɔgbaa. 4 Ɔlɔɔt wa ɔlɔɔknɛ bafaa likaan uttelemɛ kɛyɔɔng keem. Ɔzzànga ɔlɔɔt wa ɔbwɔɔlɔnɛ lɛmmwɔɔl Ɔlɔɔmɔlɔɔm uttele luzɔɔm ɔkkpɛlɛ. 5 Kɔsaapnɛ mung ka ɔkkpɛlɛ annyɔɔng alɔɔknɛ yɔng bafaa likaan, ɔzzànga kɔttanɛ lɛsaap ka ayanganɛyɔng lɛsɔɔk za kɛbwɔɔlɔ lɛmmwɔɔl Ɔlɔɔmɔlɔɔm. Ɔlɔɔt wa ɔbwɔɔlɔnɛ lɛmmwɔɔl Ɔlɔɔmɔlɔɔm, ulenɛ ɔlɔɔt wa lɛbaang ɔtta ɔlɔɔt wa ɔlɔɔknɛ bafaa likaan. Kwa ɔlɔɔknɛ luzɔɔm ɔkkpɛlɛ baala kɔyaam, ɔlɔɔt usinɛ baang lile ɔbwɔɔlɔ bwa ɔlɔɔknɛ. 6 Ikpana anaam, ka nffunɛ ka ɛfɛɛn annyɔɔng mung, nlɔɔknɛ ufaa kukaan kwa asinɛyɔng lippyee, attina attɛyɔng baang nle ntaawɔyɔng tɛ̀ttɛ̀ bɔng? Bulɔk ba bule ntakabong nkɔɔm lɛmmwɔɔl za lissinɛ ka Ɔlɔɔmɔlɔɔm, ɔlɔk kukele, ɔlɔk bɔtɔɔm bwa ɔtɔɔmnɛ, ɔlɔk lukopolo lɔlɔk nfeewɔyɔng. 7 Gɔɔ ibin ya isɛlɛnɛ kuddu tɛ̀ttɛ̀ luppet la biggɔ, ɔlɔɔt ule ɔnaang nang uppyee doddo tɛ̀ttɛ̀ bɛkkpanɛ, usinɛ lɛmmwɔɔl zzɔn zzɔn lɛgɔpɔlɔ tɛ̀ttɛ̀ lɛttanɛ? 8 Ɔlɔɔt wa ɔwɔlnɛ luffi lɛkɔɔng usinɛ doddo lɛwɔl, nnyinɔɔng ule uppyee ɔnaang ibama lɛkɔɔng? 9 Kɔssɛ kule kɛssanga ssɔn. Ɔlɔɔt ule ɔnaang nang uppyee kwa alɔɔknɛ atum, abwɔɔlɔmɛnɛ lɛmmwɔɔl annɔ ka ufaa kukaan kwa ɔlɔɔt ule usi lippyee? Kɔtaa tɛ̀ttɛ̀ alɔɔknɛ annyi kɛffa. 10 Likaan lile ggbadam buubuu ka vveeng ’wɔng mung, ɔzzánga kukaan kkwɔn gbɔɔ kwa kɔsɛlɛnɛ ifɛɛt ba kule. 11 Ɔzzànga nsinɛ kukaan kwa balɔɔknɛ lippyee, ɔlɔɔt wa ɔlɔɔknɛkwɛ ulenɛ anaam wa akanakana. Anaam nssɛ nlemɛ ammɛ wa Akanakana. 12 Ka alenɛyɔng baang ka abumnɛ attɛ ayangayɔng lɛsɔɔk a Kuyeeng-Ɔlɔɔmɔlɔɔm attayɔng bɛfɛɛn ɔkkpɛlɛ, abumyɔng gaang gaang anaangyɔng bɛfɛɛn ’byɔng baang bya bile bɛyaam luzɔɔm lɔmmala. 13 Ɔlɔɔt wa ɔlɔɔknɛ bafaa likaan, ubum ɔssɛɛn luzɔɔm unnyi Uyini ɔgbaamɛ lɛsɔɔk za kɛbwɔɔlɔ kwa ɔlɔɔknɛ. 14 Ulenɛ ka nzɔɔmnɛ ka kukaan kwa nsinɛ lippyee, kuyeeng anaam vvenɛ kɔssɛ kɔzɔɔm ka lɔkkwɔɔn. Ɔzzanga luttina anaam baang baala lule. 15 Nle nnaang nang? Nle nzɔɔm la kuyeeng anaam, nzɔɔm la luttina anaam ɔgbaa. Nsoom la kuyeeng anaam, nsoom ka luttina anaam ɔgbaa. 16 Awomonɛ Ɔlɔɔmɔlɔɔm kɛnaang ka kukaan kwa balɔɔt ba basinɛ lippyee, ɔlɔɔt wa gbɔɔ wa ulenɛ baang ka mitin ule ɔnaang nang ɔsan ɔlɔɔk ɔttɛ, “Kule baning,” ka luzɔɔm annɔ gwa azɔɔmnɛ? Baala ɔsan bwa alɔɔknɛ. 17 Mkkpa luzɔɔm a kiwomo kɛnaang annɔ gwa azɔɔmnɛ annyi Ebinukkpaapi lɔyyɛɛp, ɔlɔɔt wakang baala lɔyaam. 18 Nwomobong Ebinukkpaapi kɛnaang ka nlɔɔknɛ bafaa lammwɔɔl ba atakanɛyɔng kɛtɔm kɛlɔk lippyee nttawɔyɔng ɔkkpɛlɛ. 19 Ɔzzànga ka kɛssɛɛn a luzɔɔm, ntolo lakkɔ kubbwɔɔk kkeem za ɔlɔɔt ule uppyee, nkwaaning nkopolo balɔɔt balɔk kɔlɔɔk, lutini nle nlɔɔk innɔ-innɔ lammwɔɔl ka likaan sa basinɛ lippyee. 20 Ikpana anaam, tɛ̀ttɛ́ aleyɔng tɛ̀ttɛ̀ bwɔɔntiti ka ittina. Ataayɔng tɛ̀ttɛ̀ bwɔɔntiti ka ɛtɔk a kɛnaang a bubbi. Ɔzzànga assɛɛnyɔng bugɛlɛnya ka ittina. 21 Ka luvva-Ɔlɔɔmɔlɔɔm bakkpɔk battɛ; “Ebinukkpaapi ɛttɛ, vvenɛ nssɛ la balɔɔt ba balɔɔknɛ likaan ntolo kutolo nnyi balɔɔt ’bɔng. Vvenɛ ntolo ka kamma balɔɔt ikaan ilɔk, ɔzzanga nɛ baala bagɔpɔlɔ!” 22 Lɛsɔɔk za kitolo ufaa kukaan ulenɛ iyɔɔ ya Ɔlɔɔmɔlɔɔm ɔyɔɔnɛ balɔɔt ba basinɛ kiyila lɛyanga. Lɛsɔɔk za bayanga kiyila lissi. Ule lɛsɔɔk za kɛbwɔɔlɔ lɛmmwɔɔl Ɔlɔɔmɔlɔɔm keem ka ulenɛ iyɔɔ ya bayanga-kiyila. 23 Ulenɛ bɔfɛɛn a luzɔɔm ɔkkpɛlɛ lubbinɛ ɛfɛɛn kkwɔn, ɔlɔɔt ɔkkpɛlɛ utolo ufaa kukaan, balɔɔt balɔk, ɔlɔk ɔsɛlɛ-kiyila uffunɛ, vvenɛ balɔɔk battɛ ɔkkpɛlɛ annyɔɔng attɔyɔngbong bikun. 24 Ɔzzanga ɔlɔɔt ɔkkpɛlɛ ɔbwɔɔlɔnɛ lɛmmwɔɔl Ɔlɔɔmɔlɔɔm, balɔɔt balɔk, ɔlɔk ɔsɛlɛ-kiyila uffunɛ vvenɛ ɔkkyaa kɛnaang a bubbi ɔfɔngɔ ka ule uppyee kwa alɔɔknɛ. Vvenɛ uttina utum kwa uppyeenɛ. 25 Ittina ammɛ ya ulupnɛ vvenɛ itta ka vveeng. Vvenɛ ukun laddu ɔzɔɔm ɔttɛ, “Ka lɔkkwɔɔn Ɔlɔɔmɔlɔɔm ule mung la annyɔɔng!” 26 Ikpana anaam, nlɔɔk nttɛ ka adudanɛyɔng ka luzɔɔm, ɔlɔɔt ɔlɔk ɔyanga kisoom, wa vvɔn ɔyanga lukopolo. Ɔlɔk ɔbwɔɔlɔ lɛmmwɔɔl Ɔlɔɔmɔlɔɔm. Ɔlɔɔt ɔlɔk ɔyɛn biyɛnɛ. Ɔlɔɔt ɔlɔk ɔbwɔɔlɔ kwa ɔyɛn-a-biyɛnɛ ɔlɔɔknɛ. Lutini bɔfɛɛn ɔkkpɛlɛ búlé bwa buyaamnɛ luzɔɔm. 27 Ɔlɔɔt ɔlɔk ɔlɔɔknɛ ka ufaa kukaan, balɔɔt baffa ɔlɔk bakkyaat balɔɔk, ɔlɔɔt vvɔn vvɔn. Ɔlɔɔt ɔlɔk ɔbwɔɔlɔ bwa balɔɔknɛ. 28 Ɔzzanga ɔlɔɔt ɔlɔk usinɛ baang lile wa ukkwoongnɛ ɔbwɔɔlɔ kwa likaan ’sɔng baang lilɔɔknɛ, ɔlɔɔknɛ-a-likaan ’sɔng baang ɔtaa zzum ka ɔdda mitin. Ɔppyɛɛ ɔlɔɔk unnyimɛ kɛyɔɔng la Ɔlɔɔmɔlɔɔm. 29 Balɔɔt baffa ɔlɔk bakkyaat ba bayanganɛ bɔtɔɔm Ɔlɔɔmɔlɔɔm balɔɔk. Balɔk bataa battina bwa balɔɔt ’bɔng baang balɔɔknɛ. 30 Ɔzzànga ɔlɔɔt ɔlɔk ulenɛ baang ka ɔdda mitin wa ɔyanganɛ bɔtɔɔm bwa bussinɛ ka Ɔlɔɔmɔlɔɔm, ɔlɔɔt wa ulenɛ ka kɛlɔɔk uzum. 31 Ɔkkpɛlɛ annyɔɔng ɔlɔɔt vvɔn vvɔn ukkwoong mung ɔbwɔɔlɔ lɛmmwɔɔl Ɔlɔɔmɔlɔɔm nkwaaning ɔkkpɛlɛ bakkoop bayanga kɛkkaam a luppyam. 32 Ɔlɔɔt wa ɔyanganɛ lɛsɔɔk za kɛbwɔɔlɔ lɛmmwɔɔl Ɔlɔɔmɔlɔɔm, ɔkɔɔmzɛ doddo ka kamma ammɛ. 33 Ɔlɔɔmɔlɔɔm ba ɔggyan ɔttɛ inaang tɔkɔtɔkɔtɔkɔ, ɔggyan ɔttɛ itaa ka bɔkaat. Tɛ̀ttɛ̀ kulenɛ ka izɔɔm a balɔɔt ammɛ ɔkkpɛlɛ, 34 bwanavva bataa zzum ka mitin a luzɔɔm. Kufuk ba bayanga kwa kɛlɔɔk tɛ̀ttɛ̀ Lafɔɔ balɔɔt a Jews lalɔɔknɛ lattɛ tɛ̀ttɛ́ bale ka kizzi lɛttɔ. 35 Bayanganɛ lɔbap, babap bwalam abbɛ ka bale baffɔ ka ssala. Ule kɔlɔɔk izzit ka wanavva ɔzzanɛ lɛmmwɔɔl ka mitin a luzɔɔm. 36 Lɛmmwɔɔl Ɔlɔɔmɔlɔɔm lissi ka annyɔɔng liffu ɔɔ? Faa annyɔɔng keem alenɛyɔng ba liffunɛ kwa annyɔɔng? 37 Ɔlɔɔt ɔlɔk ulenɛ baang wa ɔttɛnɛ ammɛ ɔlɔɔk kɔlɔɔk Ɔlɔɔmɔlɔɔm, ɔlɔk ammɛ ɔyanganɛ lɛsɔɔk za lissinɛ ka Kuyeeng-Ɔlɔɔmɔlɔɔm, vvenɛ ɔkɔɔlɔ ɔttɛ bwa nkkpɔknɛ nnyiwɔyɔng mung bussi ka lakke Uyini. 38 Ɔzzanga usinɛ ’kwɔng doddo lɛgɔpɔlɔ, tɛ̀ttɛ́ agɔpɔlɔmɛyɔng ammɛ. 39 Ikpana anaam, alokoyɔng ippyam annyɔɔng ka kɛbwɔɔlɔ bɔtɔɔm Ɔlɔɔmɔlɔɔm, ɔzzànga tɛ̀ttɛ́ kitolo likaan kittunwɔyɔng. 40 Anaangyɔng lutini bɔfɛɛn ɔkkpɛlɛ doddo.
